ກ່ອນໜ້ານີ້, ເຈົ້າໜ້າທີ່ຍີ່ປຸ່ນໄດ້ໃຊ້ມາດຕະການຕ່າງໆເຊັ່ນ: ການອອກຄຳສັ່ງເນລະເທດ ຫຼື ເຂົ້າສູ່ຂະບວນການເນລະເທດເມື່ອຜູ້ກະທຳຜິດຍອມຈຳນົນ ຫຼື ໄດ້ຮັບແຈ້ງຈາກຕຳຫຼວດ. ເຖິງຢ່າງໃດກໍຕາມ, ສຳນັກງານກວດຄົນເຂົ້າເມືອງມີຈຸດປະສົງທີ່ຈະໃຊ້ມາດຕະການທີ່ມີປະສິດທິພາບຫຼາຍຂຶ້ນໂດຍການໃຊ້ສື່ສັງຄົມອອນລາຍເພື່ອເກັບກຳ ແລະ ວິເຄາະຂໍ້ມູນເພື່ອລະບຸຕົວຜູ້ກະທຳຜິດ.
ປັດຈຸບັນ, ຂໍ້ມູນກ່ຽວກັບການຮັບສະໝັກວຽກທີ່ຜິດກົດໝາຍ ລວມເຖິງຂໍ້ມູນການປອມແປງສະຖານະພາບການຢູ່ອາໄສກຳລັງແຜ່ລາມຢູ່ໃນສື່ສັງຄົມອອນລາຍ. ການເກັບກຳ ແລະ ວິເຄາະຂໍ້ມູນເຫຼົ່ານີ້ຈະຊ່ວຍໃຫ້ເຈົ້າໜ້າທີ່ກວດພົບຄົນຕ່າງປະເທດທີ່ລັກລອບເຮັດວຽກ, ລວມເຖິງບຸກຄົນ ຫຼື ທຸລະກິດທີ່ຈ້າງພວກເຂົາ ຫຼື ເປັນຕົວກາງທີ່ສະໜອງທີ່ພັກອາໄສ ແລະ ວຽກເຮັດງານທຳ ອີກດ້ວຍ.
ນອກຈາກນັ້ນ, ສຳນັກງານດັ່ງກ່າວມີແຜນທີ່ຈະນຳໃຊ້ປັນຍາປະດິດ (AI) ແລະ ເຄື່ອງມືວິເຄາະຈາກພາກເອກະຊົນເພື່ອສະໜັບສະໜູນຄວາມພະຍາຍາມນີ້, ໂດຍມີຈຸດປະສົງຈະເລີ່ມການຈັດຕັ້ງປະຕິບັດໃນປີໜ້າ ຫຼື ຫຼັງຈາກນັ້ນ. ອີກທັງຍັງພິຈາລະນາຈະຂະຫຍາຍການດຳເນີນງານໄປສູ່ເຂດພາກພື້ນ, ຍ້ອນວ່າລັດຖະບານທ້ອງຖິ່ນໄດ້ຮັບການຮ້ອງຮຽນເພີ່ມຂຶ້ນຈາກຜູ້ຢູ່ອາໄສທີ່ໄດ້ຮັບຄວາມເດືອດຮ້ອນຈາກບັນຫາຄົນເຂົ້າເມືອງຜິດກົດໝາຍ ແລະ ບັນຫາອື່ນໆທີ່ກ່ຽວຂ້ອງ.
ອີງຕາມຂໍ້ມູນຂອງສຳນັກງານດັ່ງກ່າວພົບວ່າ: ຄົນຕ່າງປະເທດຫຼາຍຄົນທີ່ຢູ່ເກີນວີຊາໄດ້ເຮັດວຽກຢ່າງລັບໆໃນປະເທດຍີ່ປຸ່ນເພື່ອຫາລ້ຽງຊີບ ຊຶ່ງການຈ້າງງານທີ່ຜິດກົດໝາຍເຫຼົ່ານີ້ມັກຈະຂາດການກວດສອບຈາກພາກລັດ, ນຳໄປສູ່ບັນຫາທີ່ສັບສົນເຊັ່ນ: ສະພາບການເຮັດວຽກທີ່ບໍ່ດີ, ການຫຼີກລ່ຽງພາສີ ແລະ ຂໍ້ຂັດແຍ່ງໃນຊຸມຊົນ ຊຶ່ງຖືເປັນບັນຫາທີ່ຕ້ອງໄດ້ຮັບການແກ້ໄຂຢ່າງຮີບດ່ວນ.
ໃນເດືອນກໍລະກົດປີຜ່ານມາ, ລັດຖະບານຍີ່ປຸ່ນໄດ້ສ້າງຕັ້ງສູນບັນຊາການໃໝ່ພາຍໃຕ້ສຳນັກງານເລຂາທິການຄະນະລັດຖະມົນຕີ ເພື່ອຈັດການບັນຫາທີ່ກ່ຽວຂ້ອງກັບຄົນຕ່າງປະເທດໃນປະເທດຍີ່ປຸ່ນໂດຍສະເພາະ.
ຜົນຈາກການຄວາມພະຍາຍາມໃນປີຜ່ານມາ, ມີບຸກຄົນ 1,837 ຄົນຖືກຈັບໃນປີກາຍນີ້ ໃນຂໍ້ຫາກະທຳຜິດທີ່ກ່ຽວຂ້ອງກັບການຢູ່ອາໄສ ແລະ ການເຮັດວຽກທີ່ຜິດກົດໝາຍ ຊຶ່ງເພີ່ມຂຶ້ນ 459 ຄົນຈາກປີກ່ອນ, ມາຮອດວັນທີ 1 ມັງກອນຂອງປີນີ້. ຈຳນວນຜູ້ຢູ່ອາໄສຜິດກົດໝາຍໃນປະເທດຍີ່ປຸ່ນ ຢູ່ທີ່ 68,488 ຄົນ, ຫຼຸດລົງ 6,375 ຄົນ ຈາກໄລຍະດຽວກັນຂອງປີກາຍ.
ຄໍາເຫັນ