ຮອງປະທານທີ່ປຶກສາການເມືອງປະຊາຊົນທົ່ວປະເທດຈີນ ທັງເປັນປະທານກອງທຶນມູນນິທິແບ່ງປັນຮ່ວມກັນ ແຫ່ງ ສປ ຈີນ ໃນວັນທີ 27 ມັງກອນ ນີ້ ທີ່ສຳນັກງານນາຍົກລັດຖະມົນຕີ, ທ່ານ ນາຍົກລັດຖະມົນຕີ ກໍໄດ້ຕີລາຄາສູງຕໍ່ ກອງທຶນມູນນິທິດັ່ງກ່າວໂດຍສະເພາະແມ່ນການດຳເນີນໂຄງການກ່ຽວກັບວຽກງານສາທາລະນະສຸກຂອງ ສປປ ລາວ.
ທ່ານ ສອນໄຊ ສີພັນດອນ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ລຽງ ເຈີນຢິງ ພ້ອມຄະນະຜູ້ແທນ ກອງທຶນມູນນິທິແບ່ງປັນຮ່ວມກັນ ແຫ່ງ ສປ ຈີນ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 25-29 ມັງກອນ 2025 ຄັ້ງນີ້ ຊຶ່ງເປັນການປະກອບສ່ວນສຳຄັນໃນການສືບຕໍ່ເສີມຂະຫຍາຍສາຍພົວພັນການຮ່ວມມື ລະຫວ່າງ ພັກ, ລັດ ສປປ ລາວ ແລະ ພັກ, ລັດ ສປ ຈີນ ໃນໄລຍະທີ່ຜ່ານມາ ທີ່ເປັນສາຍພົວພັນແບບຄູ່ຮ່ວມຍຸດທະສາດຮອບດ້ານ, ໝັ້ນຄົງ ຍາວນານ ຕາມທິດ 4 ດີ, ທັງເປັນການປະກອບສ່ວນແກ່ການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ ເວົ້າລວມ, ເວົ້າສະເພາະ ແມ່ນການພົວພັນຮ່ວມມືລະຫວ່າງ ກອງທຶນມູນນິທິແບ່ງປັນຮ່ວມກັນ ແຫ່ງ ສປ ຈີນ ແລະ ກະຊວງສາທາລະນະສຸກ ແຫ່ງ ສປປ ລາວ ໂດຍສະເພາະການຮ່ວມກັນຈັດຕັ້ງປະຕິບັດໂຄງການກ່ຽວກັບວຽກງານສາທາລະນະສຸກ ກໍຄືໂຄງການລຶບລ້າງພະຍາດແກ່ນຕາຂຸ້ນ ທີ່ເຮັດໃຫ້ຕາບອດ ແລະ ໂຄງການອື່ນໆ.
ທ່ານ ລຽງ ເຈີນຢິງ ໄດ້ກ່າວສະແດງຄວາມຂອບໃຈຢ່າງຍິ່ງທີ່ ທ່ານ ນາຍົກລັດຖະມົນຕີ ໄດ້ໃຫ້ການຕ້ອນຮັບໃນຄັ້ງນີ້; ພ້ອມທັງລາຍງານໃຫ້ຊາບວ່າ ພາຍຫຼັງ 6 ປີທີ່ກອງທຶນມູນນິທິແບ່ງປັນຮ່ວມກັນ ແຫ່ງ ສປ ຈີນ ໄດ້ເຄື່ອນໄຫວຢູ່ ສປປ ລາວ, ການມາຢ້ຽມຢາມ ສປປ ລາວ ຄັ້ງນີ້ເປັນຄັ້ງທີ 8 ເຖິງວ່າຈະເປັນການມາຢ້ຽມຢາມເວລາສັ້ນ ແຕ່ກໍມີຄວາມໝາຍສຳຄັນ ຊຶ່ງຜ່ານມາພາຍໃຕ້ການສະໜັບສະໜູນຢ່າງຫຼວງຫຼາຍຂອງລັດຖະບານລາວ ໂດຍສະເພາະກະຊວງສາທາລະນະສຸກ ໂຄງການຂອງພວກເຮົາແມ່ນໄດ້ດຳເນີນໄປດ້ວຍດີ ແລະ ໄດ້ຮັບໝາກຜົນຫຼາຍ; ປັດຈຸບັນ, ກອງທຶນມູນນິທິແບ່ງປັນຮ່ວມກັນ ແຫ່ງ ສປ ຈີນ ມີໂຄງການທີ່ດຳເນີນໃນ 8 ປະເທດ ທີ່ນອນຢູ່ໃນ 4 ທະວີບ, ແຕ່ໃນນີ້ ປະເທດລາວ ເປັນປະເທດທໍາອິດທີ່ໄດ້ມີການລົງເລິກໃນການດຳເນີນໂຄງການ ເປັນຕົ້ນໂຄງການລຶບລ້າງພະຍາດແກ່ນຕາຂຸ້ນ ທີ່ເຮັດໃຫ້ຕາບອດ ຊຶ່ງສະເພາະໃນ 2 ປີທີ່ຜ່ານມາ ໂຄງການໄດ້ມີການຜ່າຕັດໃຫ້ແກ່ຄົນເຈັບຂອງລາວ ສຳເລັດໄດ້ 5,200 ກໍລະນີ ແລະ ຫວັງວ່າສອງຝ່າຍຈະສືບຕໍ່ຮ່ວມມື ເພື່ອບັນລຸຈຸດປະສົງທີ່ຕັ້ງໄວ້ວ່າພາຍໃນປີນີ້ ຈະລຶບລ້າງພະຍາດແກ່ນຕາຂຸ້ນທີ່ເຮັດໃຫ້ຕາບອດ ຢູ່ໃນປະເທດລາວ. ພ້ອມດຽວກັນ, ກໍໄດ້ລາຍງານວ່າມີໂຄງການອື່ນໆອີກ ທີ່ມີຜົນໄດ້ຮັບດີ ເປັນຕົ້ນໂຄງການຕ້ານໄຂ້ຍຸງ.
ໂອກາດດຽວກັນ, ທ່ານນາຍົກລັດຖະມົນຕີ ກໍໄດ້ສະແດງຄວາມຊົມເຊີຍ ແລະ ກ່າວຄວາມຫວັງວ່າ ກອງທຶນມູນນິທິແບ່ງປັນຮ່ວມກັນ ແຫ່ງ ສປ ຈີນ ຈະສືບຕໍ່ການຮ່ວມມືຕື່ມອີກ ໂດຍສະເພາະການຄົ້ນຄວ້າກ່ຽວກັບພະຍາດແກ່ນຕາຂຸ້ນ ເປັນຂໍ້ມູນໃນການໃຊ້ໂຄສະນາປະຊາສຳພັນ ເພື່ອໃຫ້ປະຊາຊົນລາວ ມີຄວາມຮູ້ ແລະ ປ້ອງກັນພະຍາດດັ່ງກ່າວ; ທ່ານ ສອນໄຊ ສີພັນດອນ ຍັງໄດ້ກ່າວອວຍພອນໃຫ້ແກ່ ທ່ານ ລຽງ ເຈີນຢິງ ພ້ອມຄະນະຈົ່ງມີສຸຂະພາບແຂງແຮງ ແລະ ປະສົບຜົນສຳເລັດຢ່າງສູງໃນການມາຢ້ຽມຢາມ ແລະ ເຮັດວຽກຢູ່ ສປປ ລາວຄັ້ງນີ້.
(ຂ່າວ-ພາບ: ສຸກສະຫວັນ)
ຄໍາເຫັນ