 |
ກອງປະຊຸມໄດ້ດໍາເນີນພາຍໃຕ້ຄໍາຂວັນ: (ຍົກສູງບົດບາດການນໍາພາທີ່ເຂັ້ມແຂງຂອງພັກ, ເປັນເຈົ້າການສ້າງການຫັນປ່ຽນຢ່າງແຂງແຮງ ເລິກເຊິ່ງ ໃນການປະຕິບັດວຽກງານຈັດຕັ້ງ ແລະ ການປົກຄອງໃຫ້ຖືກຕ້ອງ ທັນສະໄໝ ແລະ ວ່ອງໄວ.
ສະຫາຍ ນາງ ສີໃສ ລືເດດມູນສອນ ໄດ້ກ່າວວ່າ: ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າ, ທົບທວນຕີລາຄາຄືນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ແລະ XII ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, XII ແລະ ມະຕິກອງປະຊຸມໃຫຍ່ສະມາຊິກພັກ ຄັ້ງທີ IX ຂອງອົງຄະນະພັກ ຄະນະຈັດຕັ້ງສູນກາງພັກ ໃຫ້ເລິກເຊິ່ງຮອບດ້ານ, ພາວະວິໄສ ເຫັນໄດ້ດ້ານດີ-ຜົນງານ, ຖືກກັບຄວາມເປັນຈິງ ແລະ ມີຄວາມເປັນເອກະພາບສູງຕໍ່ກັບໝາກຜົນທີ່ຍາດມາໄດ້, ດ້ານອ່ອນ-ຂໍ້ຄົງຄ້າງ ທີ່ຈະຕ້ອງໄດ້ສຸມໃສ່ປັບປຸງແກ້ໄຂໃຫ້ມີການຫັນປ່ຽນເປັນຮູບປະທຳ, ຊອກຫາສາເຫດ ແລະ ບົດຮຽນໃນການນໍາພາປະຕິບັດໜ້າທີ່ການເມືອງໃນໄລຍະ 5 ປີຜ່ານມາ ແລະ ຄົ້ນຄວ້າປະກອບຄໍາເຫັນໃສ່ທິດທາງແຜນການ ແລະ ແຜນພັດທະນາວຽກງານຈັດຕັ້ງ ແລະ ການປົກຄອງ ແຕ່ນີ້ຮອດປີ 2030 ຊຶ່ງພາລະບົດບາດ, ໜ້າທີ່ ຂອງຄະນະຈັດຕັ້ງສູນກາງພັກ ມາຮອດປັດຈຸບັນໄດ້ກວມເອົາວຽກງານຈັດຕັ້ງ ແລະ ວຽກງານປົກຄອງ ຊຶ່ງເປັນພາລະບົດບາດທີ່ກວ້າງ ແລະ ສໍາຄັນ ໃນການເປັນເສນາທິການໃຫ້ພັກ ແລະ ລັດຖະບານ.
 |
ສະຫາຍ ວິໄລວັນ ບຸດດາຄໍາ ກຳມະການສູນກາງພັກ ຮອງເລຂາພັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານຮ່າງລາຍງານການເມືອງ ຂອງຄະນະບໍລິຫານງານພັກ ຄະນະຈັດຕັ້ງສູນກາງພັກ ສະໄໝທີ IX, ສະຫາຍ ດອນ ໄພວົງ ກໍາມະການຄະນະພັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານຮ່າງແຜນພັດທະນາວຽກງານຈັດຕັ້ງ ແລະ ການປົກຄອງ 5 ປີຜ່ານມາ (2021-2025) ແລະ ທິດທາງ 5 ປີໃນຕໍ່ໜ້າ (2026-2030). ພ້ອມນີ້ ຜູ້ເຂົ້າຮ່ວມຍັງໄດ້ປະກອບຄຳເຫັນກ່ຽວກັບການເປັນເສນາທິການໃຫ້ຄະນະພັກໃນວຽກງານກໍ່ສ້າງພັກ, ພະນັກງານ ແລະ ປັບປຸງກົງຈັກການຈັດຕັ້ງ ພາຍໃນອົງຄະນະພັກ ຄະນະຈັດຕັ້ງສູນກາງພັກ, ການເປັນເສນາທິການໃຫ້ຄະນະພັກໃນການສ້າງ ແລະ ປັບປຸງນິຕິກໍາ, ການເປັນເສນາທິການໃຫ້ຄະນະພັກໃນການເຕົ້າໂຮມຄວາມສາມັກຄີຂອງ 3 ອົງການຈັດຕັ້ງມະຫາຊົນ ຄະນະຈັດຕັ້ງສູນກາງພັກ ຊຶ່ງການປະກອບຄຳເຫັນດັ່ງກ່າວ ລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງ, ຄາດໝາຍສູ້ຊົນ ແລະ ວຽກງານຮອບດ້ານ ຂອງການນໍາພາໃນໄລຍະຜ່ານມາ.
