ນະໂຍບາຍຂອງລັດຖະບານໃນການເຂົ້າເຖິງແຫຼ່ງທຶນກິດຈະການລ້ຽງສັດ ໂດຍ: ສ.ບຸດປະຊາ

ເພື່ອສ້າງເງື່ອນໄຂໃຫ້ຜູ້ລ້ຽງ, ຜູ້ຜະລິດ ແລະ ສະໜອງປັດໄຈການຜະລິດ ແລະ ຜູ້ປຸງແຕ່ງຜະລິດຕະພັນສັດ ແລະ ສັດນໍ້າ ໃຫ້ສາມາດເຂົ້າເຖິງແຫຼ່ງທຶນ ເພື່ອພັດທະນາກິດຈະການໃຫ້ເຕີບໃຫຍ່; ເພື່ອພັດທະນາ ແລະ ປັບປຸງລະບົບ ບໍລິການຂອງພາກລັດ ໃຫ້ມີຄວາມສາມາດໃນການບໍລິການດ້ານວິຊາການ ເປັນຕົ້ນແມ່ນການຄົ້ນຄວ້າ ແລະ ສົ່ງເສີມດ້ານແນວພັນ, ອາຫານສັດ, ການບໍລິການດ້ານສຸຂະພາບສັດ ໃຫ້ມີປະສິດທິພາບ ແລະ ປະສິດທິຜົນສູງ. ລັດຖະບານໄດ້ກຳນົດນະໂຍບາຍດ້ານການເງິນ ແລະ ການເຂົ້າເຖິງແຫຼ່ງທຶນ ເຂົ້າເປັນນະໂຍບາຍແຫ່ງຊາດ ຊຶ່ງໃນນີ້ກຳນົດ ແລະ ອອກນະໂຍບາຍເຂົ້າເຖິງແຫຼ່ງທຶນຂອງລັດຖະບານຕາມປະເພດ ກິດຈະການລ້ຽງສັດ ແລະ ສັດນໍ້າ.
    ນະໂຍບາຍດ້ານການເງິນ ແລະ ການເຂົ້າເຖິງແຫຼ່ງທຶນ ເປັນນະໂຍບາຍ ຂໍ້ທີ 8 ຊຶ່ງແມ່ນຂໍ້ສຸດທ້າຍໃນນະໂຍບາຍແຫ່ງຊາດ ວ່າດ້ວຍການສົ່ງເສີມການລ້ຽງສັດ ແລະ ສັດນໍ້າຂອງ ສປປ ລາວ ທີ່ມີດຳລັດເລກທີ 196/ນຍ, ລົງວັນທີ 6/7/2022 ຮັບຮອງ ແລະ ປະກາດໃຊ້. ນະໂຍບາຍດັ່ງກ່າວນີ້, ກຳນົດຂຶ້ນກໍເພື່ອເປັນການສະໜອງທຶນໃຫ້ພຽງພໍ ໃນການຂັບເຄື່ອນນະໂຍບາຍສົ່ງເສີມການລ້ຽງສັດ ແລະ ສັດນໍ້າ ໃຫ້ເປັນຮູບປະທໍາ, ນະໂຍບາຍດ້ານການເງິນ ແລະ ການເຂົ້າເຖິງແຫຼ່ງທຶນ ແມ່ນມີຄວາມຈໍາເປັນຫຼາຍ. ສະນັ້ນ, ລັດຖະບານຈຶ່ງວາງນະໂຍບາຍອອກ ໂດຍເພີ່ມການຈັດສັນງົບປະມານຂອງລັດ ເຂົ້າໃສ່ການພັດທະນາລະບົບການບໍລິການຂອງລັດທີ່ກ່ຽວກັບ ແນວພັນສັດ ແລະ ສັດນໍ້າ, ອາຫານສັດ, ຢາກັນ ແລະ ປິ່ນປົວສັດ, ການວິໄຈ, ການຢັ້ງຢືນ ມາດຕະຖານລວມທັງການຄົ້ນຄວ້າທົດລອງໃຫ້ເຂັ້ມແຂງ; ຍົກເວັ້ນອາກອນທີ່ດິນ ເພື່ອໃຊ້ເຂົ້າໃນການລ້ຽງສັດ ແລະ ສັດນໍ້າ ໃຫ້ແກ່ຜູ້ປະກອບການທີ່ມີເປົ້າໝາຍຜະລິດແນວພັນສັດ ແລະ ສັດນໍ້າ, ແນວພັນພືດອາຫານສັດ ເພື່ອຈໍາໜ່າຍ; ປະຕິບັດນະໂຍບາຍຍົກເວັ້ນພາສີທີ່ດິນ ໄລຍະ 3 ປີ ໃຫ້ແກ່ຊາວກະສິກອນທີ່ຢຸດຕິການຖາງປ່າເຮັດໄຮ່ ຫັນມາເຮັດອາຊີບລ້ຽງສັດ ແລະ ສັດນໍ້າເປັນອາຊີບຖາວອນ ຕາມໝວດທີ III ຂອງລັດຖະບັນຍັດ ວ່າດ້ວຍພາສີທີ່ດິນ ເລກທີ 07/ສປປ, ລົງວັນທີ 8 ພຶດສະພາ 2007.
    ນອກຈາກນັ້ນ, ກໍຫຼຸດຜ່ອນ ຫຼື ຍົກເວັ້ນພາສີ ສໍາລັບການນໍາເຂົ້າປັດໄຈການຜະລິດ ເປັນຕົ້ນແນວພັນພືດ, ແນວພັນສັດ, ນໍ້າເຊື້ອສັດ, ວັກຊິນກັນພະຍາດສັດ, ຢາປົວສັດ, ວັດຖຸດິບຮັບໃຊ້ການຜະລິດທີ່ບໍ່ສາມາດຜະລິດຢູ່ພາຍໃນປະເທດ ແລະ ບໍ່ມີລັກສະນະເອົາມາຈໍາໜ່າຍໂດຍກົງເພື່ອການຄ້າ ຕາມມາດຕາ 100 ຂອງກົດໝາຍ ວ່າດ້ວຍພາສີ (ສະບັບປັບປຸງ) ເລກທີ 81/ສພຊ, ລົງວັນທີ 29/6/2020 ແລະ ມາດຕາ 49 ຂອງຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍພາສີ ເລກທີ 3269/ກງ, ລົງວັນທີ 26/7/2021; ຫຼຸດຜ່ອນ ແລະ ການຍົກເວັ້ນ ອາກອນມູນຄ່າເພີ່ມ ສໍາລັບການນໍາເຂົ້າປັດໄຈການຜະລິດ ແນວພັນສັດ ແລະ ສັດນໍ້າ, ແນວພັນພືດອາຫານສັດ, ຢາກັນ ແລະ ປິ່ນປົວພະຍາດສັດ, ວັດຖຸດິບທີ່ບໍ່ສາມາດຜະລິດ ໄດ້ຢູ່ພາຍໃນ, ອຸປະກອນ ແລະ ພາຫະນະຮັບໃຊ້ການຜະລິດໂດຍກົງ ຕາມມາດຕາ 19 ຂອງ ກົດໝາຍ ວ່າດ້ວຍອາກອນມູນຄ່າເພີ່ມ, ເລກທີ 48/ສພຊ, ລົງວັນທີ 20/6/2018; ຍົກເວັ້ນອາກອນກໍາໄລຂອງຜູ້ລົງທຶນໂດຍອີງຕາມລໍາດັບ ແລະ ເຂດ ທີ່ກໍານົດໄວ້ ໃນກົດໝາຍວ່າດ້ວຍ ການສົ່ງເສີມການລົງທຶນ ເລກທີ 14/ສພຊ, ລົງວັນທີ 17/7/2016 ແລະ ບໍ່ເກັບອາກອນລາຍໄດ້ ຫຼື ມີນະໂຍບາຍຜ່ອນຜັນອາກອນລາຍໄດ້ ຂອງຜູ້ລ້ຽງສັດ ແລະ ສັດນໍ້າ ຈຸນລະວິສະຫະກິດ ທີ່ຖືບັນຊີ ແລະ ມີລາຍຮັບຕໍ່າກວ່າ 50 ລ້ານກີບຕໍ່ປີ ຫຼື ຫຼາຍກວ່ານັ້ນ ຕາມມາດຕາ 29 ຂອງກົດໝາຍວ່າດ້ວຍ ອາກອນລາຍໄດ້ ເລກທີ 67/ສພຊ ລົງວັນທີ 18/6/2019.
