 |
ໃນໂອກາດນີ້, ສະຫາຍ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມຄັ້ງນີ້ ຊຶ່ງເປັນຄັ້ງທໍາອິດພາຍຫຼັງທີ່ ສະຫາຍ ຫງວຽນ ຈີ້ ຢຸງ ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງ ເປັນຮອງນາຍົກລັດຖະມົນຕີ ແຫ່ງ ສສ ຫວຽດນາມ ໃນເດືອນກຸມພາ 2025 ທີ່ຜ່ານມາ, ທັງເປັນການປະກອບສ່ວນອັນສໍາຄັນ ເຂົ້າໃນການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ລາວ-ຫວຽດນາມ ແລະ ທັງເປັນການຈັດຕັ້ງຜັນຂະຫຍາຍບັນດາຂໍ້ຕົກລົງຂອງສອງກົມການເມືອງ ກໍຄືຜົນຂອງກອງປະຊຸມຄະນະກໍາມະ ການຮ່ວມມື ລາວ-ຫວຽດນາມ ຄັ້ງທີ 47. ພ້ອມນີ້, ສະຫາຍ ສອນໄຊ ສີພັນດອນ ໄດ້ຝາກຄໍາ ຢື້ຢາມຖາມຂ່າວອັນອົບອຸ່ນໄປຍັງ ສະຫາຍ ຟ້າມ ມິງ ຈິງ ນາຍົກລັດຖະມົນຕີ ກໍຄືຄະນະລັດຖະບານຫວຽດນາມ ທຸກທົ່ວໜ້າ.
ສອງຝ່າຍໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນສໍາເລັດໃນການພັດທະນາ ເສດຖະກິດ-ສັງຄົມ ທີ່ສອງປະເທດຍາດມາໄດ້ ໂດຍສະເພາະຜົນສໍາເລັດດ້ານການປັບປຸງກົງຈັກການຈັດຕັ້ງຈາກສູນກາງຮອດ ທ້ອງຖິ່ນ ກໍຄືຜົນສໍາເລັດຂອງການພົວພັນຮ່ວມມືສອງຝ່າຍ ໃນໄລຍະຜ່ານມາ ຊຶ່ງເຫັນໄດ້ວ່າ: ສອງຝ່າຍ ສືບຕໍ່ມີການພົບປະ ແລະ ແລກປ່ຽນການຢ້ຽມຢາມຊຶ່ງກັນ ແລະ ກັນ ຂອງຄະນະຜູ້ແທນຂັ້ນຕ່າງໆ ຢ່າງເປັນປົກກະຕິ ແລະ ການຈັດຕັ້ງປະຕິບັດບັນດາໂຄງການຮ່ວມມືສອງຝ່າຍ ກໍມີຄວາມຄືບໜ້າໃນລະດັບດີສົມຄວນ. ມີບາງໂຄງການຄາດວ່າ: ຈະໃຫ້ສໍາເລັດໃນທ້າຍປີ 2025 ນີ້. ພິເສດ ສອງຝ່າຍໄດ້ສໍາເລັດການເປີດທ່າທຽບເຮືອເລກ 3 ຂອງທ່າເຮືອຫວຸງອາງ 1, 2, 3 ທີ່ເປັນເຫດການທີ່ສໍາຄັນ ແລະ ມີຄວາມໝາຍທາງປະຫວັດສາດ ການພົວ ພັນຮ່ວມມືຂອງສອງປະເທດ.
