ນວ ກວດກາຄືນກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ

ກອງປະຊຸມອົງການປົກຄອງ ນະຄອນຫຼວງວຽງຈັນ (ນວ) ຄັ້ງທີ 28 ປະຈໍາເດືອນກັນຍາ 2023 ຈັດຂຶ້ນໃນວັນທີ 28 ກັນຍາ ຜ່ານມາ ທີ່ຫ້ອງວ່າການປົກຄອງ ນວ ໂດຍເປັນປະທານຂອງທ່ານ ອາດສະພັງທອງ ສີພັນດອນ ກຳມະການສູນກາງພັກ ເຈົ້າຄອງນະຄອນຫຼວງວຽງຈັນ ມີບັນດາທ່ານຮອງເຈົ້າຄອງ ແລະ ສະມາຊິກອົງການປົກຄອງນະຄອນຫຼວງເຂົ້າຮ່ວມ. 
ກອງປະຊຸມຄັ້ງນີ້ ເປັນກອງປະຊຸມທົບທວນ ກວດກາຄືນກ່ຽວກັບການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ ໃນໄລຍະ 1 ເດືອນຜ່ານມາ ໂດຍສະເພາະແມ່ນການຕີລາຄາຄືນໃນໄລຍະ 3 ເດືອນຜ່ານມາ ຄືເດືອນມິຖຸນາ ຫາ ເດືອນກັນຍາ ຊຶ່ງສາມາດປະຕິບັດແຕ່ລະຄາດໝາຍໄດ້ຈັກເປີເຊັນ ທີ່ໄດ້ວາງອອກໃນ 6 ເດືອນຕົ້ນປີ ຍົກໃຫ້ເຫັນດ້ານດີ ດ້ານອ່ອນ ຂໍ້ຄົງຄ້າງ ແລະ ວິທີແກ້ໄຂ ເພື່ອຈະສືບຕໍ່ປະຕິບັດ ໃນໄລຍະ 3 ເດືອນທ້າຍປີ 2023 ເພື່ອເປັນການປະຕິບັດໂຄງການດໍາເນີນງານຂອງນະຄອນ ຫຼວງ ທີ່ໄດ້ຮັບຮອງເອົາໃນກອງປະຊຸມຄົບຄະນະກາງສະໄໝ ຂອງອົງຄະນະພັກ ນວ ສະໄໝທີ VII ຮອດປີ 2025 ຊຶ່ງຕ້ອງໄດ້ພ້ອມກັນຊອກຫາວິທີແກ້ໄຂຄວາມຫຍຸ້ງຍາກທາງດ້ານເສດຖະກິດ-ສັງຄົມ ຕິດພັນກັບການແກ້ໄຂ 2 ວາລະແຫ່ງຊາດ ທີ່ຈະໄດ້ສະຫຼຸບໃນທ້າຍປີ 2023 ແລະ ການກະກຽມເປັນເຈົ້າພາບກອງປະຊຸມສຸດຍອດອາຊຽນ ການເປັນເຈົ້າພາບກອງປະຊຸມເຈົ້າຄອງນະຄອນຫຼວງອາຊຽນ ແລະ ການກະກຽມເປີດປີທ່ອງທ່ຽວ ປີ 2024 ໃຫ້ປະກົດຜົນເປັນຈິງ.
ກອງປະຊຸມດຳເນີນເປັນເວລາ 1 ວັນ ປະກອບມີ 8 ເນື້ອໃນຫຼັກ ຊຶ່ງບັນດາເນື້ອໃນທີ່ຈະຜ່ານໃນກອງປະຊູມຄັ້ງນີ້ ສຸດທີ່ມີຄວາມໝາຍ ມີຄວາມສຳຄັນຍິ່ງໃນການສະຫຼຸບຕີລາຄາ ຢັ້ງຢືນຄືນການກວດກາຜົນໄດ້ຮັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນ 3 ເດືອນຜ່ານມາ ພ້ອມກັບວຽກງານພົ້ນເດັ່ນທີ່ປີ່ນອ້ອມຈຳນວນໜຶ່ງ ແລະ ແຜນວຽກຈຸດສຸມ 3 ເດືອນທ້າຍປີ 2023 ທີ່ຈະມາເຖິງນີ້ ທັງເປັນການຊຸກຍູ້ຂະບວນການໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນ ອົງຄະນະພັກ ນວ ແລະ ທັງເປັນການກະກຽມບັ້ນດໍາເນີນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກ ນວ ໃນປີ 2025. 
(ຂ່າວ-ພາບ: ວຽງຈັນໃໝ່)