ຄຕພ ເຜີຍແຜ່ເຊື່ອມຊຶມເອກະສານສໍາຄັນຂອງພັກຂອງຊາດ

ໃນພິທີ,ສະຫາຍບຸນເຫຼືອ ພັນດານຸວົງ ໄດ້ຍົກໃຫ້ເຫັນມູນເຊື້ອປະຫວັດຄວາມເປັນມາຂອງວັນຢຶດອໍານາດ 23 ສິງຫາ, ໄຊຊະນະດັ່ງກ່າວແມ່ນໝາກຜົນແຫ່ງການຕໍ່ສູ້ປະຕິວັດອັນຍືດເຍື້ອຍາວນານຂອງປະຊາຊົນລາວບັນດາເຜົ່າເປັນເຫດການໜຶ່ງທີ່ສໍາຄັນທາງປະຫວັດສາດ ທີ່ປະຊາຊົນລາວບັນດາເຜົ່າໄດ້ຄຽດແຄ້ນຕໍ່ສູ້ຮຸກຮານ ແລະ ຖືກກົດຂີ່ຂູດຮີດຈາກພວກລ່າເມືອງຂຶ້ນ ຕໍ່ກັບເຫດການດັ່ງກ່າວ ປະຊາຊົນລາວບັນດາເຜົ່າ ໄດ້ພ້ອມກັນລຸກຂຶ້ນຕໍ່ສູ້ຢ່າງພິລະອາດຫານເສຍສະຫຼະບໍ່ຍອມຈໍານົນ.ພາຍໃຕ້ການນຳພາຂອງພັກປະຊາຊົນປະຕິວັດລາວ ໂດຍນຳໃຊ້3ບາດຄ້ອນຍຸດທະສາດເພື່ອຢຶດອຳນາດການປົກຄອງໃນທົ່ວປະເທດແບບ“ ບົວບໍ່ຊໍ້າ ນໍ້າບໍ່ຂຸ່ນ” ນັ້ນສະແດງເຖິງການນໍາພາອັນສະຫຼາດສ່ອງໃສຂອງພັກທີ່ຮູ້ໝູນໃຊ້ລັດທິມາກ-ເລນິນ ເຂົ້າໃນພຶດຕິກໍາຕົວຈິງຂອງການປະຕິວັດຢ່າງປະດິດສ້າງ ແລະ ທັງເປັນໄຊຊະນະຂອງຄວາມສາມັກຄີຮ່ວມສຳພັນສູ້ຮົບລະຫວ່າງ ປະຊາຊົນ 3 ຊາດ ອິນດູຈີນ: ລາວ, ຫວຽດນາມ ແລະ ກໍາປູເຈຍ ທີ່ໄດ້ຄຽງບ່າຄຽງໄຫຼ່ກັນຕ້ານສັດຕູໂຕດຽວກັນ.

ພ້ອມກັນນັ້ນ, ສະຫາຍຍັງໄດ້ຍົກໃຫ້ເຫັນ ຄວາມເປັນມາ ແລະ ຄວາມໝາຍຄວາມສໍາຄັນຂອງ ວັນລັດຖະທຳມະນູນ ແຫ່ງ ສປປ ລາວ ແມ່ນແນວທາງປ່ຽນແປງໃໝ່ຮອບດ້ານ, ມີຫຼັກການຂອງພັກ ທີ່ໄດ້ຖືກຫັນມາເປັນກົດໝາຍພື້ນຖານຂອງລັດເຮົາ ຊຶ່ງຖືກຮັບຮອງ ແລະ ປະກາດໃຊ້ທຳອິດໃນວັນທີ 15 ສິງຫາ 1991 ແລະ ໄດ້ຮັບການປັບປຸງໃນປີ 2003, 2015 ແລະ 2025 ເພື່ອໃຫ້ເໝາະສົມກັບການພັດທະນາປະເທດຊາດ.ຕະຫຼອດໄລຍະ 35 ປີຜ່ານມາ ການປະກາດໃຊ້ ແລະ ປັບປຸງລັດຖະທໍາມະນູນໄດ້ເປັນບາດກ້າວຂະຫຍາຍຕົວທີ່ສໍາຄັນ ໃນການສ້າງ ແລະ ປັບປຸງບູລະນະລະບົບກົດໝາຍຢູ່ ສປປ ລາວ ໃຫ້ມີຄວາມເຂັ້ມແຂງ, ສ້າງໃຫ້ເປັນ ລັດທີ່ປົກຄອງດ້ວຍກົດໝາຍ ເທື່ອລະກ້າວ ແນໃສ່ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ,ສົ່ງເສີມຄວາມຮັ່ງມີຮ່ວມກັນ, ຄວາມຍຸຕິທໍາ ແລະ ຄວາມສີວິໄລໃນສັງຄົມ ທັງເປັນພື້ນຖານໃຫ້ແກ່ການພັດທະນາປະເທດ.

ພິທີປາຖະກະຖາໃນຄັ້ງນີ້ ເພື່ອເປັນການເຊື່ອມຊຶມ, ສຶກສາອົບຮົມ ໃຫ້ແກ່ພະນັກງານພາຍໃນ ຄຕພ ຮັບຮູ້, ເຂົ້າໃຈເຖິງປະຫວັດສາດສໍາຄັນ ຂອງຊາດ, ພ້ອມກັນເສີມຂະຫຍາຍມູນເຊື້ອອັນດີງາມ ຂອງບັນພະບູລຸດ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ສືບຕໍ່ຮ່ຳຮຽນ ແລະ ປະຕິບັດຕາມລັດຖະທໍາມະນູນ ແລະ ກົດໝາຍຢ່າງເຂັ້ມງວດ, ພ້ອມກັນເຮັດສໍາເລັດທຸກໜ້າທີ່ການເມືອງທີ່ໄດ້ຮັບມອບໝາຍ.

(ຂ່າວ: ຄຕພ, ພາບ: ແສງຈັນ)