ສະຫາຍ ສອນໄຊ ສີພັນດອນ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນການພົບປະເຮັດວຽກ ລະຫວ່າງ ສະຫາຍ ຫງວຽນ ຈີ້ ຢຸງ ຮອງນາຍົກລັດຖະມົນຕີ ແລະ ສະຫາຍ ສະເຫຼີມໄຊ ກົມມະສິດ ຮອງນາ ຍົກລັດຖະມົນຕີ ຊຶ່ງສອງຝ່າຍໄດ້ທົບທວນ ແລະ ຕີລາຄາຄືນການຈັດຕັ້ງຜັນຂະຫຍາຍບັນດາຂໍ້ຕົກລົງຂອງ ສອງກົມການເມືອງ ກໍຄືຜົນຂອງກອງປະຊຸມຄະນະກໍາມະການຮ່ວມມື ລາວ-ຫວຽດນາມ ຄັ້ງທີ 47 ແລະ ວາງທິດທາງແຜນການຮ່ວມມືໃນ 6 ເດືອນທ້າຍປີ 2025 ນີ້. ສະຫາຍ ສອນໄຊ ສີພັນດອນ ໄດ້ສະເໜີໃຫ້ສອງຝ່າຍ ສືບຕໍ່ຊຸກຍູ້ບັນດາໂຄງການທີ່ພວມຈັດຕັ້ງປະຕິບັດ ແລະ ຍັງຄົງຄ້າງ ໃຫ້ສໍາເລັດຕາມຄາດໝາຍ. ສືບຕໍ່ເພີ່ມທະວີການຮ່ວມມື ໃນວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ ແລະ ການປັບປຸງການຮ່ວມມືດ້ານພະລັງງານໄຟຟ້າ ໂດຍສະເພາະ ປັບປຸງສັນຍາຮ່ວມມືຕ່າງໆ ໃຫ້ມີຄວາມເໝາະສົມຂຶ້ນຕື່ມ, ເພີ່ມທະວີການຄ້າ-ການລົງທຶນ ໃຫ້ຫຼາຍຂຶ້ນໃນອີກ 5 ປີຕໍ່ໜ້າ, ການເຊື່ອມ ໂຍງພື້ນຖານເສດຖະກິດ ໂດຍເລີ່ມຈາກການເຊື່ອມໂຍງພື້ນຖານໂຄງລ່າງ ແລະ ການເງິນ, ການທະນາຄານ, ສືບຕໍ່ຮັກສາການໄປມາຫາສູ່ ລະຫວ່າງ ຄະນະຜູ້ແທນຂັ້ນຕ່າງໆ ເພື່ອກະກຽມຮອບດ້ານໃຫ້ແກ່ການ ສະເຫຼີມສະຫຼອງວັນສໍາຄັນຕ່າງໆ ຂອງສອງພັກ-ສອງລັດ ໃນປີ 2025 ນີ້.
ໃນຂະນະດຽວກັນ, ສະຫາຍ ຫງວຽນ ຈີ້ ຢຸງ ກໍໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ໄດ້ນໍາເອົາຄໍາຢື້ຢາມຖາມຂ່າວອັນອົບອຸ່ນ ແລະ ສະໜິດສະໜົມຂອງ ສະຫາຍ ຟ້າມ ມິງ ຈິງ ນາຍົກລັດຖະມົນຕີ ມາຍັງ ສະຫາຍ ສອນໄຊ ສີພັນດອນ ກໍຄືມາຍັງຄະນະລັດຖະບານ ແຫ່ງ ສປປ ລາວ ພ້ອມທັງໄດ້ສະແດງ ຄວາມໝາຍໝັ້ນວ່າ: ຈະສືບຕໍ່ເຮັດວຽກຮ່ວມກັບຝ່າຍລາວ ຢ່າງໃກ້ຊິດ ເພື່ອຈັດຕັ້ງຜັນຂະຫຍາຍບັນດາ ຂໍ້ຕົກລົງຂອງສອງກົມການເມືອງ ກໍຄືຜົນຂອງກອງປະຊຸມຄະນະກໍາມະການຮ່ວມມື ລາວ-ຫວຽດນາມ ຄັ້ງທີ 47 ໃຫ້ປະກົດຜົນເປັນຮູບປະທໍາ ທັງເພື່ອຊຸກຍູ້ສົ່ງເສີມສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ-ຫວຽດນາມ ໃຫ້ຈະເລີນງອກງາມຍິ່ງໆຂຶ້ນ.
ຂ່າວ: ກະຊວງການຕ່າງປະເທດ
ຄໍາເຫັນ