ຍທຂ ແຂວງອັດຕະປື ຫາລືການຈັດຕັ້ງປະຕິບັດໂຄງການກໍ່ສ້າງ ແລະ ສ້ອມແປງພື້ນຖານໂຄງລ່າງ.

ກອງປະຊຸມໄດ້ຮັບຟັງການລາຍງານຄວາມຄືບໜ້າການຈັດຕັ້ງປະຕິບັດບັນດາໂຄງການເລັ່ງດ່ວນບຸລິມະສິດຂອງແຂວງ ໃນປີ 2025 ແລະ ໂຄງການກໍ່ສ້າງທາງປູຢາງ 2 ຊັ້ນ, ທາງຫຼວງແຫ່ງຊາດ ເລກທີ່ 18A ໄລຍະ 1,2 ແລະ 3, ສືບຕໍ່ກໍ່ສ້າງເສັ້ນທາງປູຢາງ 2 ຊັ້ນ ເສັ້ນທາງເບີ 9037 ແຕ່ເມືອງໄຊເສດຖາ ຫາ ບ້ານສະແຄະ, ຍາວ 9 ກວ່າກິໂລແມັດ ມູນຄ່າ 22 ຕື້ກວ່າກີບ. ໃນນັ້ນ, ມີຄ່າຄຸ້ມຄອງບໍລິຫານໂຄງການ 124 ລ້ານກວ່າກີບ, ເລີ່ມລົງມືຈັດຕັ້ງປະຕິບັດໂຄງການແຕ່ວັນທີ 17 ກຸມພາ 2025, ຜູ້ຮັບເໝົາກໍ່ສ້າງແມ່ນ ບໍລິສັດ ລາດສະວົງພັດທະນາ ຈຳກັດຜູ້ດຽວ ໄດ້ກວດກາແລ້ວຄັ້ງທີ 1 ເທົ່າກັບ 81% ມູນຄ່າ 18 ຕື້ກວ່າກີບ. ສໍາເລັດປູຢາງຊັ້ນ 1, ຍັງຄ້າງປະຕິບັດ 18% ມູນຄ່າ 4 ຕື້ກວ່າກີບ, ຍັງຄ້າງປູຢາງຊັ້ນ 2, ເສັ້ນແບ່ງເລນ ແລະ ປ້າຍ ຊໍາລະແລ້ວ 12 ຕື້ກວ່າກີບ. ໃນນີ້, ຄ່າກໍ່ສ້າງ 12 ຕື້ກີບ, ຄ່າຄຸ້ມຄອງ 124 ລ້ານກວ່າກີບ, ຍັງຄ້າງຊຳລະຕາມການກວດກາ 6 ຕື້ກວ່າກີບ, ຍັງຄ້າງຊຳລະຕາມສັນຍາ 10 ຕື້ກວ່າກີບ. ໂຄງການກໍ່ສ້າງທາງລົງດອນແກ້ງໄຊ, ເດີ່ນຈອດລົດ, ປັບປຸງດອນແກ້ງໄຊ ມູນຄ່າ 8 ຕື້ກວ່າກີບ ເລີ່ມລົງມືຈັດຕັ້ງປະຕິບັດ 21 ກຸມພາ 2025, ຜູ້ຮັບເໝົາ ບໍລິສັດ ລາດສະວົງພັດທະນາ ຈຳກັດຜູ້ດຽວ, ໄດ້ກວດກາແລ້ວ ຄັ້ງທີ 1 ເທົ່າກັບ 82% ມູນຄ່າ 7 ຕື້ກວ່າກີບ, ຍັງຄ້າງປະຕິບັດ 17% ມູນຄ່າ 1 ຕື້ 500 ລ້ານກວ່າກີບ, ສ່ວນເດີນຈອດລົດທາງລົງເຊ ແມ່ນໄດ້ລໍຖ້າວຽກຕ້ານເຈື່ອນ ແລະ ຄູກັນນໍ້າ ຊຳລະແລ້ວ 3 ຕື້ກວ່າກີບ, ຍັງຄ້າງຊຳລະຕາມການກວດກາ 3 ຕື້ 600 ລ້ານກວ່າກີບ, ຍັງຄ້າງຊຳລະຕາມສັນຍາ 