ນີ້ ທີ່ສູນການຄ້າ ລາວ-ໄອເຕັກ ນະຄອນຫຼວງວຽງຈັນ ໂດຍມີ ທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ແລະ ຫັດຖະກໍາ ກະຊວງອຸດສາຫະກຳ ແລະ ການຄ້າ, ທ່ານ ນາງ ຄໍາພາ ຄໍາບຸນເຮືອງ ຮອງຜູ້ອຳນວຍການໃຫຍ່ຝ່າຍການຄ້າ ບໍລິສັດລາວເວີນ ມະຫາຊົນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ພານະລິນ ສຸວັນນະວົງ ໃນນາມຜູ້ອຳນວຍການບໍລິສັດ ອີລີແກນ ອີເວັ້ນສ ຈໍາກັດຜູ້ດຽວ ໄດ້ກ່າວວ່າ: ງານວາງສະແດງລົດ ວຽງຈັນມໍເຕີເຊວສ ເອັກສໂປ 2024 ຈະດໍາເນີນການສະແດງ ເປັນເວລາ 8 ວັນ ເລີ່ມແຕ່ວັນທີ 30 ພະຈິກ - 8 ທັນວາ 2024 ທີ່ສູນການຄ້າ ລາວ-ໄອເຕັກ ນະຄອນຫຼວງວຽງຈັນ. ງານດັ່ງກ່າວຈະມີການກະກຽມພື້ນທີ່ການວາງສະແດງຈໍານວນຫຼາຍກວ່າ 55 ຫ້ອງ (ບູດ), 18 ຍີ່ຫໍ້ ແລະ ເພື່ອໃຫ້ຜູ້ປະກອບການພາຍໃນ ແລະ ຕ່າງປະເທດ ໄດ້ມີໂອກາດເຂົ້າມາຮ່ວມງານວາງສະແດງໃນຄັ້ງນີ້. ການຈັດສັນຫ້ອງວາງສະແດງ ໄດ້ແບ່ງອອກເປັນ ດ້ານໃນ ແລະ ດ້ານນອກ ມີ 8 ຂະໜາດ ຄື: 14x14 ແມັດ, 14x12 ແມັດ, 10x20 ແມັດ, 10x14 ແມັດ, 10x10 ແມັດ, 8x6 ແມັດ, 6x9 ແມັດ ແລະ 3x3 ແມັດ. ບັນດາຫ້ອງວາງສະແດງຂະໜາດດັ່ງກ່າວ ເພື່ອຮອງຮັບປະເພດລົດທີ່ເຂົ້າຮ່ວມງານ ແລະ ການວາງສະແດງຜະລິດຕະພັນໂອດັອບ ແລະ ສິນຄ້າທ່າແຮງຂອງ ສປປ ລາວ.
ປະເພດລົດທີ່ເຂົ້າຮ່ວມວາງສະແດງໃນຄັ້ງນີ້ມີ ລົດໄຟຟ້າ EV, ລົດທີ່ປະຢັດພະລັງງານນໍ້າມັນ, ອຸປະກອນປະດັບລົດຍົນ, ບັນດາເຄື່ອງຮັບໃຊ້ທີ່ຕິດພັນກັບພາຫະນະ, ສະຖາບັນການເງິນ ແລະ ທະນາ ຄານທຸລະກິດ. ມາຮອດປັດຈຸບັນ ການລະດົມຫົວໜ່ວຍທຸລະກິດຄ້າຍລົດເຂົ້າຮ່ວມມີຫຼາຍກວ່າ 45 ຫ້ອງວາງສະແດງ ກວມ 80% ຊຶ່ງສໍາລັບ 5 ຄ້າຍລົດທີ່ຈອງຫ້ອງວາງສະແດງກ່ອນຈະມີນາງສາວປະຈໍາຫ້ອງວາງສະແດງໃຫ້ຫ້ອງລະ 2 ທ່ານ; ທາງພື້ນທີ່ດ້ານນອກ ຍັງມີການວາງສະແດງ ຜະລິດຕະພັນໂອດັອບ ແລະ ສິນຄ້າທ່າແຮງ ຂອງລາວ ມາວາງສະແດງຫຼາຍກວ່າ 20 ຫ້ອງວາງສະແດງ ເພື່ອເປັນການໂຄສະນາ ແລະ ສົ່ງເສີມການຊົມໃຊ້ສິນຄ້າລາວ.
