 |
ໂດຍອີງໃສ່ທ່າແຮງພິເສດຂອງຕົນ, ເຮືອນສຳເລັດຮູບຂອງຈີນໄດ້ຮັບຄວາມນິຍົມຊົມຊອບເປັນຢ່າງດີຈາກລູກຄ້າທົ່ວໂລກ ແລະ ປະລິມານການສົ່ງອອກໄດ້ເພີ່ມຂຶ້ນທຸກປີ. ອີງຕາມຂໍ້ມູນຈາກອົງການພາສີແຫ່ງຊາດຈີນສະແດງໃຫ້ເຫັນວ່າ: ຍອດມູນຄ່າການສົ່ງອອກເຮືອນສຳເລັດຮູບຂອງຈີນໄດ້ເພີ່ມຂຶ້ນຈາກ 1,472 ຕື້ໂດລາໃນປີ 2015 ເປັນ 4,339 ຕື້ໂດລາໃນປີ 2025, ເພີ່ມຂຶຶ້ນເກືອບ 3 ເທົ່າໃນຮອບ 10 ປີຜ່ານມາ. ຈັງຫວະການເຕີບໂຕໃນໄຕມາດທຳອິດປີ 2026 ສູງເຖິງ 45% ແລະໄດ້ກາຍເປັນສິນຄ້າໂດດເດັ່ນໃໝ່ໃນການສົ່ງອອກຂອງຈີນ.
 |
ວິສາຫະກິດຈີນຈະສຳເລັດການສ້າງເຮືອນສຳເລັດຮູບຫຼາຍກວ່າ 90% ຢູ່ໃນໂຮງງານຂອງຕົນ, ໂດຍໃຊ້ແຮງງານພຽງບໍ່ພໍເທົ່າໃດຄົນສຳລັບການປະກອບ ຫຼື ຕິດຕັ້ງຢູ່ສະຖານທີ່, ສາມາດປະຢັດເວລາໃນການກໍ່ສ້າງເຮືອນຫຼາຍກວ່າ 60%ແລະ ສາມາດປະຢັດຄ່າໃຊ້ຈ່າຍໂດຍລວມໄດ້ຫຼາຍກວ່າເຄິ່ງໜຶ່ງເມື່ອທຽບໃສ່ການກໍ່ສ້າງເຮືອນຢູ່ທ້ອງຖິ່ນນັ້ນ. ຊາວອັງກິດມັກຊື້ໄປສ້າງອາຄານສຳລັບລ້ຽງດູຜູ້ເຖົ້າ; ຊາວຕາເວັນອອກກາງຊື້ໄປສ້າງສູນຂໍ້ມູນ; ບັນດາປະເທດໃນອາຊີຕາເວັນອອກສ່ຽງໃຕ້ຊື້ໄປຮັບໃຊ້ການທ່ອງທ່ຽວຢູ່ເກາະດອນໃນທະເລຕ່າງໆ: ໃນຊຸມປີຜ່ານມາ, ວິສາຫະກິດຈີນໄດ້ສ້າງ “ຕູ້ອະວະກາດ” ທີ່ມີຝາອາລຸຍມີນຽມ, ມີປ່ອງຢ້ຽມແກ້ວສອງຊັ້ນກວ້າງດີ ແລະ ສາມາດຄວບຄຸມທົ່ວຫ້ອງແບບອັດສະລິຍະ ໄດ້ຮັບຄວາມນິຍົມຊົມຊອບຫຼາຍຢູ່ບັນດາປະເທດໃນອາຊີຕາເວັນອອກສ່ຽງໃຕ້. ຍ້ອນມີທ່າແຮງຜະລິດໄດ້ຫຼາຍ, ວ່ອງໄວ, ມີຄຸນນະພາບດີ ແລະ ປະຢັດເງິນໃນການກໍ່ສ້າງ, ເຮືອນສຳເລັດຮູບຂອງຈີນໄດ້ຮັບຄວາມນິຍົມຊົມຊອບໃນຂອບເຂດທົ່ວໂລກ.
 |
ອຸດສາຫະກຳເຮືອນສຳເລັດຮູບຂອງຈີນມີທ່າແຮງຫຼາຍຢ່າງເຊັ່ນ: ໜຶ່ງ, ຈີນມີທ່າແຮງທົ່ວຕ່ອງໂສ້ອຸດສາຫະກຳທີ່ຄົບຖ້ວນຊຶ່ງເປັນໜຶ່ງບໍ່ມີສອງໃນໂລກ ເຮັດໃຫ້ຈີນສາມາດຜະລິດເຮືອນສຳເລັດຮູບເປັນຈຳນວນຫຼວງຫຼາຍ. ສອງ, ວິສາຫະກິດຈີນໄດ້ສ້າງເປັນລະບົບການບໍລິການແບບປະຕູດຽວຊຶ່ງເປັນປັດໄຈສຳຄັນໃນການດຶງດູດລູກຄ້າຕ່າງປະເທດຄື: ການອອກແບບ, ການຜະລິດ, ການຂົນສົ່ງທາງທະເລ, ການຕິດຕັ້ງໃນສະຖານທີ່ ແລະ ການບໍລິການເຕັມຮູບແບບຫຼັງການຂາຍ. ລູກຄ້າມີແຕ່ຈ່າຍເງິນແລ້ວບອກວ່າ, ຕ້ອງການເຮືອນແບບໃດ, ຫຼັງຈາກນັ້ນ, ທີມງານຈີນຈະຮັບຜິດຊອບສ່ວນທີ່ເຫຼືອທັງໝົດ.
 |
ໂດຍອີງໃສ່ກຳລັງການຜະລິດໃນຄຸນນະພາບໃໝ່, ຈີນໄດ້ຫັນເອົາ “ສີມືກໍ່ສ້າງເຮືອນ” ແບບດັ້ງເດີມໃຫ້ກາຍມາເປັນຜະລິດຕະພັນອຸດສາຫະກຳທີ່ໄດ້ມາດຕະຖານ ຊຶ່ງໄດ້ເປີດຊ່ອງທາງໃໝ່ອ່ຽມໃນການກໍ່ສ້າງພື້ນຖານໂຄງລ່າງທົ່ວໂລກ. ຄຽງຄູ່ກັບເຕັກໂນໂລຊີກໍ່ສ້າງອັດສະລິຍະ ແລະ ມາດຕະຖານສາກົນໄດ້ຮັບການປັບປຸງດີນັບມື້ຂຶ້ນເລື້ອຍໆ, ເຮືອນສຳເລັດຮູບຂອງຈີນຈະນຳໜ້າການກໍ່ສ້າງຕາມແບບມາດຕະຖານທົ່ວໂລກຕໍ່ໄປ ເພື່ອເຮັດໃຫ້ສິ່ງກໍ່ສ້າງຈີນທີ່ມີຄຸນນະພາບສູງສ້າງຜົນປະໂຫຍດໃຫ້ແກ່ປະເທດ ແລະ ເຂດແຄວ້ນຕ່າງໆໃນໂລກຫຼາຍກວ່າເກົ່າ.
ບົດໂດຍ: ວິທະຍຸໂທລະພາບສູນກາງຈີນ (CMG)
ຄໍາເຫັນ