ບົດລາຍງານຍັງຊີ້ໃຫ້ເຫັນວ່າ: ຍອດຂາຍທັງໝົດຂອງຜູ້ຜະລິດລົດເຢຍລະມັນ ຄື: BMW, Mercedes-Benz ແລະ Volkswagen ຂາຍໄດ້ 13,157 ຄັນ, ເພີ່ມຂຶ້ນ 21.3% ຈາກປີກ່ອນ, ກວມເອົາປະມານ 70% ຂອງຍອດຂາຍລົດນຳເຂົ້າທັງໝົດໃນເດືອນທີ່ຜ່ານມາ.
ສ່ວນຍອດຂາຍຂອງ Tesla ໄດ້ເພີ່ມຂຶ້ນຢ່າງກ້າວກະໂດດ. ໂດຍປິດເດືອນມັງກອນດ້ວຍຍອດຂາຍ 1,966 ຄັນ, ເພີ່ມຂຶ້ນຈາກພຽງແຕ່ 5 ຄັນໃນໄລຍະດຽວກັນຂອງປີກາຍ. ໃນຂະນະດຽວກັນ, ຍອດຂາຍຂອງ BYD ບັນລຸ 1,347 ຄັນ ຫຼັງຈາກບໍລິສັດ BYD Korea ຊຶ່ງເປັນບໍລິສັດຍ່ອຍ ໃນ ສ ເກົາຫຼີ ເລີ່ມດໍາເນີນທຸລະກິດຢ່າງເຕັມຮູບແບບໃນປີກາຍ.
ເຈົ້າໜ້າທີ່ KAIDA ສັງເກດເຫັນວ່າ: ຜູ້ບໍລິໂພກຈະຊັກຊ້າໃນການຕັດສິນໃຈຊື້ລົດໄຟຟ້າໃນເດືອນມັງກອນ, ເນື່ອງຈາກວ່າລັດຖະບານຈະປະກາດການອຸດໜູນປະຈໍາປີຊ້າ. ຢ່າງໃດກໍຕາມ, ໃນປີນີ້, ຜູ້ບໍລິໂພກໄດ້ຮີບຮ້ອນຊື້ລົດ Tesla ເຖິງວ່າຈະມີຄວາມບໍ່ແນ່ນອນກ່ຽວກັບການອຸດໜູນ ຈາກປັດໄຈດ້ານລາຄາທີ່ຕໍ່າລົງ.
ທັງນີ້, ເມື່ອແຍກຕາມປະເພດນໍ້າມັນເຊື້ອໄຟ, ລົດໄຮບຣິດມີສ່ວນແບ່ງການຂາຍຫຼາຍທີ່ສຸດທີ່ 66.6% ຫຼື 13,949 ຄັນ, ຕາມດ້ວຍລົດໄຟຟ້າທີ່ 21.1%, ລົດນໍ້າມັນແອັດຊັງທີ່ 11.6% ແລະ ລົດກາຊວນທີ່ 0.7%.
ຄໍາເຫັນ