ໜ່ວຍພັກອຸດສາຫະກຳ ແລະ ການຄ້ານະຄອນປາກເຊສຳເລັດກອງປະຊຸມໃຫຍ່ຄັ້ງ III

ໜ່ວຍພັກຫ້ອງການ ອຸດສາຫະກໍາ ແລະ ການຄ້າ ນະຄອນປາກເຊໄດ້ສໍາເລັດກອງປະຊຸມໃຫຍ່ຄັ້ງທີ III ເມື່ອບໍ່ດົນມານີ້ ທີ່ຫ້ອງປະຊຸມຂອງຫອງວ່າການນະຄອນ ໂດຍໃຫ້ກຽດເຂົ້າຮ່ວມເປັນປະທານຂອງສະຫາຍ ບົວລີ ເພັດສົງຄາມ ຄະນະປະຈຳພັກແຂວງ ເລຂາພັກນະຄອນ ເຈົ້ານະຄອນປາກເຊ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ
       ໃນກອງປະຊຸມ, ສະຫາຍ ສັນຕິສຸກ ອໍແກ້ວເຕໂຊ ຫົວໜ້າຫ້ອງການອຸດສາຫະກໍາ ແລະ ການຄ້າ ນະຄອນໄດ້ຜ່ານບົດລາຍງານການເມືອງທັງສອງພາກວ່າ: ໜ່ວຍພັກໄດ້ຖືເອົາວຽກງານການເມືອງເປັນວຽກງານສຳຄັນແຖວໜ້າ, ເປັນວຽກທີ່ຕ້ອງໄດ້ເຮັດເປັນປົກກະຕິ ແລະ ສອດຫ້ອຍເຂົ້າໃນທຸກຂົງເຂດວຽກງານ ໂດຍໄດ້ມີການເຜີຍແຜ່ເຊື່ອມຊືມແນວທາງນະໂຍບາຍຂອງພັກ, ມະຕິຄໍາສັ່ງ, ກົດລະບຽບຂອງພັກ, ຂໍ້ກໍານົດ, ກົດໜາຍຂອງລັດໃນແຕ່ລະໄລຍະເປັນປົກະຕິ ດ້ວຍຮູບການເຂົ້າຮ່ວມຮັບຟັງປາຖະກະຖາເລົ່າມູນເຊື້ອຂອງຊາດ, ຂອງພັກ, ວັນຄ້າຍວັນເກີດຂອງທ່ານຜູ້ນຳ ແລະ ເອກະ ສານມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ສະໄໜທີ VIII ຂອງອົງ ຄະນະພັກແຂວງ, ມະຕິກອງປະຊຸມໃຫຍ່ສະໄໜທີ VII ຂອງອົງຄະນະພັກນະຄອນ ໃຫ້ແກ່ສະມາຊິກພັກ, ພະນັກງານ ແລະ ຫົວໜ່ວຍທຸລະກິດ ໄດ້ທັງໝົດ 36 ຄັ້ງ, ມີຜູ້ເຂົ້າຮ່ວມຮັບຟັງທັງໝົດ 2.340 ເທື່ອຄົນ ຍິງ 1.260 ເທື່ອຄົນ. ບົນພື້ນຖານຄືດັ່ງກ່າວ ຈິ່ງເຮັດໃຫ້ທຸກຊັ້ນຄົນພາຍໃນນະຄອນມີຄວາມເຊື່ອໝັ້ນຕໍ່ການນຳພາຂອງພັກ, ມີສະຕິຕື່ນຕົວທາງດ້ານການເມືອງ, ມີສະຕິເຄົາລົບ ແລະ ຈັດຕັ້ງປະຕິບັດກົດໝາຍ, ທັງມີຄວາມສາມັກຄີປອງດອງເປັນປຶກແຜ່ນ.
     ໃນກອງປະຊຸມ ຜູ້ເຂົ້າຮ່ວມໄດ້ໃຊ້ສິດປະຊາທິປະໄຕປ່ອຍບັດເອົາຄະນະພັກຊຸດໃໝ່, ຜ່ານການປ່ອນບັດ ສາມາດເລືອກໄດ້ ສະຫາຍ ສັນຕິສຸກ ອໍແກ້ວເຕໂຊ ເປັນເລຂາ, ສະຫາຍ ທອງສູນ ພອນວິໄລ ຮອງເລຂາ ທັງເປັນປະທານກວດກາໜ່ວຍພັກ.
    (ຂ່າວ: ຖວທ ນະຄອນ)