ນາຍົກລັດຖະມົນຕີ ໂອ້ລົມການນຳ ແລະ ພະນັກງານຫຼັກແຫຼ່ງແຂວງຫຼວງນໍ້າທາ

ທ່ານ ພົນໂທ ຄຳກິ່ງ ຜຸຍຫຼ້າມະນີວົງ ເລຂາພັກແຂວງ ປະທານສະພາປະຊາຊົນແຂວງຫຼວງນໍ້າທາໄດ້ລາຍງານໃຫ້ຊາບກ່ຽວກັບສະພາບການຈັດຕັ້ງປະຕິບັດວຽກງານຮອບດ້ານຂອງແຂວງເຫັນວ່າ: ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ເສດຖະກິດຂະຫຍາຍຕົວ, ສັງຄົມມີຄວາມສະ ຫງົບປອດໄພ ໂດຍພື້ນຖານ, ໃນໄລຍະ 6 ເດືອນຕົ້ນປີ 2026 ສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 2,210 ຕື້ກວ່າກີບ ເທົ່າກັບ 58.4% ຂອງແຜນການປີ; ການປະຕິບັດແຜນລາຍຈ່າຍ ໄດ້ 220 ຕື້ກວ່າກີບ, ເທົ່າກັບ 26.24% ຂອງແຜນປີ; ໄດ້ເອົາໃຈໃສ່ຊຸກຍູ້, ສົ່ງເສີມປູກເຂົ້ານາແຊງ, ນາປີ ແລະ ຜະລິດພືດສະບຽງອາຫານ, ສົ່ງເສີມການຜະລິດກະສິກໍາເປັນສິນຄ້າ ຊຶ່ງເດັ່ນກວ່າໝູ່ແມ່ນຂະບວນການປູກອ້ອຍ ຢູ່ເມືອງສິງ ແລະ ເມືອງລອງ ໄດ້ຜົນຜະລິດເກືອບ 1 ລ້ານໂຕນ ແລະ ເກັບກູ້ນໍ້າຢາງພາລາໄດ້ 77,485 ໂຕນ; ວຽກງານອຸດສາຫະກຳ ແລະ ການຄ້າ ກໍມີການຂະຫຍາຍຕົວ; ພື້ນຖານໂຄງລ່າງກໍໄດ້ຮັບການປົກປັກຮັກສາ, ກໍ່ສ້າງ ແລະ ສ້ອມແປງ, ພ້ອມກັນນັ້ນ ກໍໄດ້ເອົາໃຈໃສ່ປັບປຸງຄຸນນະພາບຂອງການສຶກສາ ແລະ ການບໍລິ ການດ້ານສາທາລະນະສຸກ ໃຫ້ດີຂຶ້ນກວ່າເກົ່າ.

ໃນໂອກາດດັັ່ງກ່າວ, ທ່ານນາຍົກລັດຖະມົນຕີ ໄດ້ໃຫ້ກຽດພົບປະໂອ້ລົມຕໍ່ຜູ້ເຂົ້າຮ່ວມ ໂດຍໄດ້ເນັ້ນໜັກໃຫ້ຄະນະພັກ-ຄະນະນຳແຕ່ລະຂັ້ນ ເອົາໃຈໃສ່ຕື່ມບາງດ້ານ ເປັນຕົ້ນເອົາໃຈໃສ່ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ຮັບປະກັນສະຖຽນລະພາບທາງການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍສຸມໃສ່ແກ້ໄຂບັນຫາສະແກມເມີ, ການຫຼອກລວງທາງອອນລາຍ, ບັນ ຫາຢາເສບຕິດ, ການເກັບກູ້ອາວຸດເສິກ ແລະ ອື່ນໆ, ພ້ອມທັງຫັນກຳລັງລົງກໍ່ສ້າງຮາກຖານການເມືອງ;ສືບຕໍ່ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ກໍຄືຈັດຕັ້ງຜັນຂະຫຍາຍມະຕິ04/ກມສພ ແລະ ມະຕິ 02/ລບ ໃນການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ໃຫ້ເປັນແຜນ ການ-ແຜນງານອັນລະອຽດ, ມີໂຄງການ, ມີຄາດໝາຍສໍາເລັດ ເພື່ອຫຼຸດຜ່ອນການເພີ່ງພາການນໍາເຂົ້າຈາກຕ່າງ ປະເທດ; ກະກຽມຈັດຕັ້ງປະຕິບັດວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກ ຍາກຕິດພັນກັບວຽກງານ 3 ສ້າງ; ຫັນການເກັບລາຍຮັບເປັນທັນສະໄໝ, ຈັດເກັບລາຍຮັບເຂົ້າງົບປະມານ ຈາກຖານທີ່ມີແລ້ວໃຫ້ຄົບຖ້ວນ, ພ້ອມທັງເອົາໃຈໃສ່ຂະຫຍາຍຖານລາຍຮັບໃໝ່ ໃຫ້ມີຄວາມໝັ້ນຄົງ, ຍົກສູງປະສິດ ທິພາບ ແລະ ປະສິດທິຜົນຂອງການລົງທຶນ; ຄຸ້ມຄອງການຂຸດຄົ້ນແຮ່ທາດຕາມຄໍາສັ່ງສະບັບເລກທີ 06/ນຍ ແລະ ຄຳສັ່ງສະບັບເລກທີ 46/ນຍ ໂດຍມີການຕິດຕາມ, ກວດກາ ແລະ ມີມາດຕະການຢ່າງເດັດຂາດ; ປັບປຸງຄຸນນະພາບການຮຽນ-ການສອນໃຫ້ໄດ້ດີ, ກະກຽມຄວາມພ້ອມໃຫ້ແກ່ການນຳໃຊ້ຫຼັກສູດສາມັນສຶກສາລະບົບໃໝ່ 6+3+3, ພ້ອມທັງເຝົ້າລະວັງພະຍາດຕາມລະດູການ; ເພີ່ມທະວີການຕິດຕາມ-ຮັບມືກັບໄພທຳມະຊາດ ທີ່ອາດເກີດຂຶ້ນ ຢ່າງທັນການ; ສົ່ງເສີມການຝຶກອົບຮົມວິຊາຊີບ, ພັດທະນາສີມືແຮງງານ, ຄຸ້ມຄອງແຮງງານຕ່າງດ້າວໃຫ້ເຂົ້າສູ່ລະບົບ; ສືບຕໍ່ເອົາໃຈໃສ່ພົວພັນຮ່ວມມືກັບປະເທດໃກ້ຄຽງເພື່ອຍາດແຍ່ງການຊ່ວຍເຫຼືອ ແລະ ດຶງດູດການລົງທຶນ.

ຫຼັງຈາກນັ້ນ, ທ່ານ ນາຍົກລັດຖະມົນຕີ ໄດ້ມອບທຶນ ແລະ ເຄື່ອງຊ່ວຍເຫຼືອແກ້ໄຂຜົນກະທົບ ຈາກໄພພິບັດນໍ້າຖ້ວມໃຫ້ແກ່ອົງການປົກຄອງແຂວງຫຼວງນໍ້າທາ ຈຳນວນໜຶ່ງຕື່ມອີກ.

(ຂ່າວ-ພາບ: ກົມປະຊາສໍາພັນ ຫສນຍ)