 |
ທ່ານ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ ເລຂາຄະນະບໍລິຫານງານພັກ ເລຂາຄະນະບໍລິຫານງານ ສຊປລ ທັງເປັນປະທານຈັດງານດັ່ງກ່າວໄດ້ຂຶ້ນກ່າວເປີດງານວ່າ: ການຈັດງານໃນຄັ້ງນີ້ຂຶ້ນ ໂດຍມີຈຸດປະສົງ ເພື່ອການຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດ, ແຜນພັດທະນາຊາວໜຸ່ມ-ເຍົາວະຊົນ 5 ປີ ຄັ້ງທີ II; ຍຸດທະສາດການພັດທະນາຊາວໜຸ່ມ, ເຍົາວະຊົນ ປີ 2021-2030 ໂດຍການສ້າງເງື່ອນໄຂ ແລະ ສະພາບແວດລ້ອມທີ່ດີສໍາລັບຊາວໜຸ່ມ-ເຍົາວະຊົນ; ເພື່ອເປີດໂອກາດໃຫ້ຊາວໜຸ່ມ-ເຍົາວະຊົນລາວບັນດາເຜົ່າໄດ້ສະແດງຄວາມຮູ້, ຄວາມສາມາດ ແລະ ແລກປ່ຽນບົດຮຽນ ແລະ ເປັນການປູກຈິດສຳນຶກຂອງບັນດາຊາວໜຸ່ມ-ເຍົາວະຊົນໄດ້ເຂົ້າເຖິ່ງຂໍ້ມູນຂ່າວສານທີ່ສຳຄັນ ແລະ ເປັນປະໂຫຍດ; ເພື່ອທົບທວນຄືນເຖິງຜົນງານ ແລະ ການປະກອບສ່ວນຂອງຄະນະຊາວໜຸ່ມປະຊາຊົນ ປະຕິວັດລາວ ແຕ່ລະຂັ້ນ, ຜູ້ປະກອບການໜຸ່ມ ທີ່ຈະໄດ້ນໍາເອົາຜົນງານຂອງຕົນເຂົ້າມາແລກປ່ຽນ, ຮຽນຮູ້ ຊຶ່ງກັນ ແລະ ກັນ ໂດຍຜ່ານເວທີສົນທະນາແລກປ່ຽນ ແລະ ແຂ່ງຂັນ ເພື່ອສ້າງຂະບວນການຂໍ່ານັບຮັບຕ້ອນ 3 ວັນປະຫວັດຊາດຂອງຊາດ, ຂອງພັກ, ສະເຫຼີມສະຫຼອງ ແລະ ຊົມເຊີຍວັນສ້າງຕັ້ງຄະນະຊາວໜຸ່ມປະຊາຊົນ ປະຕິວັດລາວ ຄົບຮອບ 70 ປີ ແລະ ການກະກຽມດໍາເນີນກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ IX ທີ່ຈະເປີດຂື້ນໃນມໍ່ໆນີ້. ພ້ອມນັ້ນ, ຍັງເປັນການເປີດໂອກາດໃຫ້ເຍົາວະຊົນ-ອະນຸຊົນໄດ້ມີການແລກປ່ຽນບົດຮຽນ ຊຶ່ງກັນ ແລະ ກັນທາງດ້ານການເວົ້າທີ່ມີເນື້ອໃນ, ມີຫຼັກການບ່ອນອີງ ແລະ ກິດຈະກໍາຕ່າງໆເພື່ອພັດທະນາຕົນເອງ ໃຫ້ມີຄວາມຮູ້ຄວາມສາມາດກາຍເປັນຜູ້ສືບທອດທີ່ມີຄຸນນະພາບຂອງພັກຂອງຊາດ.
 |
ຕະຫຼອດໄລຍະເວລາຜ່ານມາ ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ໃນຖານະເປັນແກນນຳຂອງການຈັດຕັ້ງ ແລະ ຕົວແທນຂອງຄົນຮຸ່ນໜຸ່ມທີ່ໄດ້ກຳເນີດ ແລະ ເຕີບໃຫຍ່ໃຕ້ຮົ່ມທຸງຂອງພັກ ແລະ ມີການຂະຫຍາຍຕົວຢ່າງບໍ່ຢຸດຢັ້ງ ມາຮອດປັດຈຸບັນໄດ້ 70 ປີ ຊຶ່ງບໍ່ວ່າຍາມໃດກໍໄດ້ຮັບການສຶກສາອົບຮົມ, ໃກ້ຊິດ, ຕິດແທດຈາກການນຳແຕ່ລະຮຸ່ນ ກໍຄືພັກ-ລັດ ມາໂດຍຕະຫຼອດ ເປັນຕົ້ນໄດ້ມີແນວທາງ, ມີນິຕິກໍາເປັນບ່ອນອີງ ແລະ ສຸມໃສ່ວຽກງານຊາວໜຸ່ມ-ເຍົາວະຊົນ ກໍຄືນະໂຍບາຍລວມເປັນຢ່າງດີ ເພື່ອເສີມຂະຫຍາຍບົດບາດຂອງການຈັດຕັ້ງ ໃຫ້ມີຄວາມເຂັ້ມແຂງ ແລະ ຈັດຕັ້ງປະຕິບັດ ພາລະບົດບາດຂອງຕົນ ເຮັດໃຫ້ຊາວໜຸ່ມ-ເຍົາວະຊົນ ໄດ້ມີໂອກາດປະກອບສ່ວນເຫື່ອແຮງຂອງຕົນທາງດ້ານຫົວຄິດປະດິດສ້າງ ແລະ ພອນສະຫວັນ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ພ້ອມທັງປົກປັກຮັກສາສິດຜົນປະໂຫຍດອັນຊອບທຳຂອງພວກເຂົາເຈົ້າ.
