ແນວຄິດຊີ້ນໍາຂອງ ປະທານ ຄໍາໄຕ ກ່ຽວກັບວຽກງານ ປກຊ-ປກສ ມີ 2 ບັນຫາໃຫຍ່ທີ່ເປັນຫຼັກ

ໂດຍ: ສ.ບຸດປະຊາ
ເພື່ອສືບຕໍ່ສຸມໃສ່ການກໍ່ສ້າງຮາກຖານການເມືອງ-ພັດທະນາຊົນນະບົດ ແລະ ປັບປຸງກຳລັງປະກອບອາວຸດໃຫ້ມີຄວາມເຂັ້ມແຂງ ຂຶ້ນໄປເລື້ອຍໆ, ແນວຄິດຊີ້ນໍາຂອງ ປະທານ ຄໍາໄຕ ສີພັນດອນ ກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ໄດ້ປະກອບສ່ວນຢ່າງສຳຄັນ; ໂດຍແນວຄິດນີ້ຂອງເພິ່ນ, ແມ່ນມີ 2 ບັນຫາໃຫຍ່ ທີ່ເປັນຫຼັກ ແລະ ກາຍເປັນບົດຮຽນທີ່ໄດ້ຮັບການນໍາມາໝູນໃຊ້ ເກີດປະໂຫຍດແກ່ປະເທດຊາດຂອງເຮົາ.
ໃນການເຂົ້າຮ່ວມກອງປະຊຸມສຳມະນາວິທະຍາສາດລະດັບຊາດ ໃນໂອກາດລະນຶກວັນເກີດຂອງ ປະທານ ຄໍາໄຕ ສີພັນດອນ ຄົບຮອບ 100 ປີ (8/2/1924-8/2/2024) ທີ່ຈັດຂຶ້ນເມື່ອທ້າຍເດືອນທັນວາຜ່ານມາ ທີ່ແຂວງຈໍາປາສັກ ຊຶ່ງເປັນແຂວງທີ 2 ໂດຍກ່ອນໜ້ານີ້ແມ່ນຈັດທີ່ແຂວງຫົວພັນ; ການເຂົ້າຮ່ວມຄັ້ງນີ້, ທ່ານ ພັນເອກ ໂພນທອງ ພັນຈະເລີນພົນ ຮອງຫົວໜ້າກົມວິທະຍາສາດ-ປະຫວັດສາດການທະຫານ ກະຊວງປ້ອງກັນປະເທດ ຜູ້ໄດ້ຮັບມອບໝາຍຂຽນບົດແນວຄິດຊີ້ນໍາຂອງ ປະທານ ຄໍາໄຕ ສີພັນດອນ ກ່ຽວກັບວຽກງານນີ້ ກໍໄດ້ຍົກໃຫ້ເຫັນ 2 ບັນຫາໃຫຍ່ ທີ່ເປັນຫຼັກໃນແນວຄິດຊີ້ນໍານີ້.