ສໍາລັບກິດຈະກໍາພາຍໃນງານວາງສະແດງ ຕະຫຼອດການເປີດງານແມ່ນມີຄື: ສໍາລັບລູກຄ້າທີ່ຈອງລົດພາຍໃນງານ ຈະມີສິດລົງທະບຽນເພື່ອຮັບຄູປ໋ອງລຸ້ນໂຊກ ແຈກຂອງລາງວັນ ຈາກ ໂຕມາສຄອດ ທີ່ປະຈໍາຢູ່ງານ, ບໍ່ວ່າຈະເປັນ ເຄືອບແກ້ວ ໂດຍບໍ່ເສຍຄ່າ 30 ຄັນ, ແຈກລົດໄຟຟ້າ 3 ຄັນ, ໂທລະທັດ Smart TV 5 ໜ່ວຍ, ຕູ້ເຢັນ 9 ໜ່ວຍ, ປຸມເປົ້າ 5.000 ໜ່ວຍ ແລະ ແຈກພວງກະແຈ 500 ອັນ. ນອກນັ້ນ, ຍັງມີບັດສົມມະນາຄຸນຕ່າງໆ ພ້ອມຂອງລາງວັນອື່ນໆ ອີກຢ່າງຫຼວງຫຼາຍ. ພ້ອມນີ້, ກໍຈະມີງານປະກວດ Cosplay, ແຂ່ງຂັນເຕັ້ນ Concept ລົດຍົນ, ຈັດປະກວດເດີນແບບຂອງນ້ອງນ້ອຍ ໃນຫົວຂໍ້ “ຮັກໂລກ” ໂດຍນໍາໃຊ້ລົດໄຟຟ້າ ແລະ ຍັງມີໂປຣໂມຊັນຈາກບັນດາ ຄ້າຍລົດພາຍໃນງານຢ່າງຫຼາກຫຼາຍ ໄວ້ຄອຍບໍລິການດຶງດູດແຂກທີ່ເຂົ້າມາຮ່ວມພາຍໃນງານ. ນອກນັ້ນ, ທາງບໍລິສັດ ຍັງຈັດງານລະດົມທຶນຊ່ວຍເຫຼືອ ຕ້ານໄພໜາວຂອງຊົນນະບົດຫ່າງໄກສອກຫຼີກ ແລະ ເພື່ອໃຫ້ງານມີຄວາມຄຶກຄື້ນ, ດຶງດູດຜູ້ມາທ່ຽວຊົມ ກໍໄດ້ເຊີນສິນລະປິນນັກຮ້ອງພາຍໃນ ແລະ ປະເທດເພື່ອນບ້ານ ມາສ້າງສີສັນ, ມາຫຼິ້ນເກມແຈກຂອງລາງວັນໃຫ້ກັບແຂກທີ່ເຂົ້າມາຮ່ວມຊົມງານທຸກໆມື້.
ທ່ານ ພານະລິນ ສຸວັນນະວົງ ຍັງກ່າວວ່າ: ບໍລິສັດໄດ້ຕັ້ງຄາດໝາຍວ່າຈະມີຜູ້ເຂົ້າຊົມງານເຮົາໃນປີນີ້ ປະມານ 40,000 ຄົນ/ມື້, ມີການສັ່ງຈອງລົດ ພາຍໃນງານ 50 ຄັນຕໍ່ວັນ, ມີການຊື້-ຂາຍສິນຄ້າ ແລະ ບໍລິການ ຄິດເປັນມູນຄ່າທີ່ເພີ່ມຂຶ້ນກວ່າປີທີ່ຜ່ານມາ ແລະ ຫວັງຢ່າງຍິ່ງວ່າ ຈະໄດ້ຮັບການສະໜັບສະໜູນຈາກພາກລັດ, ບັນດາບໍລິສັດ ແລະ ອົງການຈັດຕັ້ງສາກົນ ໃຫ້ຈັດງານດັ່ງກ່າວໄດ້ຢ່າງຄຶກຄື້ນ ແລະ ມີເນື້ອໃນ.
(ຂ່າວ-ພາບ: ສຸກສະຫວັນ)
ຄໍາເຫັນ