 |
ທ່ານ ຄໍາແສນ ສີສະວົງ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ໄດ້ຖະແຫລງຂ່າວຕໍ່ສື່ມວນຊົນ ໃນວັນທີ 9 ກັນຍາ 2025 ນີ້ວ່າ: ສະພາການຄ້າ ແລະ ອຸດ ສາຫະກຳ ແຫ່ງຊາດລາວ ຮ່ວມກັບ ສະພາການຄ້າ ແລະ ອຸດສາຫະກຳ ແຂວງວຽງຈັນ ແລະ ສະພາການຄ້າ ແລະ ອຸດສາຫະກຳ ບັນດາແຂວງທົ່ວປະເທດ ຈະໄດ້ຈັດງານວາງສະແດງຜະລິດຕະພັນລາວ 2025 ໃນລະຫວ່າງວັນທີ 1-8 ຕຸລາ 2025 ຢູ່ສູນການຄ້າລາວ-ໄອເຕັກ ນະຄອນຫລວງວຽງຈັນ. ງານວາງສະແດງໃນຄັ້ງນີ້, ມີຫລາຍຜະລິດຕະພັນທີ່ຜະລິດ ແລະ ປະກອບຢູ່ ສປປ ລາວ, ເຂົ້າຮ່ວມຫລາຍກວ່າ 204 ຫ້ອງວາງສະແດງ, ມີຂະແໜງຜະລິດຕະພັນ ສິນຄ້າ ຈາກ ທັງໝົດ 17 ແຂວງເຂົ້າຮ່ວມ, ມີ 160 ຫົວໜ່ວຍບໍລິສັດ. ໃນນັ້ນ, ປະກອບມີ: ຂະແໜງຜະລິດຕະພັນ ສິນຄ້າທີ່ຈົດກາໝາຍ Made in Laos; ຂະແໜງຜະລິດຕະພັນຫັດຖະກຳແຜນແຜ່, ຜ້າຝ້າຍ, ຜ້າໄໝ; ຂະແໜງຜະລິດຕະພັນ ຫັດຖະ ກຳເຄື່ອງເງິນ; ຂະແໜງຜະລິດຕະພັນເຟີນີເຈີ, ເຄື່ອງຕົບແຕ່ງພາຍໃນເຮືອນ; ຂະແໜງຜະລິດຕະພັນ ອາຫານ ແລະ ເຄື່ອງດື່ມ; ຂະແໜງຜະລິດຕະພັນອຸດສາຫະກຳໜັກ-ເບົາ; ຂະແໜງຜະລິດຕະພັນທ່ອງທ່ຽວ, ເຄື່ອງທີ່ລະນຶກ, ເຄື່ອງໃຊ້ພາຍໃນເຮືອນ; ຂະແໜງຜະລິດຕະພັນ ໜຶ່ງເມືອງໜຶ່ງຜະລິດພັນ (ODOP), ສິນຄ້າຈາກຄອບຄົວຕົວແບບ ແລະ ຂະແໜງຜະລິດຕະພັນສິນຄ້າ ຈາກປະເທດໄທ ແລະ ສປ ຈີນ ຈໍານວນໜຶ່ງ. ນອກຈາກນີ້, ພາຍໃນງານຍັງຈະມີຫລາຍກິດຈະກຳ ເຊັ່ນ: ການວາງສະແດງສິນຄ້າ, ງານປະຊຸມ-ສໍາມະນາຕ່າງໆ, ງານພົບປະທຸລະກິດ, ກິດຈະກຳແຈກຂອງລາງວັນ ແລະ ກິດຈະ ກຳບັນເທີງອື່ນໆ ຕະຫລອດໄລຍະການຈັດງານ.
ງານວາງສະແດງຜະລິດຕະພັນລາວ ຈັດຂຶ້ນຄັ້ງທໍາອິດ ໃນປີ 2011 ຈົນເຖິງປັດຈຸບັນ ແລະ ປີນີ້ ແມ່ນຄົບຮອບ 11 ປີ ເຊິ່ງປີນີ້ແມ່ນສະພາການຄ້າ ແລະ ອຸດສາຫະກຳ ແຂວງວຽງຈັນ ເປັນເຈົ້າພາບຮ່ວມໃນການຈັດງານ ໂດຍສະພາການຄ້າ ແລະ ອຸດສາຫະກຳ ແຂວງວຽງຈັນ ຈະໄດ້ມີການອອກແບບຕົບແຕ່ງ ຫ້ອງວາງສະແດງ ຫລື Booth Pavilion ເປັນພິເສດ ແລະ ສວຍງາມ ເພື່ອສະແດງໃຫ້ເຫັນວິຖີຊີວິດການເປັນຢູ່, ຮີດຄອງປະເພນີ, ວັດທະນະທຳທີ່ສວຍງາມ ແລະ ບັນດາແຫລ່ງທ່ອງທ່ຽວຕ່າງໆ ທາງດ້ານວັດທະນະທຳ ແລະ ທຳມະຊາດ ທີ່ຕິດພັນກັບວິຖີການດຳລົງຊີວິດ ຂອງຊາວແຂວງວຽງຈັນ. ນອກຈາກນັ້ນ, ຍັງໄດ້ເຫັນເຖິງການຂະຫຍາຍຕົວທາງດ້ານເສດກິດ ເປັນຕົ້ນ ເຂດເສດຖະກິດພິເສດ, ສະຖານທີ່ທ່ອງທ່ຽວທາງທຳມະຊາດ ແລະ ວັດທະນະທຳທີ່ສວຍງາມ, ອາຫານການກິນ, ການນຸ່ງຖື ແລະ ຜະລິຕະພັນ ສິນຄ້າອື່ນໆ ທີ່ເປັນທ່າແຮງຂອງ ແຂວງວຽງຈັນ.
