 |
ທ່ານ ອຸ່ນຫຼ້າ ສີວັນເພັງ ກ່າວວ່າ: ງານຕະຫຼາດນັດແຮງງານແມ່ນໄດ້ຈັດຂຶ້ນທຸກປີ, ຄັ້ງທໍາອິດຈັດຂຶ້ນໃນປີ 2020 ຊຶ່ງມີ 2 ປີໄດ້ໂຈະຍ້ອນການແຜ່ລະບາດຂອງພະຍາດໂຄວິດ. ການຈັດງານແຕ່ລະຄັ້ງໄດ້ສ້າງໂອກາດອັນດີ ໃຫ້ແກ່ນັກສຶກສາທີ່ກໍາລັງຈະຈົບການສຶກສາ ເພື່ອເປັນການເປີດໂອກາດໃຫ້ນັກສຶກສາ ມຊ ທົ່ວໄປໄດ້ເປີດໂລກະທັດ ແລະ ຮູ້ຈັກບັນດາບໍລິສັດຕ່າງໆ ເພື່ອເປັນເປົ້າໝາຍໃຫ້ຕົນເອງໃນອະນາຄົດ ຊຶ່ງໃນປີນີ້ມີ 43 ບໍລິສັດເຂົ້າຮ່ວມ ຄາດວ່າຈະມີຜູ້ເຂົ້າຮ່ວມຊົມຫຼາຍກວ່າ 15,000 ຄົນ ສະແດງໃຫ້ເຫັນເຖິງຄວາມສຳຄັນ ແລະ ການເຕີບໃຫຍ່ຂະຫຍາຍຕົວຂອງວຽກງານດັ່ງກ່າວນັບມື້ນັບເພີ່ມຂຶ້ນ.
 |
ທ່ານ ຄຳຮຸ່ງ ຈັນທະວົງ ຜູ້ອໍານວຍການສະຖາບັນຂົງຈືຝ່າຍລາວ ກ່າວວ່າ: ສະຖາບັນຂົງຈືຮ່ວມກັບສະພາການຄ້າກວາງຊີຈັດຕະຫຼາດແຮງງານເພື່ອຕອບສະໜອງຄວາມຮຽກຮ້ອງຕ້ອງການຂອງບັນດາບໍລິສັດ ແລະ ນັກສຶກສາທີ່ຮຽນຈົບ ສາມາດຊອກວຽກເຮັດງານທໍາທີ່ດີ ໂດຍສະເພາະແມ່ນບໍລິສັດລາວ-ຈີນດໍາເນີນທຸລະກິດຢູ່ລາວມີຄວາມຕ້ອງການແຮງງານທີ່ໄດ້ພາສາຈີນນັບມື້ເພີ່ມຂຶ້ນ, ສະນັ້ນ, ຖືເປັນເວທີໜຶ່ງ ແລະ ເປັນຂົວຕໍ່ທີ່ດີໃຫ້ບໍລິສັດ ແລະ ຜູ້ຊອກວຽກເຮັດງານທໍາເພື່ອຊ່ວຍພັດທະນາບໍລິສັດທີ່ດໍາເນີນທຸລະກິດຢູ່ລາວໃຫ້ໄດ້ຮັບການພັດທະນາຢ່າງວ່ອງໄວ ແລະ ກິດຈະກຳຄັ້ງນີ້ຈະສາມາດຕອບສະໜອງໃຫ້ຄວາມຕ້ອງການແຮງງານທີ່ມີຄຸນນະພາບສູງຂອງບັນດາບໍລິສັດ.
 |
ທ່ານ ເສີນຫາງ ເລຂາທິການສະພາການຄ້າກວາງຊີປະຈຳ ສປປ ລາວ ກ່າວວ່າ: ນັບແຕ່ຄັ້ງທຳອິດທີ່ຈັດງານວາງສະແດງຕະຫຼາດນັດແຮງງານມາ ພວກເຮົາໄດ້ສ້າງໂອກາດການຈ້າງງານໃຫ້ນັກສຶກສາລາວຫຼາຍກວ່າ2,000 ຄົນ ຊ່ວຍໃຫ້ເຂົາເຈົ້າໄດ້ເຮັດວຽກກັບບໍລິສັດຈີນ ກາຍເປັນກຳລັງແຮງໃນການຊຸກຍູ້ການຮ່ວມມືດ້ານເສດ ຖະກິດລາວ-ຈີນ. ງານວາງສະແດງຄັ້ງນີ້ມີບໍລິສັດຈີນທີ່ດຳເນີນທຸລະກິດມາເປັນເວລາດົນນານເຂົ້າຮ່ວມເຊັ່ນ: ຂົງ ເຂດກະສິກຳ, ຂົນສົ່ງ, ເຕັກໂນໂລຊີພະລັງງານ, ການແພດ ແລະ ອື່ນໆ ຊຶ່ງມີຄວາມຕ້ອງການບັນຈຸຕໍາແໜ່ງງານ ຫຼາຍກວ່າ 1,000 ຕໍາແໜ່ງ ເພື່ອເປີດໂອກາດໃຫ້ນັກສຶກສາທີ່ຮຽນຈົບຊອກຫາວຽກເຮັດງານທຳ. ໃນພິທີ, ຄະນະນໍາໄດ້ໃຫ້ກຽດກົດປຸ່ມເປີດງານຕະຫຼາດນັດຢ່າງເປັນທາງການ, ຈາກນັ້ນ, ທ່ານ ເສິນຈ້າວຫຼິນ ຕາງໜ້າສະພາການຄ້າກວາງຊີໄດ້ມອບທຶນການສຶກສາໃຫ້ແກ່ນັກສຶກສາທີ່ຂາດເຂີນທາງດ້ານທຶນຮອນຈຳນວນ 100 ທຶນ. ໂອກາດນີ້, ທ່ານນາງ ດາລາວອນ ກິດຕິພັນ ໄດ້ມອບໃບຍ້ອງຍໍໃຫ້ສະພາການຄ້າກວາງຊີທີ່ໄດ້ໃຫ້ການສະໜັບສະໜູນທຶນການສຶກສາໃຫ້ນັກຮຽນທຸກຍາກຂາດເຂີນ ແລະ ມອບໂຕະຕັ່ງຫີນໃຫ້ສະຖາບັນຂົງຈຶຈຳນວນໜຶ່ງ.
 |
ຂ່າວ: ພູວັນ
ຄໍາເຫັນ