    ໃນນາມທີ່ເປັນຜູ້ໄດ້ຮັບມອບໝາຍດັ່ງກ່າວ, ທ່ານ ພັນເອກ ໂພນທອງ ພັນຈະເລີນພົນ ກໍໄດ້ຍົກສູງເຖິງຄວາມໝາຍສຳຄັນ ຊຶ່ງໄດ້ລົງເລິກເກັບກໍາບັນດາພຶດຕິກຳຂອງທ່ານຜູ້ນໍາ ທີ່ຊີ້ນໍາຕໍ່ຂົງເຂດວຽກງານປກຊ-ປກສ. ຜ່ານການຄົ້ນຄວ້າບັນດາເອກະສານ, ຂໍ້ມູນຕ່າງໆ ໃນການຂຽນບົດ ແມ່ນໄດ້ອ່ານຫຼາຍເອກະສານ ລວມເຖິງໄດ້ພົວພັນລົງເກັບກໍາຂໍ້ມູນຕົວຈິງ ຊຶ່ງໃນນີ້ໄດ້ອີງຕາມມະຕິກອງປະຊຸມໃຫຍ່ຂອງພັກປະຊາຊົນປະຕິວັດລາວ ເລີ່ມແຕ່ຄັ້ງທີ V - ຄັ້ງທີ VIII, ກະຊວງປ້ອງກັນປະເທດ ກໍເປັນອົງການທີ່ຈັດຕັ້ງປະຕິບັດຕົວຈິງ. ໃນຕົວຈິງເຫັນໄດ້ວ່າບັນຫາຫຼັກໆ ໃນແນວຄິດຊີ້ນໍາຂອງ ປະທານ ຄໍາໄຕ ສີພັນດອນ ກ່ຽວກັບວຽກງານດັ່ງກ່າວ ແມ່ນສຸມໃສ່ 2 ບັນຫາໃຫຍ່ຄື: “ການຫັນລົງກໍ່ສ້າງຮາກຖານການເມືອງ-ພັດທະນາຊົນນະບົດ ແລະ ການປັບປຸງກໍ່ສ້າງກຳລັງ”.
    ບັນຫາໃຫຍ່ອັນທີ 1, ການຫັນລົງກໍ່ສ້າງຮາກຖານການເມືອງ-ພັດທະນາຊົນນະບົດ ຂອງວຽກງານປ້ອງກັນຊາດ-ປ້ອງກັນຄວາມສະຫງົບ “ເປັນຂົງເຂດວຽກງານຍຸດທະສາດທີ່ສຳຄັນ” ເພາະວ່າການຈັດຕັ້ງຫັນລົງກໍ່ສ້າງຮາກຖານການເມືອງ-ພັດທະນາຊົນນະບົດ ແມ່ນການນໍາເອົາແນວທາງ, ແຜນການ, ນະໂຍບາຍຂອງພັກ-ຂອງລັດ, ມະຕິຕ່າງໆ ຫຼື ແຜນຍຸດທະສາດຂອງພັກ ລົງໄປຈັດຕັ້ງຜັນຂະຫຍາຍຕົວຈິງຢູ່ທ້ອງຖິ່ນ ຊຶ່ງຜ່ານການຈັດຕັ້ງປະຕິບັດຕົວຈິງນັ້ນ ກໍໄດ້ຮັບຜົນດີສົມຄວນ ໂດຍສະເພາະສາມາດແກ້ໄຂໄດ້ບັນດາຂົງເຂດທີ່ບໍ່ມີຄວາມສະຫງົບ.
    ບັນຫາໃຫຍ່ອັນທີ 2, ການປັບປຸງກໍ່ສ້າງກຳລັງ ແມ່ນເປັນຈຸດຍຸດທະສາດໜຶ່ງທີ່ສຳຄັນ; ອີງໃສ່ແນວທາງນະໂຍບາຍຂອງພັກເຮົາທີ່ວ່າ “ການທະຫານ ຍາມໃດກໍຮັບໃຊ້ການເມືອງ”. ດັ່ງນັ້ນ, ການປັບປຸງການຈັດຕັ້ງ-ປັບປຸງກຳລັງ ແມ່ນມີຄວາມຈໍາເປັນ, ຖ້າໄປຕາມໄລຍະແຕ່ລະວາລະຂອງສະໄໝກອງປະຊຸມ ເຮົາຕ້ອງໄດ້ມີການປັບປຸງ ເພື່ອໃຫ້ດຸ່ນດ່ຽງ ລະຫວ່າງ ລາຍຮັບຂອງສູນກາງ ກັບການປັບປຸງກຳລັງ. ນອກຈາກນັ້ນ, ຖ້າເຮົາປັບປຸງຫົວໜ່ວຍການຈັດຕັ້ງສົມບູນແລ້ວ, ເຮົາຕ້ອງເອົາໃຈໃສ່ປັບປຸງກຳລັງໃຫ້ເຂັ້ມແຂງ ຊຶ່ງໃນນີ້ແມ່ນເນັ້ນໜັກໃສ່ກໍ່ສ້າງການເມືອງ-ແນວຄິດ, ສຸມໃສ່ກໍ່ສ້າງພະນັກງານໃຫ້ມີແນວຄິດຫຼັກໝັ້ນການເມືອງທີ່ໜັກແໜ້ນ ໃຫ້ມີພະນັກງານ 3 ຮຸ່ນໄປພ້ອມກັນ ເປັນຕົ້ນພະນັກງານສືບທອດ-ພະນັກງານປ່ຽນແທນ ຕ່າງໆ. ການຈັດຕັ້ງກໍ່ສ້າງກຳລັງ ຕາມແນວຄິດຊີ້ນໍາຂອງ ປະທານ ຄໍາໄຕ ສີພັນດອນນັ້ນ, ປັດຈຸບັນພວກເຮົາແມ່ນໄດ້ກໍ່ສ້າງກຳລັງທັງພາຍໃນ ແລະ ຕ່າງປະເທດ ໂດຍສະເລ່ຍແມ່ນ 1 ປີ ມີການກໍ່ສ້າງພາຍໃນ 2.000 ກວ່າຄົນ ແລະ ຕ່າງປະເທດ 1.000 ກວ່າຄົນ.
    ທ່ານ ພັນເອກ ໂພນທອງ ພັນຈະເລີນພົນ ໄດ້ເປີດເຜີຍວ່າ: ພາຍຫຼັງສຳເລັດ, ການຈັດຕັ້ງສຳມະນາວິທະຍາສາດລະດັບຊາດ ໃນໂອກາດລະນຶກວັນເກີດຂອງ ປະທານ ຄໍາໄຕ ສີພັນດອນ ຄົບຮອບ 100 ປີນີ້ແລ້ວ ສະເພາະກົມວິທະຍາສາດ-ປະຫວັດສາດການທະຫານ ກໍຈະໄດ້ມີການບັນທຶກສຳເນົາ ແລະ ສົມທົບກັບບັນດາໂຮງຮຽນກໍ່ສ້າງກຳລັງ ເພື່ອຈະສົ່ງໄປເປັນເອກະສານຂໍ້ມູນ ນໍາເຂົ້າໃນການສິດສອນ ໃຫ້ແກ່ພະນັກງານຮຸ່ນຕໍ່ໄປ.
    ຈາກເນື້ອໃນນັ້ນ, ກໍຈະເຫັນໄດ້ວ່າ: ການໝູນໃຊ້ແນວຄິດຊີ້ນໍາຂອງ ປະທານ ຄໍາໄຕ ສີພັນດອນ ໃນຂົງເຂດນີ້ ເພື່ອປັບປຸງກຳລັງໃຫ້ມີຄວາມເຂັ້ມແຂງນັ້ນ, ຍາມໃດ ພວກເຮົາກໍໄດ້ເອົາໃຈໃສ່ ນໍາແນວຄິດຊີ້ນໍານີ້ ເຂົ້າໃນການສືບຕໍ່ສິດສອນ ບັນດາເລົ່າຮົບຮຸ່ນຫຼັງ-ຮຸ່ນສືບທອດໃຫ້ເອົາໃຈໃສ່ຮໍ່າຮຽນ “ວຽກງານກໍ່ສ້າງຮາກຖານການເມືອງ ໃຫ້ເປັນກົກ” ແລະ ສຸມໃສ່ການ “ສືບຕໍ່ປັບປຸງກຳລັງຕໍ່ໆໄປ ບໍ່ມີຍາມສິ້ນສຸດ ເພື່ອໃຫ້ກອງທັບປະຊາຊົນລາວ ເວົ້າລວມ, ເວົ້າສະເພາະ ກໍາລັງປະກອບອາວຸດ ໃຫ້ມີຄວາມເຂັ້ມແຂງ, ທັນສະໄໝ, ທຽບເທົ່າກັບສາກົນ”.