ບໍລິສັດດັ່ງກ່າວລະບຸວ່າ: ເຖິງແມ່ນວ່ານີ້ແມ່ນການປັບລາຄາຄັ້ງທຳອິດຂອງປີກໍຕາມ, ແຕ່ຈຳນວນສິນຄ້າທີ່ໄດ້ຮັບຜົນກະທົບຫຼຸດລົງປະມານ 30% ຈາກຫຼາຍກວ່າ 4,000 ລາຍການໃນປີກາຍ. ເຫດຜົນຫຼັກແມ່ນລາຄາວັດຖຸດິບທີ່ສູງຂຶ້ນ, ໃນຂະນະທີ່ຄ່າໃຊ້ຈ່າຍດ້ານພະລັງງານ ແລະ ການຫຸ້ມຫໍ່ທີ່ເພີ່ມຂຶ້ນກໍເປັນແຮງກົດດັນຕໍ່ລາຄາເຊັ່ນກັນ.
ສິນຄ້າທີ່ໄດ້ຮັບຜົນກະທົບໜັກທີ່ສຸດແມ່ນເຄື່ອງປຸງເຊັ່ນ: ມາຍອງເນສ ແລະ ນ້ຳສະຫຼັດ ຈຳນວນ 1,514 ລາຍການ, ຕິດຕາມມາດ້ວຍອາຫານປຸງແຕ່ງເຊັ່ນ: ໝີ່ສຳເລັດຮູບ 609 ລາຍການ ແລະ ເຄື່ອງດື່ມທີ່ມີທາດເຫຼົ້າ ແລະ ເຄື່ອງດື່ມອື່ນໆ 369 ລາຍການ.
ບົດລາຍງານຍັງຊີ້ໃຫ້ເຫັນວ່າ: ອາດຈະມີການຂຶ້ນລາຄາຕື່ມອີກໃນໄລຍະເຄິ່ງທີ່ສອງຂອງປີ 2026, ເນື່ອງຈາກຄວາມບໍ່ແນ່ນອນຂອງການສະໜອງນ້ຳມັນດິບທ່າມກາງຄວາມເຄັ່ງຕຶງໃນຕາເວັນອອກກາງ ແລະ ຄາດວ່າລາຄາຟິມພາສຕິກ, ໄຟຟ້າ ແລະ ນ້ຳມັນເຊື້ອໄຟ ຈະເພີ່ມສູງຂຶ້ນ.
ທັງນີ້, ຂໍ້ມູນຈາກກະຊວງກິດຈະການພາຍໃນ ແລະ ການສື່ສານຂອງຍີ່ປຸ່ນ ລະບຸວ່າ: ດັດຊະນີລາຄາຜູ້ບໍລິໂພກຫຼັກ (CPI) ໃນນະຄອນຫຼວງໂຕກຽວ ຊຶ່ງບໍ່ລວມລາຄາອາຫານສົດ ໄດ້ເພີ່ມຂຶ້ນ 1.7% ໃນເດືອນມີນາ ເມື່ອທຽບກັບປີກ່ອນ, ຫຼຸດລົງຈາກ 1.8% ໃນເດືອນກຸມພາ.
ເຖິງແມ່ນວ່າລາຄາພະລັງງານຈະຫຼຸດລົງ 7.5% ເມື່ອທຽບກັບປີກ່ອນ, ແຕ່ການເພີ່ມຂຶ້ນຂອງລາຄານ້ຳມັນດິບໄດ້ຊົດເຊີຍການຫຼຸດລົງ 1.0% ຂອງລາຄານ້ຳມັນເຊື້ອໄຟ, ເມື່ອທຽບກັບການຫຼຸດລົງ 14.7% ໃນເດືອນກຸມພາ.
ຄໍາເຫັນ