ຍົກລະດັບຂະແໜງບໍລິການຮ້ານອາຫານ ແລະ ໂຮງແຮມ

ສະຖາບັນພັດທະນາສີມືແຮງງານ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດພິທີຝຶກອົບຮົມການສ້າງຂີດຄວາມສາມາດໃຫ້ບັນດາຫົວໜ່ວຍວິສາຫະກິດໃນຂະແໜງຮ້ານອາຫານ ແລະ ໂຮງແຮມຢູ່ ສປປ ລາວ ຂຶ້ນໃນວັນທີ 3 ຕຸລາຜ່ານມາ ທີ່ສະຖາບັນພັດທະນາສີມືແຮງງານ ພາຍໃຕ້ໂຄງການສ້າງຄວາມເຂັ້ມແຂງໃຫ້ພະນັກງານຂອງຫົວໜ່ວຍແຮງງານໃນຂະແໜງການບໍລິການຮ້ານອາຫານ ແລະ ໂຮງແຮມ ພາຍໃຕ້ຍຸດທະສາດການຮ່ວມມືຂອງແອັກແມັກ.ໂດຍການເປັນປະທານຂອງທ່ານ ບຸນມາ ສິດທິດໂສມ ຫົວໜ້າສະຖາບັນພັດທະນາສີມືແຮງງານ ກະຊວງ ຮສສ, ມີຂະແໜງການກ່ຽວຂ້ອງ ແລະ ສຳມະນາກອນເຂົ້າຮ່ວມ.
ທ່ານ ບຸນມາ ສິດທິໂສມ ກ່າວວ່າ:ຜູ້ເຂົ້າຮ່ວມຝຶກອົບຮົມຈະໄດ້ຮຽນຮູ້ປະສົບການດ້ານການບໍລິການຮ້ານອາຫານ ແລະ ໂຮງແຮມຄື: ແມ່ບ້ານ; ເຄື່ອງດື່ມ; ການບໍລິການຮ້ານອາຫານ ຊຶ່ງຊຸດອົບຮົມຄັ້ງນີ້ ເປັນການຮ່ວມມືລະຫວ່າງ ສະຖາບັນພັດທະນາສີມືແຮງງານກັບ ໂຄງການພາຍໃຕ້ຍຸດທະສາດການຮ່ວມມືຂອງແອັກແມັກ ໄລຍະການຈັດຕັ້ງປະຕິບັດ ປີ 2022-2024 ໂດຍແມ່ນລັດຖະບານຍີ່ປຸ່ນໃຫ້ການສະໜັບສະໜູນການຊ່ວຍເຫຼືອ 100% ເພື່ອນຳໃຊ້ເຂົ້າໃນກການອົບຮົມການສ້າງຂີດຄວາມສາມາດຫົວໜ່ວຍທຸລະກິດຂະໜາດກາງ ແລະ ນ້ອຍໃນຂະແໜງການບໍລິການ ຮ້ານອາຫານ ແລະ ໂຮງແຮມໃຫ້ໄດ້ມາດຕະຖານສູງ ຊຶ່ງເປັນການສ້າງໂອກາດອັນດີທີ່ສຸດສໍາລັບບັນດາຫົວໜ່ວຍວິສາຫະກິດ ທີ່ຈະໄດ້ຮັບການຮຽນຮູ້ປະສົບການດ້ານການບໍລິການເພື່ອແນໃສ່ການສ້າງຄວາມເຂັ້ມແຂງໃຫ້ແກ່ບັນດາຫົວໜ່ວຍວິສາຫະກິດໃນຂະແໜງການຮ້ານອາຫານ ແລະ ໂຮງແຮມ ຢູ່ ສປປ ລາວ ພາຍໃຕ້ໂຄງການ ‘Enhancing Capacity of SME Workfoce in Hospitality’ ພາຍໃຕ້ແຜນງານແອັກແມັກ ເພື່ອເພີ່ມທັກສະທາງດ້ານການປະກອບການໃຫ້ແກ່ເພື່ອນຮ່ວມຍຸດທະສາດແອັກແມັກການອົບຮົມຈະຈັດຂຶ້ນຢູ່ 4 ແຂວງຄື:  ນະຄອນຫຼວງວຽງຈັນ 200 ຄົນ; ແຂວງຫຼວງພະບາງ 200 ຄົນ; ແຂວງຈຳປາສັກ 200 ຄົນ ແລະ ແຂວງວຽງຈັນ 200 ຄົນໃຫ້ແກ່ບັນດາຫົວໜ່ວຍໃນຂະແໜງການ SMEs ໃນ ສປປ ລາວ ລວມທັງໝົດໃຫ້ໄດ້ 800 ຄົນ. ໄລຍະການອົບຮົມແມ່ນ12 ວັນ ( ເລີ່ມ 3-27 ຕຸລາ 2023).
ຂ່າວ-ພາບ: ຍຸພິນທອງ