ໜ່ວຍພັກດ່ານສາກົນຂົວມິດຕະພາບ 3 ປະເມີນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ

ກອງປະຊຸມດໍາເນີນຊີວິດການເມືອງ ປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ຂອງໜ່ວຍພັກບໍລິຫານດ່ານສາກົນຂົວມິດຕະພາບ 3 ໄດ້ຈັດຂຶ້ນໃນວັນທີ 27 ທັນວາ ນີ້ ໂດຍການເປັນປະທານຮ່ວມຂອງ ສະຫາຍ ພັອ ພົມມາ ເດດຂຸນຟອງ ເລຂາຄະນະພັກຮາກຖານດ່ານສາກົນຂົວມິດຕະພາບ 3 ແລະ ສະຫາຍ ສີສະຫວັນ ໂຄດຕະວົງ ເລຂາໜ່ວຍພັກບໍລິຫານດ່ານສາກົນຂົວມິດຕະພາບ 3 ພ້ອມດ້ວຍແຂກຖືກເຊີນກ່ຽວຂ້ອງເຂົ້າຮ່ວມ.
    ໃນພິທີ ສະຫາຍ ສີສະຫວັນ ໂຄດຕະວົງ ໄດ້ກ່າວເປີດກອງປະຊຸມຢ່າງເປັນທາງການ. ຈາກນັ້ນ, ຕາງໜ້າ ຄະນະຈັດຕັ້ງແຂວງໄດ້ຜ່ານເອກະສານຄຸນທາດການເມືອງ, ຄຸນສົມບັດສິນທໍາປະຕິວັດ, ຄໍາສັ່ງຂອງກົມການເມືອງສູນກາງພັກເລກທີ 1/ກມສພ, ລົງວັນທີ 3 ມັງກອນ 2018, ຄໍາແນະນໍາຂອງຄະນະປະຈໍາພັກແຂວງ ເລກທີ 7/ ຄປຈ.ຄມ, ລົງວັນທີ 21 ມິຖຸນາ 2021, ຜ່ານ 7 ໜ້າທີ່ ແລະ 11 ຂໍ້ຫ້າມຂອງສະມາຊິກພັກ. ພ້ອມນັ້ນ, ຄະນະໜ່ວຍພັກ, ສະມາຊິກພັກໄດ້ຜ່ານໃບສໍາຫຼວດຕົນເອງ ພ້ອມທັງປະກອບຄໍາຄິດເຫັນຊຶ່ງກັນ ແລະ ກັນ. ຈາກນັ້ນ ລວມຄະແນນປິດລັບ ພ້ອມທັງຜ່ານຮ່າງບົດສະຫຼຸບໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ແລະ ທິດທາງແຜນການປີ 2024. 
    ໃນວາລະກອງປະຊຸມບັນດາສະຫາຍສະມາຊິກພັກໄດ້ປະກອບຄໍາຄິດເຫັນໃສ່ຮ່າງບົດສະຫຼຸບດັ່ງກ່າວຢ່າງກົງໄປກົງມາ, ພາວະວິໄສ, ບົນຈິດໃຈເສີມຂະຫຍາຍຄວາມສາມັກຄີ, ປາສະຈາກແນວຄິດອະຄະຕິໂຄ່ນລົ້ມໂຈມຕີ, ມີຄວາມຈິງໃຈກໍ່ສ້າງຊ່ວຍເຫຼືອຊຶ່ງກັນ ແລະ ກັນ.
ຂ່າວ: ແດງສະຫວັດ ແສນພານິດ, ພາບ: ກອງຄໍາ ລໍອິນສານ