 |
ງານຄັ້ງນີ້, ຈັດຂຶ້ນໂດຍການຮ່ວມມືລະຫວ່າງ ມະຫາວິທະຍາໄລ ສຸພານຸວົງ ກັບ ອົງການ ວອນເດີສ ສາກົນ ເພື່ອກໍານົດຮູບແບບທຸລະກິດນະວັດຕະກຳ ຄົ້ນຫາວິທີແກ້ໄຂບັນຫາໃນຂະແໜງກະສິກຳລາວ ແລະ ສ້າງມູນຄ່າເພີ່ມກະຕຸ້ນລະບົບນິເວດ (Startup), ສ້າງລະບົບສະໜັບສະໜູນ ໃຫ້ຜູ້ປະກອບການໜຸ່ມເພິ່ງພາຕົນເອງໄດ້ ແລະ ສົ່ງເສີມການເຕີບໂຕ, ຊ່ວຍໃຫ້ທີມທີ່ມີຕົ້ນແບບ ສາມາດກ້າວເຂົ້າສູ່ຕະຫຼາດຕົວຈິງໄດ້. ການແຂ່ງຂັນຄັ້ງນີ້, ມີຜູ້ເຂົ້າຮ່ວມແຂ່ງຂັນທັງໝົດ 15 ທີມ, ມາຈາກບັນດາເມືອງ ໃນແຂວງຫຼວງພະບາງ ແລະ ມະຫາວິທະຍາໄລສຸພານຸວົງ. ໃນນັ້ນ, ໄດ້ແບ່ງອອກເປັນ 2 ກຸ່ມຄື: ກຸ່ມທີ່ມີຜະລິດຕະພັນສ້າງລາຍຮັບແລ້ວ ລວມມີ 9 ທີມ ແລະ ກຸ່ມທີ່ມີຜະລິດຕະພັນຕົ້ນແບບ ລວມມີ 6 ທີມ. ສຳລັບຮູບແບບການແຂ່ງຂັນ ທີມທີ່ມີຜະລິດຕະພັນ ສ້າງລາຍຮັບແລ້ວ ສຸມໃສ່ເພີ່ມປະສິດທິພາບ ແລະ ຂະຫຍາຍທຸລະກິດ ເປັນຕົ້ນ ການຫຸ້ມຫໍ່, ການຕະຫຼາດ ແລະ ການຂະຫຍາຍຊ່ອງທາງຈຳໜ່າຍ (ເນັ້ນຜົນການດໍາເນີນງານຕົວຈິງ) ເຊັ່ນ: ຍອດຂາຍ, ຜົນຕອບຮັບຂອງລູກຄ້າ ແລະ ທ່າແຮງການເຕີບໂຕຂອງທຸລະກິດ.
ສ່ວນທີມທີ່ມີຜະລິດຕະພັນຕົ້ນແບບ ສຸມໃສ່ການປັບປຸງຕົ້ນແບບ, ການສ້າງຍີ້ຫໍ (ໂລໂກ້-ການອອກແບບ) ແລະ ອຸປະກອນທີຈຳເປັນ, ໂດຍເນັ້ນໜັກເຖິງຄວາມແຕກຕ່ງໃໝ່ຂອງວິທີແກ້ໄຂ ແລະ ຄວາມເປັນໄປໄດ້ຂອງ ທຸລະກິດ. ຊຶ່ງຄັດເລືອກເອົາທີມຊະນະເລີດ ແຕ່ລະກຸ່ມລວມ 3 ທີມ. ຜົນການແຂ່ງຂັນປະກົດວ່າ: ກຸ່ມທີ່ມີຜະລິດຕະພັນຕົ້ນແບບຄື: ທີມພັນຕໍ່ດ່ານ ຫຼື ລ້ຽງຕໍ່ເປັນອາຊີບ ບ້ານນາໄຮ ເມືອງຈອມເພັດ, ທິມຈໍາໜ່າຍຜັກໄຮໂດຣໂປນິກ ທີ່ສົດສະອາດ ປອດສານເຄມີ ຈາກນະຄອນ ຫຼວງພະບາງ ແລະ ທີມເຂົ້າປຽກເຄີ່ງສໍາເລັດຮູບມິດຕະພາບ ໄດ້ຮັບເງິນສົດລາງວັນທີມລະ 1,000 ໂດລາສະຫະລັດ.
 |
ສໍາລັບກຸ່ມທີ່ມີຜະລິດຕະພັນສ້າງລາຍຮັບແລ້ວ ມີທີມ ແອວເຄ ຟາມ ຫຼື ສວນເມລອນ (LK farm and Forestry cafe) ບ້ານຜານົມ ນະຄອນ ຫຼວງພະບາງ, ທີມສານຝັນ (ການລ້ຽງສັດປີກ ແລະ ການຜະລິດປຸນອີນຊີ) ບ້ານກົກງິ້ວ ນະຄອນ ຫຼວງພະບາງ ແລະ ທີມຟາມປະສົມປະສານ ເພື່ອການທ່ອງທ່ຽວ ບ້ານໂພນສະຫວ່າງ ເມືອງປາກອູ ໄດ້ຮັບເງິນສົດລາງວັນທີມລະ 2,000 ໂດລາສະຫະລັດ. ການແຂ່ງຂັນໃນຄັ້ງນີ້ ໄດ້ຮັບການສະໜັບສະໜູນຈາກ ອົງການ ວອນເດີສ ສາກົນ (wonders within people) ແລະ ຄອມມູນີທີ ແຊັດ ອອບໂຄເລຍ (Community Chest of Korea) ຊຶ່ງມີແຜນຈັດຂຶ້ນທຸກປີ ເພື່ອສືບຕໍ່ຊຸກຍູ້ ແລະ ພັດທະນາຊາວໜຸ່ມໃຫ້ກາຍເປັນກຳລັງແຮງສຳຄັນ ໃນການພັດທະປະເທດຊາດ ໃນຕໍ່ໜ້າ.
(ພາບ+ຂ່າວ: ທະນູສິນ ອິດທິພົນ)
ຄໍາເຫັນ