ບົດລາຍງານຊີ້ໃຫ້ເຫັນວ່າ: ຄ່າໃຊ້ຈ່າຍໃນການເດີນທາງທີ່ສູງຂຶ້ນເຮັດໃຫ້ພົນລະເມືອງຍີ່ປຸ່ນຍົກເລີກການເດີນທາງໄປຍັງຈຸດໝາຍປາຍທາງທີ່ຢູ່ໄກເຊັ່ນ: ອາເມຣິກາເໜືອ ແລະ ອົສຕຣາລີ, ໃນຂະນະທີ່ການທ່ອງທ່ຽວພາຍໃນປະເທດຄາດວ່າຈະຊ້າລົງຍ້ອນຜູ້ບໍລິໂພກຫຼຸດຜ່ອນການໃຊ້ຈ່າຍທ່າມກາງອັດຕາເງິນເຟີ້.
ຄ່າໃຊ້ຈ່າຍສະເລ່ຍຕໍ່ຄົນສຳລັບການເດີນທາງໄປຕ່າງປະເທດຄາດວ່າຈະເພີ່ມຂຶ້ນ 6.3% ຈາກປີ 2025 ເປັນ 323,000 ເຢນ ໃນປີ 2026. ໂດຍຄ່າເງິນເຢນທີ່ອ່ອນຄ່າລົງກຳລັງເຮັດໃຫ້ຄ່າໃຊ້ຈ່າຍໃນການເດີນທາງໄປຕ່າງປະເທດສູງຂຶ້ນ, ໃນຂະນະທີ່ຄ່າທຳນຽມນໍ້າມັນເຊື້ອໄຟທີ່ເພີ່ມຂຶ້ນ ຊຶ່ງເປັນຜົນມາຈາກລາຄາພະລັງງານທີ່ເພີ່ມຂຶ້ນສູງທ່າມກາງການສະໜອງນໍ້າມັນທີ່ເຄັ່ງຕຶງ ຍ້ອນວິກິດການຕາເວັນອອກກາງໄດ້ເພີ່ມຄ່າໃຊ້ຈ່າຍອີກດ້ວຍ.
ການເດີນທາງທ່ອງທ່ຽວພາຍໃນປະເທດຍີ່ປຸ່ນຄາດວ່າຈະຫຼຸດລົງ 4.4% ຈາກປີ 2025, ມາເປັນ 69 ລ້ານເທື່ອຄົນໃນປີ 2026, ໃນຂະນະທີ່ຄ່າໃຊ້ຈ່າຍສະເລ່ຍຕໍ່ຄົນຄາດວ່າຈະເພີ່ມຂຶ້ນ 3.2% ມາເປັນ 48,500 ເຢນ.
ທັງນີ້, ພາກພື້ນຄັນໂຕ ໃນພາກຕາເວັນອອກຂອງປະເທດຍີ່ປຸ່ນ, ລວມທັງນະຄອນຫຼວງໂຕກຽວ ຈະເປັນຈຸດ ໝາຍປາຍທາງທີ່ໄດ້ຮັບຄວາມນິຍົມຫຼາຍທີ່ສຸດ, ໂດຍດຶງດູດນັກທ່ອງທ່ຽວ 19%, ຕິດຕາມດ້ວຍພາກພື້ນຄິນກິ ໃນພາກຕາເວັນຕົກຂອງປະເທດຍີ່ປຸ່ນ 14.9% ແລະ ຮອກໄກໂດ ໃນພາກເໜືອຂອງປະເທດຍີ່ປຸ່ນ 11.2%.
ການຄາດຄະເນດັ່ງກ່າວແມ່ນອີງໃສ່ການສຳຫຼວດທາງອອນລາຍທີ່ດຳເນີນໂດຍ ບໍລິສັດ JTB Corp. ໃນເດືອນມິຖຸນາ ຜ່ານມາໃນບັນດາຜູ້ທີ່ວາງແຜນທີ່ຈະເດີນທາງທ່ອງທ່ຽວແບບພັກຄ້າງຄືນຢ່າງໜ້ອຍ 1 ຄືນ ໃນໄລຍະວັນພັກລະດູຮ້ອນນີ້.
ຄໍາເຫັນ