ມາດຕະການດັ່ງກ່າວຈະກວມເອົາຄ່າໃຊ້ຈ່າຍໄຟຟ້າ ແລະ ອາຍແກ໊ສໃນໄລຍະເດືອນກໍລະກົດ ຫາ ເດືອນກັນຍາ ຊຶ່ງເປັນເດືອນທີ່ມີການນຳໃຊ້ເຄື່ອງປັບອາກາດຫຼາຍທີ່ສຸດ ແລະ ຄາດວ່າຈະຊ່ວຍປະຢັດຄ່າໃຊ້ຈ່າຍຂອງຄົວເຮືອນສະເລ່ຍປະມານ 5,000 ເຢນ.
ພາຍໃຕ້ມາດຕະການດັ່ງກ່າວ, ລັດຖະບານຈະໃຫ້ເງິນອຸດໜູນຄ່າໄຟຟ້າໃນອັດຕາ 3.5 ເຢນຕໍ່ກິໂລວັດຊົ່ວໂມງໃນເດືອນກໍລະກົດ ຫາ ກັນຍາ ແລະ ເພີ່ມຂຶ້ນເປັນ 4.5 ເຢນໃນເດືອນສິງຫາ, ໂດຍໃຊ້ງົບຈາກກອງທຶນສຳຮອງ 1 ພັນຕື້ເຢນທີ່ຈັດສັນໄວ້ໃນປີງົບປະມານ ປີ 2026.
ໜັງສືພິມ Kyodo News ລາຍງານວ່າ: ຍີ່ປຸ່ນໄດ້ອຸດໜູນລາຄາໄຟຟ້າ ແລະ ອາຍແກ໊ສຢ່າງຕໍ່ເນື່ອງໃນຊຸມປີມໍ່ໆມານີ້, ໂດຍສະເພາະໃນໄລຍະລະດູຮ້ອນ ແລະ ລະດູໜາວທີ່ມີຄວາມຕ້ອງການໃຊ້ພະລັງງານສູງ. ໂດຍໂຄງການອຸດໜູນຫຼ້າສຸດໄດ້ສິ້ນສຸດລົງໃນເດືອນມັງກອນ ຫາ ເດືອນມີນາ, ໃນຂະນະທີ່ໂຄງການດັ່ງກ່າວໄດ້ເລີ່ມຂຶ້ນຄັ້ງທຳອິດໃນເດືອນມັງກອນ 2023 ຫຼັງຈາກການເພີ່ມຂຶ້ນຂອງລາຄາພະລັງງານ ຍ້ອນການຂັດແຍ້ງລະຫວ່າງຣັດເຊຍ ແລະ ອູແກຣນ.
ໃນຂະນະດຽວກັນ, ລັດຖະບານຍີ່ປຸ່ນກຳລັງກະກຽມທີ່ຈະສະເໜີງົບປະມານເພີ່ມເຕີມມູນຄ່າຫຼາຍກວ່າ 3 ພັນຕື້ເຢນໃນອາທິດໜ້າ ເພື່ອຊົດເຊີຍການນຳໃຊ້ເງິນຫຼາຍກວ່າ 500 ຕື້ເຢນຈາກກອງທຶນສຳຮອງຂອງຕົນ, ໂດຍມີຈຸດປະສົງເພື່ອຟື້ນຟູກອງທຶນສຳຮອງໃຫ້ກັບຄືນມາເປັນ 1 ພັນຕື້ເຢນ ຊຶ່ງປົກກະຕິແລ້ວຈະຖືກໃຊ້ເພື່ອຈັດການກັບໄພພິບັດ ແລະ ເຫດສຸກເສີນອື່ນໆ.
ທັງນີ້, ງົບປະມານເພີ່ມເຕີມດັ່ງກ່າວຈະຈັດສັນເງິນຈາກກອງທຶນສຳຮອງເພື່ອຫຼຸດຜ່ອນຜົນກະທົບຈາກສະຖານະການໃນຕາເວັນອອກກາງ. ໂດຍຄາດວ່າເງິນດັ່ງກ່າວຈະຖືກນຳໃຊ້ເພື່ອສະໜັບສະໜູນໂຄງການອຸດໜູນໃໝ່ເພື່ອຮັກສາລາຄານໍ້າມັນເຊື້ອໄຟໃຫ້ຢູ່ທີ່ 170 ເຢນຕໍ່ລິດ ຊຶ່ງເປັນມາດຕະການທີ່ໄດ້ກັບຄືນມາເລີ່ມໃຊ້ໃໝ່ຕັ້ງແຕ່ກາງເດືອນມີນາ ທີ່ຜ່ານມາ.
ຄໍາເຫັນ