ນີ້ແມ່ນຄວາມຮູ້ສຶກຂອງ ທ່ານ ສົມຫວັງ ພອນຄໍາວົງສາ ເລຂາຄະນະບໍລິຫານງານພັກເມືອງ ນໍ້າບາກ ແຂວງ ຫຼວງພະບາງຕໍ່ວັນຊາດ ທີ 2 ທັນວາ ຄົບຮອບ 50 ປີ.
ທ່ານ ສົມຫວັງ ພອນຄໍາວົງສາ ກ່າວວ່າ: ຊາດລາວເປັນຊາດໜຶ່ງ ທີ່ມີຕົ້ນກໍາເນີດມາໄດ້ຫຼາຍພັນປີ ເຊິ່ງໄດ້ຜ່ານຂະບວນວິວັດແຫ່ງການຂະຫຍາຍຕົວຂອງສັງຄົມ ແລະ ລະບອບການເມືອງທີ່ແຕກຕ່າງກັນມາຫຼາຍລະບອບ, ນັບແຕ່ຍຸກທ້ອນໂຮມປະເທດຊາດ ທີ່ມີຄວາມເຂັ້ມແຂງໃນອິນດູຈີນ ແລະ ກໍໄດ້ຜ່ານຍຸກທີ່ປະເທດຊາດມີຄວາມແຕກແຍກ ແລະ ເປັນເມືອງຂຶ້ນຂອງຕ່າງຊາດເປັນຕົ້ນ ເປັນເມືອງຂຶ້ນຂອງສະຫຍາມ, ຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ເປັນເວລາເກືອບ 200 ປີ. ພາຍຫຼັງສົງຄາມໂລກຄັ້ງທີ່ 2 ສິ້ນສຸດລົງ ສະພາບການຂອງໂລກໄດ້ມີການຜັນແປໄປຢ່າງສັບສົນ ຫຼາຍປະເທດທີ່ເຄີຍເປັນເມືອງຂຶ້ນຂອງຈັກກະພັດແບບເກົ່າ ໄດ້ລຸກຂຶ້ນຕໍ່ສູ້ທວງເອົາຄວາມເປັນເອກະລາດໃຫ້ແກ່ຊາດຕົນ. ໃນໄລຍະນີ້ປະເທດລາວກໍເປັນໜຶ່ງໃນບັນດາປະເທດທີ່ຕໍ່ສູ້ຕ້ານຈັກກະພັດເພື່ອຍາດເອົາເອກະລາດ ໂດຍສະເພາະແມ່ນການປະກາດເອກະລາດ ໃນວັນທີ 12 ຕຸລາ 1945 ເຊິ່ງເປັນເຫດການປະຫວັດສາດອັນສຳຄັນຂອງຊາດລາວ ອອກຈາກການເປັນເມືອງຂຶ້ນຂອງຈັກກະພັດຜູ້ຮຸກຮານໂຕເກົ່າ. ເຖິງຢ່າງໃດກໍຕາມໃນກາງສະຕະວັດທີ່ XX ແມ່ນໄລຍະແຫ່ງການແຜ່ອໍານາດຂອງຈັກກະພັດຜູ້ຮຸກຮານ ໂດຍສະເພາະແມ່ນຈັກກະພັດໂຕໃໝ່ ເຊິ່ງໄດ້ມາຮຸກຮານອິນດູຈີນແທນຈັກກະພັດໂຕເເກົ່າ ແລະ ເຮັດສົງຄາມຮຸກຮານຢ່າງໂຫດຮ້າຍປ່າເຖື່ອນ. ສະນັ້ນ ດ້ວຍຄວາມຮຽກຮ້ອງຕ້ອງການອັນຮີບດ່ວນ ຈຳເປັນຕ້ອງມີພັກນຳພາ ເພື່ອຕໍ່ສູ້ຕ້ານຈັກກະພັດຜູ້ຮຸກຮານ ເພື່ອຍາດເອົາເອກະລາດມາສູ່ກຳມືຂອງປະຊາຊົນບັນດາເຜົ່າ, ພາຍໃຕ້ແສງສະຫ່ວາງຂອງພັກຄອມມູນິດອິນດູຈີນ ພັກປະຊາຊົນລາວ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ເຊິ່ງເປັນພັກປະຊາຊົນປະຕິວັດລາວໃນປະຈຸບັນເຊິ່ງພັກເຮົາໄດ້ນໍາໃຊ້ລັດທິມາກ-ເລນິນ ເຂົ້າໃນໂຄງການ ການເມືອງຄັ້ງທຳອິດຂອງພັກເພື່ອນຳພາ, ປຸກລະດົມປະຊາຊົນບັນດາເຜົ່າ ລຸກຂຶ້ນຕໍ່ສູ້ກູ້ຊາດ ເພື່ອຍາດເອົາເອກະລາດ ໃຫ້ປວງຊົນລາວທັງຊາດ. ຜ່ານຂະບວນການຕໍ່ສູ້ຢ່າງລະອິດລະອ້ຽວດ້ວຍຫຼາຍຮູບການເຊັ່ນ: ຕໍ່ສູ້ທາງດ້ານກຳລັງປະກອບອາວຸດ, ຕໍ່ສູ້ທາງດ້ານການເມືອງ, ຕໍ່ສູ້ທາງດ້ານການຕ່າງປະເທດ. ຍ້ອນການຕໍ່ສູ້ທີ່ເປັນທຳ ຈຶ່ງສາມາດຍາດໄດ້ໄຊຊະນະທຸກໆສະໜາມຮົບ ອັນສຳຄັນແມ່ນການປະຕິບັດ 3 ບາດຄ້ອນຍຸດທະສາດ ແລະ ສາມາດຍຶດອຳນາດແບບບົວບໍ່ຊຳນໍ້າບໍ່ຂຸ່ນ ແຕ່ສາມາດຈັບປາໄດ້ທັງໝົດ.ອັນນີ້ແມ່ນເຫດການປະຫວັດສາດສໍາຄັນຂອງໂລກ ໜ້ອຍປະເທດທີ່ສຸດຈະເຮັດໄດ້, ທັງໝົດນັ້ນແມ່ນຍ້ອນການນຳພາອັນປີຊາສາມາດ ແລະ ສະຫຼາດສ່ອງໃສຂອງພັກເຮົາ ໃນການນຳພາຕໍ່ສູ້ກູ້ຊາດສາມາດຍາດເອກະລາດອັນສົມບູນ ແລະ ສະຖາປະນາເປັນປະເທດຊາດ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ ປີ 1975 .
