ທ່ານ ສີຈິ້ນຜິງ ກ່າວວ່າ: ນັບແຕ່ຈີນ ແລະ ສະຫະພາບເອີຣົບສ້າງຕັ້ງສາຍພົວພັນທາງການທູດຮ່ວມກັນເປັນເວລາ 50 ປີມານີ້, ໝາກຜົນຂອງການແລກປ່ຽນ ແລະ ການຮ່ວມມືກັນມີຄວາມອຸດົມສົມບູນ, ຕ່າງຝ່າຍຕ່າງໄດ້ຮັບຜົນປະໂຫຍດ ແລະ ໄດ້ສ້າງຜົນດີໃຫ້ແກ່ທົ່ວໂລກນຳອີກ. ຜູ້ນຳຈີນ ແລະ ເອີຣົບ ຄວນພະຍາຍາມສ້າງ 50 ປີໃໝ່ທີ່ສົດໃສກວ່າເກົ່າຂອງສາຍພົວພັນລະຫວ່າງຈີນ-ເອີຣົບ, ນຳເອົາສະຖຽນລະພາບ ແລະ ຄວາມແນ່ນອນຫຼາຍກວ່າເກົ່າໃຫ້ແກ່ໂລກ.
ທ່ານ ສີຈິ້ນຜິງ ໄດ້ສະໜີຈຸດຢືນ 3 ຂໍ້ກ່ຽວກັບການພັດທະນາສາຍພົວພັນລະຫວ່າງຈີນ-ເອີຣົບໃນອະນາຄົດ ຄື: ໜຶ່ງ, ຢຶດໝັ້ນເຄົາລົບນັບຖືຊຶ່ງກັນ ແລະ ກັນ, ປັບປຸງໃຫ້ສາຍພົວພັນຄູ່ຮ່ວມມືມີຄວາມໝັ້ນຄົງກວ່າເກົ່າ. ສອງ, ຢຶດໝັ້ນການເປີດປະຕູ ແລະ ການຮ່ວມມື, ແກ້ໄຂຂໍ້ຂັດແຍ້ງຢ່າງເໝາະສົມ. ສາມ, ຈັດຕັ້ງປະຕິບັດລັດທິຫຼາຍຝ່າຍ, ປົກປັກຮັກສາກົດລະບຽບ ແລະ ລະບຽບສາກົນ.
ຝ່າຍເອີຣົບກ່າວວ່າ: ຈຸດຢືນ 3 ຂໍ້ດັ່ງກ່າວຂອງທ່ານ ສີຈິ້ນຜິງ ມີຄວາມສຳຄັນທີ່ສຸດ. ເອີຣົບຈະສຸມກຳລັງເຂົ້າໃນການລົງເລິກສາຍພົວພັນລະຫວ່າງເອີຣົບ-ຈີນ, ຊຸກຍູ້ໃຫ້ການຮ່ວມມືສອງຝ່າຍປະສົບຜົນສຳເລັດທີ່ຕັ້ງໜ້າຫຼາຍກວ່າເກົ່າ. ໃນທ່າມກາງທີ່ໂລກມີຄວາມປັ່ນປ່ວນສັບສົນ ແລະ ເຕັມໄປດ້ວຍຄວາມບໍ່ແນ່ນອນ, ເອີຣົບ ແລະ ຈີນຕ້ອງແບກຫາບໜ້າທີ່ຄວາມຮັບຜິດຊອບ, ຮ່ວມກັນຢຶດໝັ້ນລັດທິຫຼາຍຝ່າຍ, ປົກປັກຮັກສາຈຸດປະສົງ ແລະ ຫຼັກການຂອງກົດບັດອົງການສະຫະປະຊາຊາດ, ປົກປັກຮັກສາສັນຕິພາບ ແລະ ສະຖຽນລະພາບຂອງໂລກ. ເອີຣົບຄອງຄອຍຮ່ວມກັບຈີນເພື່ອຂຽນໜ້າປະຫວັດສາດທີ່ສວຍງາມກວ່າເກົ່າຂອງສາຍພົວພັນລະຫວ່າງເອີຣົບ-ຈີນ ໃນ 50 ປີຕໍ່ໜ້າ.
ຄໍາເຫັນ