ງານເທດສະການດອກງີ້ວບານ ຄັ້ງທີ XXI ຈະຈັດຂຶ້ນໃນທ້າຍເດືອນມັງກອນນີ້

ທ່ານ ຄຳຜະຫຍາ ພົມປັນຍາ ຮອງເຈົ້າແຂວງບໍ່ແກ້ວຫົວໜ້າຄະນະຮັບຜິດຊອບຈັດງານໄດ້ຖະແຫຼງຂ່າວກ່ຽວກັບການກະກຽມຈັດງານເທດສະການດອກງີ້ວບານ ຄັ້ງທີ XXI ປະຈຳປີ 2024ຂຶ້ນເມື່ອບໍ່ດົນມານີ້ວ່າ:ການຈັດງານເທດສະການດັ່ງກ່າວ ຖືເປັນປາງບຸນໃຫຍ່ປະເພນີຂອງຊາວແຂວງບໍ່ແກ້ວໄດ້ເລີ່ມຈັດຂຶ້ນຄັ້ງທີ I ໃນປີ 2000 ແລະ ມີຜົນສໍາເລັດໃນການຈັດງານມາແລ້ວ 20 ຄັ້ງ ໂດຍຈັດຂຶ້ນໄລຍະລະດູທີ່ດອກງີ້ວກໍາລັງເບັ່ງບານໃນທ້າຍເດືອນມັງກອນຫາຕົ້ນເດືອນກຸມພາຂອງທຸກໆປີ ໂດຍມີຈຸດປະສົງສໍາຄັນຄື: 1.ເພື່ອເປັນການອະນຸລັກຮັກສາ ແລະ ສົ່ງເສີມວຽກງານດ້ານສິລະປະ, ວັດທະນະທໍາ, ການນຸ່ງຖື, ແບບແຜນວິຖີຊີວິດ, ຮີດຄອງປະເພນີອັນດີງາມຂອງປະຊາຊົນບັນດາເຜົ່າພາຍໃນແຂວງບໍ່ແກ້ວໃຫ້ມີຄວາມຍືນຍົງຄຽງຄູ່ກັບການພັດທະນາທາງດ້ານເສດຖະກິດ ທັງເປັນການເຊື່ອມໂຍງເຂົ້າກັບວັດທະນະທໍາ-ອະລິຍາທໍາອັນດີງາມຂອງຊາດ ແລະ ສາກົນ; 2. ເພື່ອໃຫ້ບັນດາແຂກ ແລະ ນັກທ່ອງທ່ຽວໄດ້ທ່ຽວຊົມ ແລະ ສໍາຜັດກັບຄວາມສວຍສົດງົດງາມທີ່ເປັນເອກະລັກພິເສດຂອງຕົ້ນງີ້ວກໍຄືດອກງີ້ວໄລຍະທີ່ກໍາລັງເບັ່ງບານ, ເຕັມໄປດ້ວຍມົນສະເໜ່ ແລະ ຄຸນຄ່າທາງດ້ານຊັບພະຍາກອນທໍາມະຊາດອັນອຸດົມສົມບູນ, ຊາວລາວໄດ້ມີຄວາມເຊື່ອວ່າດອກງີ້ວທີ່ເບັ່ງບານ ແມ່ນສະແດງເຖິງຄວາມອຸດົມຮັ່ງມີ, ຄວາມອົງອາດກ້າຫານ ແລະ ຄວາມສະຫງ່າງາມ; 3.ເພື່ອເປັນການຊຸກຍູ້, ສົ່ງເສີມ ແລະ ພັດທະນາວຽກງານການທ່ອງທ່ຽວທາງທຳມະຊາດ, ປະຫວັດສາດ, ວັດທະນະທຳ, ຮີດຄອງປະເພນີ, ວິຖີຊີວິດຂອງຊາວແຂວງບໍ່ແກ້ວ ແບບມີສ່ວນຮ່ວມຂອງຊຸມຊົນ ຕິດພັນກັບການສົ່ງເສີມການຜະລິດ, ການຄ້າ ແລະ ການບໍລິການໃຫ້ມີການຂະຫຍາຍຕົວປະກອບສ່ວນເຮັດໃຫ້ເສດຖະກິດຂອງແຂວງ ແລະ ຂອງຊາດໃຫ້ມີບາດກ້າວຂະຫຍາຍຕົວໃໝ່ທັງເປັນການສ້າງລາຍຮັບ ແລະ ແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ; 4. ແນໃສ່ສ້າງຂະບວນການຮອບດ້ານ ເພື່ອຂໍ່ານັບຮັບຕ້ອນວັນບຸນສໍາຄັນຂອງພັກ, ຂອງຊາດ ແລະ ຕິດພັນກັບການເປີດປີທ່ອງທ່ຽວລາວ 2024, ງານສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ວັນສ້າງຕັ້ງເຂດເສດຖະກິດພິເສດສາມຫຼ່ຽມຄໍາ ຄົບຮອບ 17 ປີ ແລະ ກິດຈະກຳຕ່າງໆທີ່ສຳຄັນເຮັດໃຫ້ມີບັນຍາກາດຄຶກຄື້ນມ່ວນຊື່ນ. 