ວັນທີ 2 ທັນວາ ຄົບຮອບ 50 ປີທີ່ຈະມາເຖິງນີ້ ເປັນ50 ປີ ແຫ່ງການຜ່ານຜ່າຫຼາຍບັນຫາທີ່ມີຄວາມຫຍຸ້ງຍາກສັບສົນ ເປັນຕົ້ນແມ່ນການບູລະນາພັດທະນາປະເທດຊາດ ຫຼັງສົງຄາມ,ປະຕິບັດການປ່ຽນແປງໃໝ່ທີ່ມີຫຼັກການຂອງພັກ, ແຕ່ຍ້ອນການຍຶດໝັ້ນໃນລັດທິມາກ-ເລນິນ, ຄວາມສາມາດນໍາພາ ແລະ ກຳອຳນາດຂອງພັກເຮົາ ແລະ ຍ້ອນຄວາມປີຊາສາມາດ ແລະ ສະຫຼາດສ່ອງໃສຂອງພັກເຮົາທີ່ຮູ້ຈັກປັບຕົວຕາມສະພາບຄວາມເປັນຈິງ ຍຶດໝັ້ນໃນຫຼັກການ ແລະ ທິດທາງທີ່ພັກ-ລັດ ແລະ ປະຊາຊົນລາວບັນດາເຜົ່າ ເລືອກໄວ້ນັ້ນກໍຄື ເສັ້ນທາງກ້າວສູ່ສັງຄົມນິຍົມ. ຍ້ອນແນວນັ້ນ ປະເທດຊາດຂອງພວກເຮົາຈຶ່ງສາມາດຜ່ານຜ່າຂໍ້ຫຍຸ້ງຍາກນາໆປະການໄດ້ ແລະ ສາມາດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນກ້າວໜ້າຂຶ້ນເລື້ອຍໆ ເປັນຕົ້ນ: ມີລົດໄຟຄວາມໄວສູງ; ເຂື່ອນໄຟຟ້າ, ໂຄງລ່າງພື້ນຖານອັນຈຳເປັນ ໄດ້ຮັບການກໍ່ສ້າງແຕ່ຕົວເມືອງ ຫາ ຊົນນະບົດ ແລະ ອື່ນໆ.
ສຳລັບເມືອງນໍ້າບາກ ກໍເປັນເມືອງໜຶ່ງທີ່ໄດ້ຜ່ານການຕໍ່ສູ້ເພື່ອຄວາມເປັນເອກະລາດຂອງຊາດ ໂດຍສະເພາະແມ່ນບັ້ນຮົບປົດປ່ອຍນໍ້າບາກ ປີ 1968 ທີ່ລືຊື່. ຕະຫຼອດໄລຍະທ່ີຜ່ານມາພະນັກງານ, ທະຫານ, ຕຳຫຼວດ ຕະຫຼອດຮອດປະຊາຊົນບັນດາເຜົ່າ ໄດ້ເປັນເຈົ້າການປົກປັກຮັກສາ ແລະ ພັດທະນາທ້ອງຖິີ່ນຂອງຕົນ ເຮັດໃຫ້ເມືອງນໍ້າບາກໄດ້ຮັບການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ນັບມື້ດີຂຶ້ນເທື່ອລະກ້າວ, ເສດຖະກິດຂອງເມືອງຂະຫຍາຍຕົວສະເລ່ຍໃນແຕ່ລະປີບໍ່ຫຼຸດ 6% ລາຍໄດ້ຕໍ່ຫົວຄົນສະເລ່ຍ 22 ລ້ານກີບ/ຄົນ/ປີ. ອັນພົ້ນເດັ່ນແມ່ນສາມາດປະກາດເມືອງນ້ຳບາກເປັນເມືອງພົ້ນທຸກ ໃນທ້າຍປີ 2024 ແລະ ສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດໄດ້ 3 ບ້ານຄື: ບ້ານນໍ້າຖ້ວມໃຕ້, ບ້ານປາກມອງ ແລະ ບ້ານນະຄອນ.
ສະນັ້ນ, ສາມາດຢືນຢັນໄດ້ວ່າ ວັນຊາດແມ່ນວັນໜຶ່ງທີ່ມີຄວາມໝາຍຄວາມສຳຄັນ ທາງດ້ານປະຫວັດສາດຂອງຊາດລາວ ແມ່ນການປົດປ່ອຍປະເທດຊາດອອກຈາກການເປັນຂ້ອຍຂ້າມ້າຕ່າງຂອງຊາດອື່ນ ເຮັດໃຫ້ປະຊາຊົນບັນດາເຜົ່າເປັນເຈົ້າຂອງປະເທດຊຍາດຢ່າງແທ້ຈິງ. ປະເທດຊາດໄດ້ຮັບການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່ານັບມື້ນັບດີຂຶ້ນ.
ຄໍາເຫັນ