ທ່ານນາງ ຕຽງຄໍາ ສີປະເສີດ ປະທານໜ່ວຍ ແມ່ຍິງໜັງສືພິມປະຊາຊົນ ໄດ້ຜ່ານບົດລາຍງານຂອງໜ່ວຍແມ່ຍິງໜັງສືພິມປະຊາຊົນຕະຫຼອດໄລຍະ 5 ປີ (2019-2024) ຜ່ານມາ ແລະ ຄາດໝາຍສູ້ຊົນໃນ 5 ປີ ຕໍ່ໜ້າ (2024-2029) ວ່າ: ຄະນະໜ່ວຍແມ່ຍິງໜັງສຶພິມປະຊາຊົນ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ເອື້ອຍນ້ອງແມ່ຍິງມີຄວາມອຸ່ນອ່ຽນທຸ່ນທ່ຽງໃນການປະຕິບັດໜ້າທີ່ວຽກງານ, ມີຄຸນທາດການເມືອງ-ຄຸນສົມບັດສິນທຳປະຕິວັດ, ມີຄວາມເຊື່ອໝັ້ນຕໍ່ການນຳພາຂອງຄະນະພັກ, ຄະນະບັນນາທິການກໍຄື: ຄະນະສະຫະພັນແມ່ຍິງສູນກາງວາງອອກ, ເພີ່ມທະວີສຶກສາອົບ ຮົມການເມືອງ-ແນວຄິດໃຫ້ສະມາຊິກແມ່ຍິງ ດ້ວຍການເຂົ້າຮ່ວມຝຶກອົບຮົມໃນຫົວຂໍ້ຕ່າງໆ; ເຊື່ອມຊຶມມະຕິ ແລະ ເອກະສານສຳຄັນຕ່າງໆຂອງພັກ-ລັດ ຊຶ່ງມີພະນັກງານເຂົ້າຮ່ວມທັງ ໝົດ 119 ຄົນ ຍິງ 51 ຄົນເທົ່າກັບ 42,8%; ຮ່ວມຝຶກອົບຮົມໄລຍະສັ້ນຢູ່ພາຍໃນ ແລະ ຕ່າງປະເທດ, ວຽກງານສື່ອອນລາຍ, ຂຽນຂ່າວ, ເຜີຍແຜ່ກ່ຽວກັບພະຍາດໂຄວິດ-19, ກວດກາ, ການລ້ຽງລູກດ້ວຍນ້ຳນົມແມ່, ຈໍລະຈອນເອກະສານ ແລະ ອື່ນໆ ມີຜູ້ເຂົ້າຮ່ວມທັງໝົດ 36 ຄົນ, ຍິງ 16 ຄົນ ກວມ 44%; 3 ອົງການຈັດຕັ້ງມະຫາຊົນໄດ້ຮ່ວມກັນອອກແຮງງານຕ້ອນຮັບວັນສຳຄັນຕ່າງໆ 26 ຄັ້ງ 632 ເທື່ອຄົນ ຍິງ 328 ເທື່ອຄົນກວມ 61% ແລະ ກິດຈະກໍາໃນວັນສໍາຄັນ ອື່ນໆ; ແມ່ຍິງໜັງສຶພິມປະຊາຊົນ ຍັງໄດ້ປະ ກອບສ່ວນວຽກງານສື່ມວນຊົນລົງເກັບກຳຂ່າວແຕ່ເໜືອຮອດໃຕ້ຄຽງຄູ່ກັບເພດຊາຍ, ຕະຫຼອດຮອດການຜະລິດຂອງປະຊາຊົນ ເພື່ອນໍາມາໂຄສະນາເຜີຍແຜ່ລົງໜັງສືພິມເຈ້ຍ, ເວັບໄຊ, ເຟສບຸກ ຊຶ່ງສະແດງອອກຄື: ການປ່ອຍຂ່າວທາງເວັບໄຊ ແລະ ເຟສບຸກ ສະເລ່ຍປະມານ 20-25 ຂ່າວຕໍ່ມື້ ເຮັດໃຫ້ມີຜູ້ເຂົ້າເບິ່ງເພີ່ມຂຶ້ນ. ມາຮອດປັດຈຸບັນສາມາດສະຫຼຸບມີຜູ້ເຂົ້າເບິ່ງເວັບໄຊທັງໝົດ 21.701.592 ເທື່ອຄົນສະເລ່ຍ 2.600 ກວ່າຄົນຕໍ່ມື້, ເຟສບຸກມີຜູ້ເຂົ້າຕິດຕາມ 25.724 ເທື່ອຄົນ, ຜູ້ມີສ່ວນຮ່ວມ 58.587ຄົນ ສະເລ່ຍ 445 ເທື່ອຄົນຕໍ່ມື້.