    ໃນນະໂຍບາຍນີ້, ລັດຖະບານຍັງໄດ້ກໍານົດ ແລະ ອອກນະໂຍບາຍເຂົ້າເຖິງແຫຼ່ງທຶນຂອງລັດຖະບານ ຕາມປະເພດກິດຈະການລ້ຽງສັດ ແລະ ສັດນໍ້າ ດ້ວຍອັດຕາດອກເບ້ຍ, ໄລຍະການກູ້ຢືມ ແລະ ການຜ່ອນຜັນ ການທົດແທນທຶນຄືນ ທີ່ເໝາະສົມ ໂດຍຕົ້ນຕໍໃຫ້ກວມເອົາ 13 ປະເພດ ຂອງຜູ້ປະກອບການ ຄື: 
1). ຜູ້ປະກອບການຟາມຜະລິດລູກງົວ ມີໄລຍະການກູ້ຢືມ ເກີນ 10 ປີ, ອັດຕາດອກເບ້ຍ 2%, ປອດດອກເບ້ຍ 5 ປີ ແລະ ປອດຕົ້ນທຶນ 4 ປີ;
2). ຜູ້ປະກອບການຟາມຜະລິດລູກໝູ ມີໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 3%, ປອດດອກເບ້ຍ 5 ປີ ແລະ ປອດຕົ້ນທຶນ 3 ປີ; 
3). ຜູ້ປະກອບການຟາມຜະລິດລູກສັດນໍ້າ ເພື່ອຈໍາໜ່າຍ ມີໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 3%, ປອດດອກເບ້ຍ 3 ປີ ແລະ ປອດຕົ້ນທຶນ 2 ປີ; 
4). ຜູ້ປະກອບການລ້ຽງ ງົວ-ຄວາຍ ນົມ ໄລຍະການກູ້ຢືມ ເກີນ 10 ປີ, ອັດຕາດອກເບ້ຍ 2%, ປອດດອກເບ້ຍ 5 ປີ ແລະ ປອດຕົ້ນທຶນ 4 ປີ;
5). ຜູ້ປະກອບການຟາມລ້ຽງງົວຊີ້ນ ໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 5%, ປອດດອກເບ້ຍ 4 ປີ ແລະ ປອດຕົ້ນທຶນ 3 ປີ;
6). ຜູ້ປະກອບການຟາມລ້ຽງແບ້ ແລະ ແກະ ຊີ້ນ ໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 5%, ປອດດອກເບ້ຍ 3 ປີ ແລະ ປອດຕົ້ນທຶນ 2 ປີ;
7). ຜູ້ປະກອບການຟາມລ້ຽງໝູຊີ້ນ ໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 5%, ປອດດອກເບ້ຍ 4 ປີ ແລະ ປອດຕົ້ນທຶນ 2 ປີ;
8). ຜູ້ປະກອບການຟາມລ້ຽງສັດປີກ ເພື່ອໃຫ້ຊີ້ນ ແລະ ໃຫ້ໄຂ່, ຟາມລ້ຽງປາ ແລະ ສັດນໍ້າເປັນສິນຄ້າ ໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 5%, ປອດດອກເບ້ຍ 3 ປີ ແລະ ປອດຕົ້ນທຶນ 2 ປີ;