ການຈັດງານຄັ້ງນີ້, ມີຫຼາຍກິດຈະກໍາທີ່ສໍາຄັນປະກອບດ້ວຍ: 1) ການປະກວດນາງສາວດອກງີ້ວບານ ປະຈໍາປີ 2024ເປັນນາງສາວຂອງແຂວງບໍ່ແກ້ວລວມມີ 20 ນາງສາວ ທີ່ຜ່ານການຄັດເລືອກເພື່ອເຂົ້າປະກວດຮອບສຸດທ້າຍໂດຍມີມູນຄ່າລາງວັນເງິນສົດ ແລະ ວັດຖຸທັງໝົດຈໍານວນ 500ລ້ານກວ່າກີບ,ໄລຍະປະກວດຈັດຂຶ້ນໃນຕອນບ່າຍວັນທີ 26-28 ມັງກອນ; 2) ການປະກວດນາງສາວທ່ອງທ່ຽວລາວ ປະຈໍາປີ 2024ຊຶ່ງເປັນນາງສາວຈາກ 18 ແຂວງໃນທົ່ວປະເທດລວມມີ 36 ນາງສາວທີ່ຜ່ານການຄັດເລືອກເພື່ອເຂົ້າປະກວດຮອບສຸດທ້າຍໂດຍມີມູນຄ່າລາງວັນເງິນສົດ ແລະ ວັດຖຸທັງໝົດຈໍານວນ 1 ຕື້ກ່ວາກີບ, ໄລຍະປະກວດແມ່ນຈັດຂຶ້ນໃນຕອນແລງວັນທີ 26-27 ມັງກອນ; 3) ການສະແດງສີລະປະ-ວັນນະຄະດີ ຊຶ່ງປະກອບມີລາຍການສະແດງຈາກພາຍໃນທັງສູນກາງ ແລະ ທ້ອງຖິ່ນ.ນອກນັ້ນ, ຍັງມີລາຍການສະແດງຈາກຕ່າງປະເທດເປັນຕົ້ນ: ສປ ຈີນ, ໄທ ແລະ ມຽນມາກໍານົດເວລາການສະແດງແມ່ນໃນຕອນບ່າຍ ແລະ ກາງຄືນຂອງວັນທີ 26-28 ມັງກອນ; 4) ການແຂ່ງຂັນກິລາກັອຟຊີງຖ້ວຍລາງວັນດອກງີ້ວຄໍາຄັ້ງທີ 1: ການແຂ່ງຂັນດັ່ງກ່າວໄດ້ຈັດຂຶ້ນທີ່ສະໜາມກັອຟສາກົນສາຍພູກີ່ວລົມໃນລະຫວ່າງວັນທີ 19-21 ມັງກອນ ຊຶ່ງມີທີມ (ຫຼື ກວ້ານ) ນັກກິລາຈາກ 9 ປະເທດ ລວມ 18 ທີມ, ມີນັກກິລາທັງໝົດ 100 ກ່ວາຄົນເພື່ອພ້ອມກັນຊີງເງິນລາງວັນປະເພດຄະແນນລວມຂອງທີມ ແລະ ຄະແນນຂອງບຸກຄົນລວມມູນຄ່າລາງວັນຄະນະ ແລະ ບຸກຄົນ ຈໍານວນ 3.750 ລ້ານກີບ.ນອກນັ້ນ, ຍັງມີລາງວັນໂຮນອິນວັນ ຫຼື ເຂົ້າຂຸມໄມ້ດຽວແມ່ນ 1.500ລ້ານກີບ ພ້ອມດ້ວຍບັດສະມາຊິກຕະຫຼອດຊີວິດມູນຄ່າ 1.500 ລ້ານກີບ.; 5) ການວາງສະແດງ ແລະ ຈໍາໜ່າຍສິນຄ້າ ເພື່ອເປັນການສົ່ງເສີມການຄ້າ, ການບໍລິການ ກໍຄືການສ້າງລາຍຮັບໃຫ້ປະຊາຊົນ ແລະ ຜູ້ປະກອບ