ທ່ານ ມອນໄຊ ລາວມົວຊົງ ຍັງເຊື່ອໝັ້ນຢ່າງໜັກແໜ້ນວ່າ: ງານຄັ້ງນີ້ ຈະເປັນການສ້າງຄວາມຮັບຮູ້ ແລະ ເຂົ້າໃຈເຖິງຄວາມໝາຍຄວາມສໍາຄັນຂອງຊາວໜຸ່ມ ແລະ ຫວັງຢ່າງຍິ່ງວ່າ ບັນດາທ່ານທີ່ເຂົ້າຮ່ວມງານ ຈະສືບຕໍ່ເພີ່ມທະວີຄວາມເອົາໃຈໃສ່ໃນການສ້າງເງື່ອນໄຂ ເອື້ອອໍານວຍຄວາມສະດວກ ແລະ ພັດທະນາຊາວໜຸ່ມວັນນີ້ ໃຫ້ກາຍເປັນຜູ້ສືບທອດທີ່ດີມີຄຸນນະພາບໃນອະນາຄົດ ພ້ອມທັງໝັ້ນໃຈວ່າຊາວໜຸ່ມພວກເຮົາ ຈະພ້ອມກັນຝຶກຝົນຫຼໍ່ຫຼອມຕົນເອງໃຫ້ກາຍເປັນພົນລະເມືອງດີ ແລະ ກາຍເປັນຜູ້ສືບທອດທີ່ດີໃນຕໍ່ໜ້າ.
 |
ພາຍໃນງານຄັ້ງນີ້, ຍັງມີການວາງສະແດງສິນຄ້າ, ຜະລິດຕະພັນຊາວໜຸ່ມ, ຕົວແບບຊາວໜຸ່ມ, ງານວາງສະແດງຮູບພາບມູນເຊື້ອ 70 ປີ ຂອງຄະນະຊາວໜຸ່ມນະຄອນຫຼວງ, ນັກທຸລະກິດໜຸ່ມແຫ່ງຊາດ, ກະຊວງ, ອົງການທຽບເທົ່າ, ແຂວງ ແລະ ບັນດາກົມອ້ອມຂ້າງ ສູນກາງຊາວໜຸ່ມ ປະຊາຊົນປະຕິວັດລາວ, ເວທີການສະແດງ, ເວທີສົນທະນາແລກປ່ຽນຄວາມຮູ້, ການແຂ່ງຂັນຂຽນບົດຄວາມຊາວໜຸ່ມ-ເຍົາວະຊົນ, ການບໍລິຈາກເລືອດ ແລະ ງານວາງສະແດງສິນຄ້າອື່ນໆ. ນອກນີ້, ຍັງມີການແຂ່ງຂັນເກມກິລາ, ສີລະປະ ແລະ ການວາດພາບຂອງຫຼານນ້ອຍ ແລະ ອື່ນໆ.
ໂອກາດນີ້, ທ່ານ ສິນລະວົງ ຄຸດໄພທູນ ພ້ອມຄະນະປະທານເຂົ້າຮ່ວມ ໄດ້ໃຫ້ກຽດຂຶ້ນຕັດແຖບຜ້າ ເພື່ອເປັນນິມິດໝາຍອັນດີ ແລະ ສີລິມຸງຄຸນແກ່ການເປີດງານໃນຄັ້ງນີ້. ຫຼັງຈາກນັ້ນ, ກໍໄດ້ທ່ຽວຊົມເບິ່ງຮ້ານວາງສະແດງຕ່າງໆ ພາຍໃນງານຕື່ມອີກ. ງານບຸນມະໂຫງານໃນຄັ້ງນີ້ໄດ້ຈັດຂຶ້ນເປັນເວລາ 5 ວັນ ເລີ່ມແຕ່ວັນທີ 25-29 ມິຖຸນາ 2025.
(ຂ່າວ-ພາບ: ວັນເພັງ)
ຄໍາເຫັນ