ຍ້ອນ​ຫຍັງ​ດິ​ສ​ນີ​​ບໍ່​ສາ​ມາດ​ເບິ່ງ​ຂ້າມ​ຕະຫຼາດ​ຈີນ

ທ່າແຮງຂອງຕະຫຼາດຈີນແມ່ນກຳເນີດມາຈາກພື້ນຖານຜູ້ບໍລິໂພກທີ່ມີຂະໜາດໃຫຍ່ ແລະມີຄວາມສາມາດດ້ານການບໍລິໂພກທີ່ແຂງແຮງ. ໃນຖານະເປັນຕະຫຼາດຮູບເງົາລະດັບຍອດຍິ່ງຂອງໂລກ, ມູນຄ່າຂາຍປີ້ເຂົ້າຊົມຮູບເງົາເລື່ອງ “ ‌Zootopia 2” ຢູ່ແຜ່ນດິນໃຫຍ່ຈີນໄດ້ບັນລຸຫຼາຍກວ່າ 738 ລ້ານຢວນຕໍ່ມື ຊຶ່ງໄດ້ລື່ນກາຍມູນຄ່າຂາຍປີ້ເຂົ້າຊົມໃນໄລຍະດຽວກັນຂອງຕະຫຼາດອາເມຣິກາເໜືອ, ນອກຈາກນີ້ແລ້ວ, ຮູບເງົາເລື່ອງນີ້ຍັງໄດ້ຮ່ວມມືກັບ 60 ກວ່າຍີ່ຫໍ້ ໂດຍໄດ້ຜະລິດເຄື່ອງບໍລິໂພກຄົບວົງຈອນທີ່ກວມເອົາທັງເຄື່ອງນຸ່ງ, ອາຫານການກິນແລະການອອກເດີນທາງຊຶ່ງເປັນຜະລິດຕະພັນທີ່ໝູນໃຊ້ປັດໄຈ IP ຂອງຮູບເງົາແບບລ້ຳຍຸກໃນທົ່ວໂລກ. ການບໍລິໂພກທີ່ຟົດຟື້ນແບບນີ້, ດ້ານໜຶ່ງແມ່ນຍ້ອນຜູ້ບໍລິໂພກຈີນມີຄວາມຕ້ອງການຕໍ່ເຄື່ອງບໍລິໂພກທີ່ມີຄຸນນະພາບສູງ, ອີກດ້ານໜຶ່ງແມ່ນຍ້ອນກະແສ “ການບໍລິໂພກຕາມຄວາມຮູ້ສຶກຂອງຕົນ” ຂອງຄົນຮຸ່ນໃໝ່: ຈູຕີທີ່ມີນິດໄສມັກມີຄວາມເຫັນໄປໃນດ້ານດີແລະຢຶດໝັ້ນ,ລວມທັງນິກທີ່ມີຄວາມສະຫຼາດສ່ອງໃສໃນຮູບເງົາໄດ້ກະຕຸ້ນໃຈແລະ ດຶງດູດໃຫ້ຜູ້ຊົມໄປຊື້ຜະລິດຕະພັນທີ່ມີສ່ວນກ່ຽວຂ້ອງກັບຮູບເງົາເລື່ອງນີ້, ນີ້ແມ່ນທ່າແຮງທີ່ອຸດົມສົມບູນສຳລັບຊັບສິນທາງປັນຍາຂອງດິສນີ.

ມົນສະເໜ່ຂອງຕະຫຼາດຈີນແມ່ນຢູ່ທີ່ສະພາບນິເວດການປະດິດສ້າງໃໝ່ຂອງອຸດສາຫະກຳແລະຄວາມສາມາດປັບຕົວໃຫ້ເຂົ້າກັບທ້ອງຖິ່ນຢ່າງເລິກເຊິ່ງ. ປັດຈຸບັນ, ບໍລິສັດດິສນີໄດ້ປະຖິ້ມແນວຄິດ “ໂຮລີວູດເປັນສູນກາງ” ແລະ ໄດ້ຈັດເອົາຄວາມຕ້ອງການຂອງຕະຫຼາດຈີນເຂົ້າໃນທົ່ວຂະບວນການປະດິດຄິດແຕ່ງແລະການໂຄສະນາເຜີຍແຜ່ຂອງຕົນ. ຈາກການຮ່ວມມືກັບບໍລິສັດຖ່າຍທຳຮູບເງົາວິຈິດສິນຊຽງໄຮ້ ເພື່ອຖ່າຍທຳຟີມໂຄສະນາZootopiaແບບຈີນ, ເຖິງການຈັດງານວາງສະແດງ “ຄຸ້ມຖະໜົນ ‌Zootopia” ຢູ່ເຂດສວນຈ່າງຢວນນະຄອນຊຽງໄຮ້, ບໍລິສັດດິສນີພວມຊຸກຍູ້ໃຫ້ IPZootopiaເຊື່ອມໂຍງເຂົ້າກັບວັດທະນະທຳຈີນຢ່າງເລິກເຊິ່ງ, ເຮັດໃຫ້ຈູຕີແລະນິກ ກາຍເປັນພະເອກ ທີ່ແທດເໝາະກັບຜູ້ບໍລິໂພກຈີນ. ເຮັດແບບນີ້, ດ້ານໜຶ່ງໄດ້ຕອບສະໜອງກັບຄວາມຕ້ອງການດ້ານວັດທະນະທຳຂອງຜູ້ຊົມຈີນ ແລະອີກດ້ານໜຶ່ງກໍເຮັດໃຫ້ IP ຮູບເງົາປາກົດມີພະລັງຊີວິດທີ່ເຂັ້ມແຂງກວ່າເກົ່າຢູ່ຕະຫຼາດແຜ່ນດິນໃຫຍ່ຈີນ.