ກອງປະຊຸມຄັ້ງນີ້ ໄດ້ປ່ອນບັດເລືອກເອົາ ຄະນະບໍລິຫານງານພັກ ຄະນະຈັດຕັ້ງສູນກາງພັກ ຊຸດໃໝ່; ກອງປະຊຸມຄັ້ງປະຖົມມະລືກ ໄດ້ເປັນເອກະສັນກັນເລືອກເອົາຄະນະປະຈໍາພັກ 5 ສະຫາຍ ຄື: 1). ສະຫາຍ ນາງ ສີໃສ ລືເດດມູນສອນ, 2). ສະຫາຍ ວິໄລວັນ ບຸດດາຄຳ, 3). ສະຫາຍ ດອນ ໄພວົງ, 4). ສະຫາຍ ວັນນະ ບຸບຜາ ແລະ 5). ສະຫາຍ ພອນສະຫວັນ ໄຊຊະນະ. ໃນນັ້ນ ໄດ້ເລືອກເອົາ ສະຫາຍ ນາງ ສີໃສ ລືເດດມູນສອນ ເປັນເລຂາຄະນະບໍລິຫານງານພັກ ຄະນະຈັດຕັ້ງສູນກາງພັກ ສະໄໝທີ X, ສະຫາຍ ວິໄລວັນ ບຸດດາຄຳ ເປັນຮອງເລຂາພັກ, ສະຫາຍ ພອນສະຫວັນ ໄຊຊະນະ ເປັນປະທານກວດກາພັກ, ເລືອກເອົາ ສະຫາຍ ຄຳກອງ ລາວລີ ແລະ ສະຫາຍ ນາງ ຂັນຄໍາ ແສງປະທຸມມາ ເປັນຮອງປະທານກວດກາພັກ.
 |
ສະຫາຍ ພົນເອກ ວິໄລ ຫຼ້າຄໍາຟອງ ໄດ້ເນັ້ນໜັກ ວ່າ: ຕ້ອງຍົກສູງຄວາມຮັບຜິດຊອບການເມືອງຂອງຕົນ, ເປັນເຈົ້າການນໍາພາສຶກສາອົບຮົມການເມືອງ, ນໍາພາແນວຄິດ ໃຫ້ສະມາຊິກພັກ ແລະ ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນເຊື່ອມຊຶມ, ກຳແໜ້ນມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ສືບຕໍ່ເພີ່ມທະວີວຽກງານກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ພາຍໃນອົງຄະນະພັກຂອງຕົນ, ຄວບຄູ່ກັບການປະຕິບັດໜ້າທີ່ການເມືອງ ກໍຄືສິດ, ໜ້າທີ່ຂອງຄະນະຈັດຕັ້ງ; ຄົ້ນຄວ້າຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ພາຍຫຼັງສໍາເລັດກອງປະຊຸມໃຫຍ່ຄັ້ງນີ້, ຄະນະພັກຊຸດໃໝ່ ຕ້ອງຮີບຮ້ອນແບ່ງໜ້າທີ່ຄວາມຮັບຜິດຊອບໃຫ້ແຕ່ລະສະຫາຍ ໃຫ້ຈະແຈ້ງ, ສືບຕໍ່ປັບປຸງແບບແຜນການນໍາພາ ແລະ ວິທີເຮັດວຽກຂອງຄະນະພັກ ໃຫ້ຖືກຕ້ອງ ແລະ ມີປະສິດທິພາບສູງ, ໃນຖານະອົງຄະນະພັກ ຄະນະຈັດຕັ້ງສູນກາງພັກ ຂອງພວກສະຫາຍ ແມ່ນເປັນຜູ້ນໍາພາປະຕິບັດພາລະບົດບາດ ເປັນເສນາທິການ ກ່ຽວກັບວຽກງານກໍ່ສ້າງພັກ-ພະນັກງານ, ວຽກງານປັບປຸງກົງຈັກການຈັດຕັ້ງ ກໍຄືວຽກງານປົກຄອງໃຫ້ເປັນລະບົບຄົບຊຸດ ແລະ ວຽກງານອື່ນໆ.
(ຂ່າວ: ແສງຈັນ)
ຄໍາເຫັນ