5 ຕື້ກວ່າກີບ. ຟື້ນຟູທາງປູຢາງ 2 ຊັ້ນເທດສະບານແຂວງຈຳນວນ 13 ເສັ້ນ, ມີລວງຍາວ 8 ກິໂລແມັດກວ່າ ມູນຄ່າ 18 ຕື້ກວ່າ ເລີ່ມລົງມືຈັດຕັ້ງປະຕິບັດໂຄງການແຕ່ວັນທີ 21 ກຸມພາ 2025, ຜູ້ຮັບເໝົາ ບໍລິສັດ ຫອມສົມບັດກໍ່ສ້າງຂົວທາງ ຈໍາກັດຜູ້ດຽວ, ຈັດຕັ້ງປະຕິບັດໄດ້ ແລະ ກວດກາແລ້ວ ຄັ້ງທີ 1 ເທົ່າກັບ 35% ມູນຄ່າ 6 ຕື້ກວ່າກີບ, ກຳລັງປະຕິບັດ 4 ເສັ້ນ, ທາງ 1 ໄອ ຄວາມຍາວ 300 ແມັດ ປູຢ່າງຊັ້ນ 1 ແລະ ປູອັດສະຟານທັບ, ສໍາລັບຢາງຊັ້ນ 2 ຂໍສະເໜີ ຊີດທັບຮອຍແຫກ ເຂດໜ້າສວນສາທາ. ສໍາລັບການນໍາໃຊ້ວັດສະດຸຊັ້ນຮອງພື້ນທາງ CBR-30 ສອງເສັ້ນ ໄດ້ສະຫຼຸບຕາມລາຄາຫົວໜ່ວຍ CBR-30, ຍັງຄ້າງປະຕິບັດ 64% ມູນຄ່າ 12 ຕື້ກວ່າກີບ ປັດຈຸບັນ ທາງບໍລິສັດໄດ້ກະກຽມ ວັດສະດູຊັ້ນພື້ນທາງພຽງພໍ, ຊຳລະແລ້ວ 6 ຕື້ກວ່າກີບ, ຍັງຄ້າງຊຳລະຕາມການກວດກາ 800 ລ້ານກວ່າກີບ, ຍັງຄ້າງຊຳລະຕາມສັນຍາ 12 ຕື້ກວ່າກີບ, ໂຄງການປັບປຸງຖານທີ່ໝັ້ນການປະຕິວັດເຂດລາວໃຕ້ໄລຍະ 2 ຢູ່ບ້ານ ອຸດົມໄຊ ເມືອງສະໜາມໄຊ ມີ 4 ໂຄງການ ລວມມູນຄ່າ 7 ຕື້ກວ່າກີບ. ໂຄງການຖົມດິນເພື່ອກະກຽມປູກຕົ້ນໄມ້ 2 ຂ້າງທາງມູນຄ່າ 1 ຕື້ກວ່າກີບ, ປະຕິບັດສຳເລັດ 100%, ໂຄງການຖົມດິນເຂດສະຫງວນເດີ່ນຈອດລົດມູນຄ່າ 2 ຕື້ກວ່າກີບ, ປະຕິບັດສຳເລັດ 100%, ໂຄງການກໍ່ສ້າງຂັ້ນໃດທາງຂຶ້ນ, ພະນັກກັນຕົກຈຸດຊົມວິວ ມູນຄ່າ 2 ຕື້ກວ່າກີບ, ປະຕິບັດສຳເລັດ 100%, ໂຄງການກໍ່ສ້າງນໍ້າລິນ ມູນຄ່າ 700 ລ້ານກວ່າກີບ, ປະຕິບັດສຳເລັດ 100%. ເລີ່ມລົງມືຈັດຕັ້ງປະຕິບັດໂຄງການແຕ່ວັນທີ 29 ທັນວາ 2024 ຜູ້ຮັບເໝົາ ບໍລິສັດ ມະຫາໄຊກໍ່ສ້າງສ້ອມແປງຂົວທາງ ຈຳກັດ ຜູ້ດຽວໄດ້ກວດກາແລ້ວ 100%.

(ພາບ-ຂ່າວ: ມະນີວອນ)