ຄວາມສຳຄັນດ້ານຍຸດທະສາດຂອງຕະຫຼາດຈີນຍັງສະແດງໃຫ້ເຫັນໃນຖານະທີ່ເປັນ “ສະໜາມທົດລອງ” ແລະ “ຜູ້ກຳນົດທິດທາງ” ສຳລັບການໂຄສະນາ IP ຕ່າງໆໃນຂອບເຂດທົ່ວໂລກ. ຮູບເງົາເລື່ອງ“ ‌Zootopia 2” ປະສົບຜົນສຳເລັດຢູ່ຈີນກໍໄດ້ພິສູດເຖິງຄວາມເປັນໄປໄດ້ຂອງຮູບການທົ່ວຕ່ອງໂສ້ອຸດສາຫະກຳແບບ “ຮູບເງົາ+ວັດທະນະທຳການທ່ອງທ່ຽວ+ຜະລິດຕະພັນທີ່ກ່ຽວຂ້ອງ+ວິທະຍາສາດເຕັກໂນໂລຊີ” ຊຶ່ງກາຍເປັນບົດຮຽນແຫ່ງຜົນສຳເລັດທີ່ລ້ຳຄ່າໃນການເຜີຍແຜ່ IP ຂອງດິສນີໃນຂອບເຂດທົ່ວໂລກ. ປັດຈຸບັນນີ້, ບໍລິສັດຖ່າຍທຳຮູບເງົາຕ່າງໆຂອງໂຮລີວູດຂອງອາເມຣິກາໄດ້ພິຈາລະນາເຖິງຄວາມເຫັນຈາກຕະຫຼາດຈີນ ໃນການປະດິດຄິດແຕ່ງບົດລະຄອນແລະການເລືອກນັກສະແດງ, ບໍລິສັດດິສນີຍິ່ງໄດ້ຈັດເອົາອັດຕາສ່ວນອົງປະກອບຂອງຈີນໄວ້ຢູ່ຖານະບຸລິມະສິດສູງສຸດ. ການປ່ຽນແປງແບບນີ້ ໄດ້ສະແດງໃຫ້ເຫັນວ່າສິດປະກອບຄຳເຫັນຂອງຕະຫຼາດຈີນນັບມື້ນັບສູງຂຶ້ນ.

ປີ້ເຂົ້າຊົມຂາຍໄດ້ດີ, ຜະລິດຕະພັນສຳຮອງຕ່າງໆກໍຂາຍໄດ້ດີເຊັ່ນດຽວກັນ, ບົດຮຽນແຫ່ງຄວາມສຳເລັດຂອງຮູບເງົາເລື່ອງ“ ‌Zootopia 2” ສະທ້ອນໃຫ້ເຫັນຕະຫຼາດຈີນໄດ້ຫັນປ່ຽນຈາກ “ຜູ້ຮັບໃນເມື່ອກ່ອນ” ມາເປັນ “ຜູ້ກຳນົດໃນປັດຈຸບັນ”. ຍ້ອນວ່າສະຖານທີ່ແຫ່ງນີ້ມີກຸ່ມຜູ້ບໍລິໂພກຂະໜາດໃຫຍ່ທີ່ສຸດ, ມີພື້ນຖານບໍລິໂພກຕາມຄວາມຮູ້ສຶກທີ່ດີທີ່ສຸດແລະມີສະພາບແວດລ້ອມການເຜີຍແຜ່ທີ່ມີຊີວິດຊີວາທີ່ສຸດ ພ້ອມທັງມີພະລັງເຂັ້ມແຂງທີ່ຂັບເຄື່ອນການຍົກລະດັບອຸດສາຫະກຳ. ເວົ້າສຳລັບບໍລິສັດດິສນີແລ້ວ, ຖ້າເບິ່ງຂ້າມຕະຫຼາດຈີນກໍໝາຍເຖິງການປະຖິ້ມພື້ນທີ່ການເຕີບໂຕຂອງ IP ໃນອະນາຄົດ. ແຕ່ຖ້າພະຍາຍາມຂຸດຄົ້ນຄວາມສາມາດບົ່ມຊ້ອນຢູ່ນີ້ ຈຶ່ງຈະໄດ້ຮັບຄ່າຕອບແທນທັງປີ້ເຂົ້າຊົມແລະຄຸນຄ່າຂອງຍີ່ຫໍ້, ນີ້ກໍແມ່ນຄຳຕອບທີ່ຖືກຕ້ອງທີ່ສຸດທີ່ບໍລິສັດດິສນີຈະບໍ່ສາມາດເບິ່ງຂ້າມຕະຫຼາດຈີນມາໂດຍຕະຫຼອດ.

ໂດຍ: ຊີອາໄອ