 |
ກອງປະຊຸມໄດ້ດໍາເນີນພາຍໃຕ້ຄໍາຂວັນ: }ຍົກສູງບົດບາດການນໍາພາທີ່ເຂັ້ມແຂງຂອງພັກ, ເປັນເຈົ້າການສ້າງການຫັນປ່ຽນຢ່າງແຂງແຮງ ເລິກເຊິ່ງ ໃນການປະຕິບັດວຽກງານຈັດຕັ້ງ ແລະ ການປົກຄອງໃຫ້ຖືກຕ້ອງ ທັນສະໄໝ ແລະ ວ່ອງໄວ~.
ໃນກອງປະຊຸມ, ສະຫາຍ ນາງ ສີໃສ ລືເດດມູນສອນ ໄດ້ມີຄຳເຫັນກ່າວເປີດກອງປະຊຸມ ຊຶ່ງກອງປະຊຸມຈະໄດ້ພ້ອມກັນຄົ້ນຄວ້າ, ທົບທວນຕີລາຄາຄືນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ແລະ XII ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, XII ແລະ ມະຕິກອງປະຊຸມໃຫຍ່ສະມາຊິກພັກ ຄັ້ງທີ IX ຂອງອົງຄະນະພັກ ຄະນະຈັດຕັ້ງສູນກາງພັກ ໃຫ້ເລິກເຊິ່ງຮອບດ້ານ, ພາວະວິໄສ ເຫັນໄດ້ດ້ານດີ-ຜົນງານ, ຖືກກັບຄວາມເປັນຈິງ ແລະ ມີຄວາມເປັນເອກະພາບສູງຕໍ່ກັບໝາກຜົນທີ່ຍາດມາໄດ້, ດ້ານອ່ອນ-ຂໍ້ຄົງຄ້າງ ທີ່ຈະຕ້ອງໄດ້ສຸມໃສ່ປັບປຸງແກ້ໄຂໃຫ້ມີການຫັນປ່ຽນເປັນຮູບປະທຳ, ຊອກຫາສາເຫດ ແລະ ບົດຮຽນໃນການນໍາພາປະຕິບັດໜ້າທີ່ການເມືອງໃນໄລຍະ 5 ປີຜ່ານມາ ແລະ ຄົ້ນຄວ້າປະກອບຄໍາເຫັນໃສ່ທິດທາງແຜນການ ແລະ ແຜນພັດທະນາວຽກງານຈັດຕັ້ງ ແລະ ການປົກຄອງ ແຕ່ນີ້ຮອດປີ 2030 ຊຶ່ງພາລະບົດບາດ ໜ້າທີ່ ຂອງຄະນະຈັດຕັ້ງສູນກາງພັກ ມາຮອດປັດຈຸບັນໄດ້ກວມເອົາວຽກງານຈັດຕັ້ງ ແລະ ວຽກງານປົກຄອງ ຊຶ່ງເປັນພາລະບົດບາດທີ່ກວ້າງ ແລະ ສໍາຄັນ ໃນການເປັນເສນາທິການໃຫ້ພັກ ແລະ ລັດຖະບານ.
ໃນວາລະກອງປະຊຸມ, ສະຫາຍ ວິໄລວັນ ບຸດດາຄໍາ ກຳມະການສູນກາງພັກ ຮອງເລຂາ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານຮ່າງລາຍງານການເມືອງ ຂອງຄະນະບໍລິຫານງານພັກ ຄະນະຈັດຕັ້ງສູນກາງພັກ ສະໄໝທີ IX, ສະຫາຍ ດອນ ໄພວົງ ກໍາມະການຄະນະພັກ ຮອງຫົວໜ້າຄະນະຈັດຕັ້ງສູນກາງພັກຜ່ານຮ່າງແຜນພັດທະນາວຽກງານຈັດຕັ້ງ ແລະ ການປົກຄອງ 5 ປີຜ່ານມາ (2021-2025) ແລະ ທິດທາງ 5 ປີໃນຕໍ່ໜ້າ (2026-2030). ພ້ອມນີ້ ຜູ້ເຂົ້າຮ່ວມຍັງໄດ້ປະກອບຄຳເຫັນກ່ຽວກັບການເປັນເສນາທິການໃຫ້ຄະນະພັກໃນວຽກງານກໍ່ສ້າງພັກ, ພະນັກງານ ແລະ ປັບປຸງກົງຈັກການຈັດຕັ້ງພາຍໃນອົງຄະນະພັກ ຄະນະຈັດຕັ້ງສູນກາງພັກ, ການເປັນເສນາທິການໃຫ້ຄະນະພັກໃນການສ້າງ ແລະ ປັບປຸງນິຕິກໍາ, ການເປັນເສນາທິການໃຫ້ຄະນະພັກໃນການເຕົ້າໂຮມຄວາມສາມັກຄີຂອງ 3 ອົງການຈັດຕັ້ງມະຫາຊົນ ຄະນະຈັດຕັ້ງສູນກາງພັກ ຊຶ່ງການປະກອບຄຳເຫັນດັ່ງກ່າວ ລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງ, ຄາດໝາຍສູ້ຊົນ ແລະ ວຽກງານຮອບດ້ານ ຂອງການນໍາພາໃນໄລຍະຜ່ານມາ.
ກອງປະຊຸມທີ່ມີຄວາມໝາຍສໍາຄັນນີ້ ຜູ້ແທນຈະໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານພັກ ຄະນະຈັດຕັ້ງສູນກາງພັກຊຸດໃໝ່ ສະໄໝທີ X ເພື່ອສືບຕໍ່ນໍາພາພາລະບົດບາດ ໜ້າທີ່ການເມືອງ ໃນໄລຍະໃໝ່ ໃຫ້ມີຜົນສໍາເລັດໃໝ່ ຢ່າງບໍ່ຢຸດຢັ້ງ.
(ຂ່າວ: ແສງຈັນ)
ຄໍາເຫັນ