ຍົກ​ລະ​ດັບ ການເກັບກຳຫາງສຽງສັງຄົມໃຫ້​ພະ​ນັກ​ງານ-ລັດ​ຖະ​ກອນ ເມືອງ​ປາກ​ຊ່ອງ

‎ ທ່ານ ປະດິດ ວັນນະລັດສະໝີ ກ່າວວ່າ: ຊຸດຝຶກອົບຮົມໃນຄັ້ງນີ້ ແມ່ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ທັງນີ້ ກໍເພື່ອເຮັດໃຫ້ຄະນະກຳມະການຂັ້ນເມືອງ ແລະ ກົມກອງໃນທົ່ວເມືອງ, ໃນນາມເປັນຜູ້ຮັບຜິດຊອບວຽກງານຕິດຕາມ ແລະ ເກັບກຳສະພາບແນວຄິດຫາງສຽງ-ສັງຄົມ ໃຫ້ມີຄວາມຮັບຮູ້-ເຂົ້າໃຈ ກ່ຽວກັບວຽກງານດັ່ງກ່າວຢ່າງເລິກເຊິ່ງ ແລະ ຈະແຈ້ງກວ່າເກົ່າ ພ້ອມທັງເນັ້ນໜັກໃຫ້ຄະນະຮັບຜິດຊອບ, ວິທະຍາກອນ ແລະ ນັກສຳມະນາກອນທຸກທ່ານ ຈົ່ງພ້ອມກັນເອົາໃຈໃສ່ຄົ້ນຄວ້າ, ຍົກສູງຄວາມຮັບຜິດຊອບ ເຂົ້າໃນການຮັບຟັງການບັນຍາຍ, ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ເພື່ອເຮັດໃຫ້ການຝຶກອົບຮົມຄັ້ງນີ້ ໄດ້ຮັບຜົນສຳເລັດຕາມລະດັບຄາດໝາຍ ທີ່ວາງໄວ້ ແລະ ສາມາດນຳເອົາຄວາມຮູ້ ທີ່ໄດ້ຮັບໄປຈັດຕັ້ງປະຕິບັດ ເຂົ້າໃນວຽກງານຕົວຈິງ ຢູ່ຮາກຖານກົມກອງຂອງຕົນ ໃຫ້ມີປະສິດທິພາບສູງຂື້ນເລື້ອຍໆ.

ຊຸດຝຶກອົບຮົມໃນຄັ້ງນີ້ຜູ້ເຂົ້າຮ່ວມ ໄດ້ພ້ອມກັນຄົ້ນຄວ້າຮ່ຳຮຽນເອກະສານ 4 ບົດ ທີ່ເປັນພື້ນຖານສຳຄັນ ຄື: ບາງບັນຫາພື້ນຖານກ່ຽວກັບວຽກງານຫາງສຽງ-ສັງຄົມ (ຄວາມໝາຍ ແລະ ຄວາມແຕກຕ່າງລະຫວ່າງຫາງສຽງສັງຄົມ ກັບ ຂ່າວລື; ພາລະບົດບາດ, ສິດ, ໜ້າທີ່, ຫຼັກການ ແລະ ທິດທາງໃນວຽກງານຄົ້ນຄວ້າຫາງສຽງສັງຄົມ); ວິທີການເກັບກຳ ແລະ ການນຳໃຊ້ຫາງສຽງ-ສັງຄົມ ເຂົ້າໃນວຽກງານການເມືອງ-ແນວຄິດ (ຮູບແບບ, ວິທີການເກັບກຳ ແລະ ຜົນປະໂຫຍດຕໍ່ວຽກງານການເມືອງ-ແນວຄິດ); ຕາໜ່າງເພື່ອນຮ່ວມງານ (ຄວາມສຳຄັນ, ສິດ, ໜ້າທີ່, ມາດຖານ ແລະ ຄຸນທາດການເມືອງ; ແບບແຜນການເຄື່ອນໄຫວ, ວິທີການຂຽນບົດລາຍງານ ແລະ ລະບອບການລາຍງານຫາງສຽງສັງຄົມ) ແລະ ວຽກງານຄົ້ນຄວ້າສັງລວມ (ພາລະບົດບາດ, ສິດ, ໜ້າທີ່ ຂອງວຽກງານຄົ້ນຄວ້າສັງລວມ ແລະ ທັດສະນະທີ່ຈຳເປັນສຳລັບຜູ້ເຮັດວຽກງານນີ້).

‎ ຈຸດປະສົງຂອງການຈັດຊຸດຝຶກອົບຮົມຄັ້ງນີ້ ກໍເພື່ອເປັນການຍົກສູງຂີດຄວາມສາມາດ, ຄວາມຮູ້ຄວາມເຂົ້າໃຈ ແລະ ເສີມສ້າງທັກສະດ້ານວິຊາສະເພາະ ໃຫ້ແກ່ພະນັກງານ-ລັດຖະກອນ ໂດຍສະເພາະແມ່ນເຕັກນິກ ແລະ ວິທີການເກັບກຳ, ວິເຄາະ-ວິໄຈ, ຕີລາຄາສະພາບແນວຄິດ ແລະ ຫາງສຽງສັງຄົມ ທີ່ເກີດຂື້ນໃນແຕ່ລະໄລຍະ ໃຫ້ມີຄວາມວ່ອງໄວ, ຊັດເຈນ ແລະ ແທດເຖິງກັບຕົວຈິງ ມຸ້ງເນັ້ນໃສ່ການສະໜອງຂໍ້ມູນ-ຂ່າວສານ ທີ່ເປັນປະໂຫຍດໃຫ້ແກ່ຂັ້ນເທິງ ເພື່ອເປັນບ່ອນອີງໃນການກຳນົດທິດທາງ, ນະໂຍບາຍ ແລະ ແກ້ໄຂບັນຫາຕ່າງໆ ທີ່ສັງຄົມໃຫ້ຄວາມສົນໃຈ ໄດ້ຢ່າງທັນການ.

‎ຂ່າວ: ທ. ສອນໄຊ ຈັນທະວີ