ການຈັດງານໃນຄັ້ງນີ້, ເພື່ອຊຸກຍູ້ສົ່ງເສີມໃຫ້ຄົນລາວ ຫັນມານໍາໃຊ້ຜະລິດຕະພັນລາວຫລາຍຂຶ້ນ. ພ້ອມກັນນັ້ນ, ກໍເປັນການປູກລະດົມຂົນຂວາຍ ເພີ່ມທະວີການຜະລິດໃນລະດັບຄອບຄົວໃຫ້ກາຍເປັນສິນຄ້າ ທີ່ສາມາດສ້າງລາຍຮັບໃຫ້ແກ່ຄອບຄົວໄດ້, ທັງເປັນການສົ່ງເສີມການຜະລິດຂະໜາດນ້ອຍ ໃຫ້ກ້າວສູ່ຂະໜາດກາງ ແລະ ກາຍເປັນຂະໜາດໃຫຍ່ ໃຫ້ກາຍເປັນອຸດສາຫະກຳການຜະລິດທັງດ້ານປະລິມານ ແລະ ຄຸນນະພາບທີ່ໄດ້ມາດຕະຖານທີ່ພ້ອມແຂ່ງຂັນກັບຕະຫລາດ ເພື່ອຈຳໜ່າຍຕະ ຫລາດພາຍໃນ ແລະ ສົ່ງອອກສູ່ສາກົນໄດ້. ການຈັດງານໃນຄັ້ງນີ້, ຍັງຈະເປັນການເປີດໂອກາດໃຫ້ບັນ ດາຫົວໜ່ວຍທຸລະກິດທີ່ກຳລັງຊອກຫາຄູ່ຄ້າໃໝ່ໆ ແລະ ຕ້ອງການເປີດຕົວສິນຄ້າ ແລະ ບໍລິການໃໝ່ໆ ຂອງບໍລິສັດ ໃຫ້ບັນດາແຂກທີ່ມາຊົມງານທັງພາຍໃນ ແລະ ສາກົນ ໄດ້ຮັບຊາບ, ທັງເປັນການ ແລກ ປ່ຽນຄວາມຮູ້, ເຕັກນິກດ້ານວິຊາການ, ວິທີການຜະລິດ ເພື່ອນໍາມາພັດທະນາການຜະລິດສິນຄ້າຂອງຕົນ, ທັງເປັນການໂຄສະນາຄວາມອຸດົມສົມບູນທາງດ້ານຮີດຄອງປະເພນີ-ວັດທະນະທຳ, ການຄ້າ-ການລົງທຶນ, ສະຖານທີ່ທ່ອງທ່ຽວ ແລະ ອື່ນໆ ທີ່ເປັນເອກະລັກຂອງແຂວງ ທີ່ເປັນເຈົ້າພາບຮ່ວມຈັດງານ ກໍຄື ແຂວງວຽງຈັນ ຕະຫລອດເຖິງທຸກໆແຂວງທົ່ວປະເທດ ທີ່ເຂົ້າຮ່ວມງານໃນຄັ້ງນີ້ອີກດ້ວຍ.
ງານວາງສະແດງຄັ້ງນີ້, ໄດ້ຮັບການສະໜັບສະໜູນຫລັກຈາກຄູ່ຮ່ວມຍຸດທະສາດ 2 ບໍລິສັດ ຄື: ບໍລິສັດ ປີໂຕຣລ້ຽມ ເທຣດດິງລາວ ມະຫາຊົນ ແລະ ບໍລິສັດເບຍລາວ. ນອກນັ້ນ, ຍັງມີຫລາຍບໍລິສັດ ທີ່ໃຫ້ການສະໜັບສະໜູນງານ ຕື່ມອີກ.
ຂ່າວ-ພາບ: ພູວຽງຄຳ
ຄໍາເຫັນ