ຍ້ອນຫຍັງແຂກຮັບເຊີນສາກົນຈຶ່ງເວົ້າວ່າ “ຈີນເປັນທາງເລືອກທີ່ຕ້ອງມີ”?

ວົງການພາຍນອກໄດ້ໃຫ້ຄວາມສົນໃຈໂດຍລວມວ່າ: ແຜນແມ່ບົດຂອງການພັດທະນາ 5 ປີຄັ້ງທີ 15 ຂອງຈີນໄດ້ຈັດວາງກ່ຽວກັບການເປີດກວ້າງການເປີດປະຕູສູ່ພາຍນອກທີ່ມີລະດັບສູງໂດຍສະເພາະ. ໃນ 5 ປີຂ້າງໜ້າ, ຈີນທີ່ເປີດປະຕູສູ່ພາຍນອກກວ້າງກວ່າເກົ່າຈະນໍາມາຊຶ່ງ “ໂອກາດໃໝ່ ແລະ ການຮ່ວມມືໃໝ່” ດ້ານໃດແດ່?

ຕະຫຼາດທີ່ມີປະຊາກອນຫຼາຍກວ່າ 1 ຕື້ 400 ລ້ານຄົນຂອງຈີນມີທ່າແຮງບົ່ມຊ້ອນດ້ານຄວາມຕ້ອງການພາຍໃນອັນມະຫາສານ, ພວມຫັນຈາກ “ໂຮງງານໂລກ”ໄປສູ່ “ສູນກາງແຫ່ງຄວາມຕ້ອງການ”. ພ້ອມດຽວກັນນີ້, ດັດຊະນີການປະດິດສ້າງໃໝ່ຂອງຈີນກ້າວເຂົ້າສູ່ 10 ອັນດັບທໍາອິດຂອງໂລກ, ການພັດທະນາໃນຂົງເຂດສີຂຽວ ແລະ ປັນຍາປະດິດໄດ້ສະໜອງແຮງຂັບເຄື່ອນໃໝ່ໃຫ້ແກ່ການຫັນປ່ຽນຮູບແບບການພັດທະນາຂອງເສດຖະກິດໂລກ.

ພາຍໃຕ້ສະພາບການທີ່ລັດທິປົກປ້ອງການຄ້າມີທ່າອ່ຽງຟື້ນຕົວ, ການເປີດປະຕູຂອງຈີນໄດ້ກາຍເປັນຄວາມແນ່ນອນທີ່ສາມາດຈັບຕ້ອງໄດ້ຂອງໂລກ. ນັບແຕ່ຈີນສ້າງຕັ້ງດ່ານພາສີອິດສະຫຼະທົ່ວເກາະໄຫຫຼໍາເປັນຕົ້ນມາ, ວິສາຫະກິດການຄ້າຕ່າງປະເທດທີ່ລົງທະບຽນໃໝ່ຢູ່ຈີນໄດ້ເພີ່ມຂຶ້ນ 65.7%, ຂະນະທີ່ຫົວໜ່ວຍທຸລະກິດ 11,773 ແຫ່ງໄດ້ຮັບອະນຸຍາດໃຫ້ນໍາໃຊ້ນະໂຍບາຍຍົກເວັ້ນພາສີ...ຄຸນຄ່າຂອງນະໂຍບາຍການເປີດປະຕູສູ່ພາຍນອກຂອງຈີນໄດ້ຫັນເປັນ “ຜົນໄດ້ຮັບ” ທີ່ເປັນຮູບປະທໍາ. ທ່ານ ປິເຕີ ເບີເນດ ປະທານສະພາການຄ້າອັງກິດ-ຈີນຂອງອັງກິດໃຫ້ຮູ້ວ່າ: ຂ້າພະເຈົ້າໃຫ້ຄໍາແນະນໍາແກ່ບໍລິສັດຈໍາໜ່າຍສິນຄ້າ ຫຼື ບໍລິສັດໃຫ້ການບໍລິການຂອງອັງກິດສະເໝີວ່າ ຖ້າຢາກປະສົບຜົນສໍາເລັດໃນໂລກກໍຕ້ອງເລືອກດໍາເນີນທຸລະກິດຢູ່ຈີນ.

ເດືອນພະຈິກປີນີ້, ຈີນຈະເປັນເຈົ້າພາບຈັດກອງປະຊຸມຜູ້ນຳການຮ່ວມມືດ້ານເສດຖະກິດເອເປັກຄັ້ງທີ 33 ຢູ່ນະຄອນເຊີນເຈິ້ນ ເພື່ອຊຸກຍູ້ການສ້າງປະຊາຄົມຮ່ວມຊາຕາກໍາອາຊີປາຊີຟິກໃຫ້ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາ. ຈາກເມືອງໂປອາວຮອດນະຄອນເຊີນເຈິ້ນ, ຈີນໄດ້ພິສູດໃຫ້ເຫັນຄັ້ງແລ້ວຄັ້ງອີກດ້ວຍພຶດຕິກໍາຕົວຈິງວ່າ: ການຊົມໃຊ້ໂອກາດຮ່ວມກັນ ແລະ ການຮ່ວມກັນສ້າງອະນາຄົດກັບໂລກນັ້ນຍັງເປັນການຢຶດໝັ້ນທີ່ບໍ່ປ່ຽນແປງຂອງຈີນ.