9). ຜູ້ຜະລິດອາຫານສັດ ແລະ ອາຫານສັດນໍ້າ ໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 5%, ປອດດອກເບ້ຍ 3 ປີ ແລະ ປອດຕົ້ນທຶນ 4 ປີ;
10). ຜູ້ຜະລິດແນວພັນພືດ ອາຫານສັດ ເປັນສິນຄ້າ ໄລຍະການກູ້ຢືມ ເກີນ 3 ປີ, ອັດຕາດອກເບ້ຍ 3%, ປອດດອກເບ້ຍ 3 ປີ ແລະ ປອດຕົ້ນທຶນ 2 ປີ;
11). ຜູ້ປະກອບການໂຮງງານຂ້າສັດທັນສະໄໝ ແລະ ໂຮງງານປຸງແຕ່ງຜະລິດຕະພັນສັດ ແລະ ສັດນໍ້າ ໄລຍະການກູ້ຢືມ ເກີນ 5 ປີ, ອັດຕາດອກເບ້ຍ 5%, ປອດດອກເບ້ຍ 2 ປີ ແລະ ປອດຕົ້ນທຶນ 3 ປີ;
12). ຜູ້ປະກອບການຜະລິດຢາສັດຕະວະແພດ ໄລຍະການກູ້ຢືມ ເກີນ 10 ປີ, ອັດຕາດອກເບ້ຍ 3%, ປອດດອກເບ້ຍ 3 ປີ ແລະ ປອດຕົ້ນທຶນ 4 ປີ;
13). ຜູ້ຜະລິດນໍ້າເຊື້ອສັດ ສະໜອງໃຫ້ແກ່ ການປະສົມພັນທຽມ ໄລຍະການກູ້ຢືມ ເກີນ 3 ປີ, ອັດຕາດອກເບ້ຍ 3%, ປອດດອກເບ້ຍ 2 ປີ ແລະ ປອດຕົ້ນທຶນ 2 ປີ;
ນະໂຍບາຍດັ່ງກ່າວນີ້, ກໍເພື່ອເປັນການແກ້ໄຂບັນຫາງົບປະມານ ພັດທະນາດ້ານແນວພັນສັດ ແລະ ສັດນໍ້າ, ການຜະລິດຢາສໍາລັບສັດ, ການຍົກສູງມາດຖານ ການປ້ອງກັນຄວາມສ່ຽງ ລວມທັງ ການປະຕິບັດມາດຕະການ ດ້ານສຸຂານາໄມ ແລະ ສຸຂານາໄມພືດ ຍັງບໍ່ພຽງພໍ; ງົບປະມານໃນການຍົກລະດັບການເຝົ້າລະວັງ ແລະ ວິໄຈພະຍາດສັດ, ການວິໄຈສິ່ງປົນເປື້ອນ ແລະ ສານຕົກຄ້າງໃນຜະລິດຕະພັນສັດ, ການວິໄຈຄຸນນະພາບອາຫານສັດ ແລະ ງົບປະມານ ເພື່ອພັດທະນາບຸກຄະລາກອນ ເປັນຕົ້ນວິຊາການດ້ານສັດຕະວະແພດ ແລະ ການປະມົງຍັງບໍ່ພຽງພໍ; ຄວາມສາມາດເຂົ້າເຖິງແຫຼ່ງທຶນຂອງຊາວກະສິກອນຜູ້ລ້ຽງສັດ ແລະ ສັດນ້ໍາຍັງຈໍາກັດ; ການປະຕິບັດນະໂຍບາຍຫຼຸດຜ່ອນພາສີ ແລະ ອາກອນ ຢູ່ໃນຂົງເຂດການຜະລິດ ແລະ ສະໜອງປັດໄຈການຜະລິດທີ່ຍັງເຮັດບໍ່ທັນໄດ້ດີ.