ປັດຈຸບັນໜ່ວຍແມ່ ຍິງໜັງສືພິມປະຊາຊົນ ມີສະມາຊິກທັງໝົດ 25 ຄົນ, ບໍານານ 7 ຄົນ ເປັນສະມາຊິກພັກສົມບູນ 15 ຄົນ, ກຽມຂຶ້ນສຳຮອງ 1 ຄົນກວມ 48,38% ຂອງສະມາຊິກພັກທັງໝົດ 31 ຄົນ. ໃນໄລຍະ 5 ປີຜ່ານມາໜັງສືພິມປະຊາຊົນລາຍວັນໄດ້ອອກຂ່າວ-ອອກບົດສະເລ່ຍລວມມີ 50 ພັນກວ່າຂ່າວ, ມີ 25 ພັນກວ່າບົດ, ຮູບ 25 ພັນກວ່າແຜ່ນ ສະເລ່ຍ 22 ສະບັບ/ເດືອນ, 1 ສະບັບ 15-20 ຂ່າວ, 8 ບົດ ແລະ ຮູບ 20 ກວ່າແຜ່ນ/ມື້ /ພາຍໃນ, ຂ່າວຕ່າງປະເທດ 5 ຂ່າວ, 1 ບົດ/ມື້ ສະເລ່ຍ 5 ປີມີ 6.600 ຂ່າວ, ມີ 1.200 ບົດຮູບ 5 ພັນກວ່າແຜ່ນ. (ຂ່າວ ແລະ ບົດ, ຮູບທັງໝົດແມ່ນລວມທັງໜັງສືພິມ, ເວັບໄຊ, ເຟສບຸກ). ປັດຈຸບັນໜັງສືພິມປະຊາຊົນລາຍວັນພິມປົກກະຕິ 12 ໜ້າ, ໃນນັ້ນ 7 ໜ້າແມ່ນເນື້ອໃນສ່ວນອີກ 5 ໜ້າ ແມ່ນໂຄສະນາເພື່ອສ້າງລາຍຮັບໃຫ້ສຳນັກງານ, ເນື່ອງຈາກວ່າໜັງສືພິມປະຊາຊົນຕ້ອງກຸ້ມຕົນເອງດ້ານລາຍຈ່າຍ ໂດຍມີຍອດພິມຈຳໜ່າຍ 1.200 ສະບັບຕໍ່ວັນ.ໄລຍະຜ່ານມາ ເອື້ອຍນ້ອງແມ່ຍິງໄດ້ຮັບຫຼຽນໄຊແຮງງານຊັ້ນ II ມີ 16 ໜ່ວຍ, ຫຼຽນໄຊແຮງງານຊັ້ນ III ມີ 9 ໜ່ວຍ, ຫຼຽນກາ 7 ໜ່ວຍ ແລະ ໃບຍ້ອງຍໍລັດຖະບານຈຳນວນ ໜຶ່ງໃນຂະບານການຕ່າງຂອງພັກ, ຂອງຊາດ. ກອງປະຊຸມໄດ້ປ່ອນບັດຄັດເລືອກເອົາຄະນະໜ່ວຍແມ່ຍິງ ຊຸດໃໝ່ຈໍານວນ 3 ທ່ານ ກອງປະຊຸມຄັ້ງປະຖົມມະລຶກໄດ້ເຫັນດີເປັນເອກະພາບເລືອກເອົາ ທ່ານນາງ ມາລາຄອນ ອູບຄໍາ ເປັນປະທານ, ທ່ານນາງ ພູວັນ ແສງມະນີ ເປັນຮອງ ທັງເປັນປະທານກວດກາ ແລະ ທ່ານນາງ ຍຸພິນທອງ ເທບບູລີ ເປັນຄະນະ.
ໂອກາດດັ່ງກ່າວ, ທ່ານ ນາງ ພວງມາລີ ອັກຄະມຸນຕີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນ ງານທີ່ເອື້ອຍນ້ອງແມ່ຍິງ ຍາດມາໄດ້ໃນໄລຍະຜ່ານມາ ພ້ອມຮຽກຮ້ອງໃຫ້ເອົາໃຈໃສ່ວຽກງານວິຊາສະເພາະການຄົ້ນຄວ້າ, ວິເຄາະ, ວິໄຈ ບັນດາເນື້ອໃນຕ່າງໆ ທີ່ນອນຢູ່ໃນແນວທາງການເມືອງຂອງພັກ ໃນມະຕິຄໍາສັ່ງຕ່າງໆຂອງສູນກາງພັກ ເພື່ອຫັນມາຂຽນເປັນບົດ ເປັນຂ່າວ ບົດຄວາມ ບົດນໍາ ລົງໃນໜັງສືພິມປະຊາ ຊົນໃຫ້ດີຂຶ້ນກວ່າເກົ່າ; ເພີ່ມທະວີໃນການຮຽນຮູ້ ເລືອກເຟັ້ນເອົາສິ່ງທີ່ດີ ສິ່ງທີ່ໃໝ່ໆທີ່ມີຄວາມກ້າວໜ້າເພື່ອມາພັດທະນາຕົນເອງ; ເອົາໃຈ ໃສ່ຝຶກຝົນຫຼໍ່ຫຼອມຕົນເອງທາງດ້ານການ ເມືອງ-ແນວຄິດໃຫ້ໜັກແໜ້ນ, ພັດທະນາຕົນເອງທາງດ້ານຄວາມຮູ້ ຄວາມສາມາດ ເພື່ອໃຫ້ຫຼ້ອນໜ້າທີ່ຂອງຕົນທີ່ໄດ້ຮັບມອບໝາຍນັ້ນ; ຕໍ່ກັບຄະນະໜ່ວຍແມ່ ຍິງຊຸດໃໝ່ຈະຕ້ອງໄດ້ເອົາໃຈໃສ່ຄົ້ນຄວ້າກໍາແໜ້ນ ແລະ ນໍາເອົາເນື້ອຈິດໃຈກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງໃນຕໍ່ໜ້າ.
ຂ່າວ-ພາບ: ຍຸພິນທອງ
ຄໍາເຫັນ