ການ, ໃນງານຍັງໄດ້ຈັດສັນເຂດວາງສະແດງ ແລະ ຈໍາໜ່າຍສິນຄ້າຈໍານວນ 400 ກວ່າຮ້ານໂດຍເລີ່ມແຕ່ວັນທີ 21-28 ມັງກອນ; 6) ການແຂ່ງຂັນກິລາຕີມວຍ: ຊຶ່ງກິລາຕີມວຍ ແມ່ນກິລາປະເພດໜຶ່ງທີ່ໄດ້ຮັບຄວາມນິຍົມຂອງມວນຊົນຊຶ່ງເປັນປະເພດມວຍລາຍລາວ-ມວຍໄທປະກອບມີ 9 ຄູ່ (ຊາຍ 7 ຄູ່, ຍິງ 2 ຄູ່) ມີທັງຄົນລາວ, ໄທ, ຍີ່ປຸ່ນ ແລະ ອີຣານໂດຍຈະຈັດຂຶ້ນໃນຕອນແລງຂອງວັນທີ 28 ມັງກອນ, ພິເສດມີບົວຂາວ ບັນຊາເມກນັກມວຍຊື່ດັງຂອງໄທ ກໍຈະມາຮ່ວມເປັນກໍາລັງໃຈໃນການແຂ່ງຂັນຕີມວຍຄັ້ງນີ້; 7) ການສະແດງບິນໂດນເພື່ອສ້າງສີສັນ ແລະ ຄວາມຕື່ນເຕັ້ນພາຍໃນງານໄດ້ມີການສະແດງບິນໂດນ ຖືໄດ້ວ່າເປັນກິດຈະກໍາໃໝ່ໂດຍນໍາໃຊ້ໂດນຈໍານວນ 1.000 ລໍາ ບິນຂຶ້ນທ້ອງຟ້າ ແລະ ເປີດດອກໄຟປະກອບເປັນຮູບພາບຕ່າງໆ ຊຶ່ງຈະສະແດງຈໍານວນສອງຄັ້ງຄື: ໃນຕອນແລງວັນທີ 26-27 ມັງກອນ.ນອກນັ້ນ, ຍັງມີການສະແດງຈູດບັ້ງໄຟດອກ ແລະ ປ່ອຍໂຄມໄຟເພື່ອເຮັດໃຫ້ງານມີສີສັນທີ່ສວຍງາມ. ການຈູດບັ້ງໄຟດອກຈະໄດ້ຈູດທັງກາງເວັນ ແລະ ກາງຄືນຂອງວັນທີ 26-28 ມັງກອນ.ສໍາລັບການປ່ອຍໂຄມໄຟແມ່ນຈັດຂຶ້ນໃນຄໍ່າຄືນຂອງມື້ສຸດທ້າຍໃນວັນທີ 28 ມັງກອນ.ນອກຈາກ 8 ກິດຈະກໍາຫຼັກທີ່ກ່າວມາຂ້າງເທິງແລ້ວໃນງານຈະໄດ້ມີການຈັດກອງປະຊຸມ 2 ກອງປະຊຸມຄື: ກອງປະຊຸມສົ່ງເສີມການລົງທຶນ ແລະ ການທ່ອງທ່ຽວ ແລະ ກອງປະຊຸມປະຈໍາປີ 2024 ຂອງສະມາຄົມເມືອງທ່ອງທ່ຽວມິດຕະພາບສາກົນຄຸນໝິງ.ມາຮອດປັດຈຸບັນ, ການກະກຽມດ້ານຕ່າງໆມີພ້ອມຮອບດ້ານ ແລະ ຈະໄດ້ດໍາເນີນການເປີດງານຢ່າງເປັນທາງການໃນຕອນບ່າຍຂອງວັນທີ 26 ມັງກອນ ແລະຈະດໍາເນີນໄປຮອດວັນທີ 28 ມັງກອນຈຶ່ງຈະສໍາເລັດ. 
ທ່ານຄຳຜະຫຍາພົມປັນຍາໄດ້ຕາງໜ້າຄະນະຮັບຜິດຊອບຈັດງານກໍຄືອົງການປົກຄອງແຂວງ, ເຂດເສດຖະກິດພິເສດສາມຫຼ່ຽມຄໍາ ຂໍເຊີນບັນດາທ່ານແຂກພາຍໃນ ແລະ ຕ່າງປະເທດ, ພະນັກງານ, ທະຫານ-ຕຳຫຼວດ, ນັກທຸລະກິດ, ພໍ່ຄ້າຊາວຂາຍ, ຕະຫຼອດຮອດປະຊາຊົນລາວບັນດາເຜົ່າໃນທົ່ວປະເທດ ພ້ອມດ້ວຍມວນຊົນເຂົ້າຮ່ວມງານໃນຄັ້ງນີ້ ໃຫ້ມາທ່ຽວຊົມພາຍໃນງານດ້ວຍບັນຍາກາດເບີກບານມ່ວນຊື່ນ ແລະ ເປັນຂະບວນຟົດຟື້ນ.(ຂ່າວ: ວັນເພັງ, ຂໍ້ມູນ-ພາບ: ແຂວງບໍ່ແກ້ວ)