 |
ຈຸດປະສົງໃນການເຜີຍແຜ່ເຊື່ອມຊຶມດັ່ງກ່າວ, ເພື່ອສ້າງຄວາມຮັບຮູ້ເຂົ້າໃຈຢ່າງຖືກຕ້ອງ, ເລິກເຊິ່ງ ແລະ ເປັນເອກະພາບສູງ ພາຍໃນຄະນະພັກ, ສະມາຊິກພັກ, ພະນັກງານ-ລັດຖະກອນທຸກຂັ້ນ ກ່ຽວກັບຄວາມສໍາຄັນຂອງວຽກງານກວດກາພັກ, ກວດກາລັດ ແລະ ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງໃນໄລຍະໃໝ່, ເພື່ອສ້າງຄວາມເປັນເອກະພາບທາງດ້ານແນວຄິດ, ການກະທໍາ ແລະ ຍົກສູງຄວາມຮັບຜິດຊອບການເມືອງຂອງຄະນະພັກ, ຄະນະກວດກາແຕ່ລະຂັ້ນ ຕໍ່ກັບວຽກງານກວດກາພັກ, ກວດກາລັດ ແລະ ວຽກງານສະກັດກັ້ນ, ຕ້ານການສໍ້ລາດບັງຫຼວງ ໃຫ້ມີການຫັນປ່ຽນໄປສູ່ຄຸນນະພາບໃໝ່ດ້ວຍການຫັນເອົາເນື້ອໃນຈິດໃຈກອງປະຊຸມວຽກງານກວດກາທົ່ວປະເທດຄັ້ງທີ V ໃຫ້ເປັນທິດທາງແຜນ ການ, ໂຄງການດໍາເນີນງານຕົວຈິງ ຂອງຄະນະພັກຫ້ອງວ່າການສູນກາງພັກຢ່າງມີຈຸດສຸມ ພ້ອມທັງເປັນເຈົ້າການນໍາພາ - ຊີ້ນໍາຈັດຕັ້ງປະຕິບັດໃຫ້ມີປະສິດທິຜົນ ແນໃສ່ຍົກສູງປະສິດທິພາບການເຄື່ອນໄຫວວຽກງານກວດກາ ໃຫ້ເດັດຂາດ, ເຂັ້ມງວດໃນການແກ້ໄຂທຸກການລະເມີດລະບຽບວິໄນຂອງພັກ, ກົດໝາຍ ແລະ ລະບຽບການຂອງລັດໃນຖັນແຖວສະມາຊິກພັກ, ພະນັກງານ-ລັດຖະກອນທຸກຂັ້ນ ແລະ ທຸກລະດັບ ພາຍໃນຫ້ອງວ່າການສູນກາງພັກ, ປັບປຸງລະບອບ, ກົນໄກ ແລະ ແບບແຜນວິທີເຮັດວຽກຂອງຄະນະກວດກາແຕ່ລະຂັ້ນໃຫ້ມີຄວາມເຂັ້ມແຂງ, ທັນສະໄໝ, ມີວິທະຍາສາດ, ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
ການເຜີຍແຜ່ເຊື່ອມຊຶມເນື້ອໃນເອກະສານດັ່ງກ່າວແມ່ນໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້ເປັນຢ່າງດີ, ໃນກອງປະຊຸມດັ່ງກ່າວ ທ່ານ ຜາຄໍາ ອິນແສງ ໄດ້ຮຽກຮ້ອງໃຫ້ບັນດາສະຫາຍ ປະ ທານກວດກາໜ່ວຍພັກ ແລະ ພະນັກງານ-ລັດຖະກອນກົມກວດກາ ຂອງຫ້ອງວ່າການສູນກາງພັກ ຈົ່ງພ້ອມກັນນໍາເອົາແນວທາງ ແລະ ບົດຮຽນໃນກອງປະຊຸມຄັ້ງນີ້ໄປໝູນໃຊ້ເຂົ້າໃນວຽກງານຕົວຈິງ, ເອົາໃຈ ໃສ່ຕິດຕາມ, ກວດກາ. ຊອກໃຫ້ເຫັນດ້ານດີເພື່ອເສີມຂະຫຍາຍ ແລະ ດ້ານຂໍ້ຄົງຄ້າງທີ່ຈະຕ້ອງໄດ້ ພ້ອມກັນແກ້ໄຂຢ່າງຕັ້ງໜ້າ ຂອງພະນັກງານ, ການຈັດຕັ້ງ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຮອບດານ.
(ຂ່າວ: ຫສພ)
ຄໍາເຫັນ