 |
ໃນຊຸມປີມໍ່ໆມານີ້, ຈາກສະຖານີອະວະກາດ “ທ່ຽນກຸ່ງ” ຂອງຈີນໄດ້ປະຕິບັດງານແບບປົກກະຕິເຖິງໂຮງໄຟຟ້ານິວເຄລຍລຸ່ນທີ 4 ແຫ່ງທຳອິດຂອງໂລກໄດ້ເປີດນຳໃຊ້; ຈາກການຄິດໄລ່ກວານຕຳເຖິງຮູບຈຳລອງປັນຍາປະດິດຫຼື AIຂະໜາດໃຫຍ່. ໃນຊຸມປີຜ່ານມາ, ຈີນໄດ້ລົງເລິກປະຕິບັດຍຸດທະສາດການພັດທະນາທີ່ຂັບເຄື່ອນດ້ວຍການປະດິດສ້າງໃໝ່, ໄດ້ລົງເລິກການປະຕິຮູບຢ່າງຮອບດ້ານຕື່ມອີກ, ໄດ້ສຸມກຳລັງເຂົ້າໃນການພັດທະນາເສດຖະກິດ, ວິທະຍາສາດເຕັກໂນໂລຊີແລະບຸກຄະລາກອນມີຄວາມຮູ້ຄວາມສາມາດ ຊຶ່ງໄດ້ກາຍເປັນສິ່ງຄ້ຳປະກັນດ້ານລະບຽບການທີ່ເປັນລະບົບໃຫ້ແກ່ການປະດິດສ້າງໃໝ່ດ້ານວິທະຍາສາດເຕັກໂນໂລຊີ. ປີ 2024, ການລົງທຶນດ້ານການຄົ້ນຄວ້າພັດທະນາໃນທົ່ວສັງຄົມຈີນໄດ້ເຕີບໂຕ 48% ເມື່ອທຽບໃສ່ປີ 2020, ຄວາມເຂັ້ມແຂງດ້ານການຄົ້ນຄວ້າພັດທະນາໄດ້ບັນລຸເຖິງ 2.68% ຊຶ່ງສູງກວ່າລະດັບສະເລ່ຍຂອງປະເທດສະມາຊິກສະຫະພາບເອີຣົບແລະຈຳນວນນັກຄົ້ນຄວ້າຂອງຈີນໄດ້ເປັນອັນດັບໜຶ່ງຂອງໂລກ. ທັງໝົດນີ້ໄດ້ເປັນພະລັງຂັບເຄື່ອນສຳຄັນໃຫ້ແກ່ການປະດິດສ້າງໃໝ່ດ້ານວິທະຍາສາດເຕັກໂນໂລຊີຢ່າງບໍ່ຂາດສາຍ.
“ຄວາມສາມາດດ້ານການປະດິດສ້າງໃໝ່” ຂອງຈີນໄດ້ເພີ່ມຂຶ້ນຢ່າງຕໍ່ເນື່ອງ, ບໍ່ພຽງແຕ່ເຮັດໃຫ້ເສດຖະກິດຈີນມີຄວາມໜຽວແໜ້ນແລະຄວາມມີຊີວິດຊີວາຫຼາຍຂຶ້ນເທົ່ານັ້ນ, ຫາກຍັງໄດ້ຊຸກຍູ້ການຫັນປ່ຽນຮູບແບບການພັດທະນາຂອງບັນດາປະເທດ ແລະເປີດພື້ນທີ່ໃໝ່ໃຫ້ແກ່ການພັດທະນາເສດຖະກິດໂລກອີກດ້ວຍ. ຢູ່ຊາອຸດິດ ອາຣັບບີ, ບໍລິສັດທີ່ກ່ຽວຂ້ອງໄດ້ນຳໃຊ້ຮູບຈຳລອງປັນຍາປະດິດຂະໜາດໃຫຍ່ຂອງຈີນເພື່ອຍົກປະສິດທິພາບການດຳເນີນງານຂອງຕົນໃຫ້ສູງຂຶ້ນ; ຢູ່ມາເລເຊຍ, ເຕັກໂນໂລຊີການຈ່າຍເງິນເຄື່ອນທີ່ໄດ້ຊຸກຍູ້ການພັດທະນາຂະແໜງການທ່ອງທ່ຽວຂອງທ້ອງຖິ່ນ; ຢູ່ຫຼາຍປະເທດໃນທະວີບອາຟຣິກາ, ເຕັກໂນໂລຊີເຮືອບິນບໍ່ມີຄົນຂັບຫຼື ໂດຣນຂອງຈີນໄດ້ຊ່ວຍຊຸກຍູ້ການພັດທະນາກະສິກຳອັດສະລິຍະຂອງທ້ອງຖິ່ນ… ນັກວິເຄາະເຫັນວ່າ: ຈີນພັດທະນາກຳລັງການຜະລິດດ້ວຍຄຸນນະພາບໃໝ່ “ມີຄວາມໝາຍສຳຄັນຕໍ່ການຊຸກຍູ້ການພັດທະນາເສດຖະກິດໂລກແບບຍືນຍົງ”.
 |
ໃນງານວາງສະແດງການຄ້າການບໍລິການສາກົນຈີນປີ 2025 ທີ່ຫາກໍສິ້ນສຸດລົງຫວ່າງມໍ່ໆມານີ້, “ການຂັບເຄື່ອນການພັດທະນາດ້ວຍດີຈີຕອນແລະອັດສະລິຍະ” ໄດ້ກາຍເປັນຄຳສັບພົ້ນເດັ່ນ; ໃນຫໍວາງສະແດງປັນຍາປະດິດທີ່ຕັ້ງຂຶ້ນໃໝ່ເປັນຄັ້ງທຳອິດໃນງານວາງສະແດງສິນຄ້າຈີນ-ອາຊຽນຄັ້ງທີ 22 ທີ່ພວມຈັດຂຶ້ນຢູ່ນະຄອນໜານໜິງຂອງຈີນໄດ້ວາງສະແດງຫຸ່ນຍົນອັດສະລິຍະແລະແຜນການແກ້ໄຂດ້ານ AI ທີ່ທັນສະໄໝທີ່ສຸດ; ສ່ວນງານວາງສະແດງເສດຖະກີດດີຈີຕອນສາກົນຈີນປີ 2025 ທີ່ຈະຈັດຂຶ້ນໃນເດືອນໜ້ານີ້ ຈະໂຮມສູນວາງສະແດງໝາກຜົນຫຼ້າສຸດໃນຂົງເຂດເສດຖະກິດດີຈີຕອນ… ພຶດຕິກຳຕົວຈິງຈະພິສູດໃຫ້ເຫັນຢ່າງຈະແຈ້ງເລື້ອຍໆວ່າ: ການປະດິດສ້າງໃໝ່ຂອງຈີນບໍ່ພຽງແຕ່ເປັນຂອງຈີນເທົ່ານັ້ນ, ຫາກຍັງເປັນຂອງໂລກອີກດ້ວຍ.
ໂດຍ: ຊີອາໄອ
ຄໍາເຫັນ