 |
ທ່ານ ວິໄຊ ພູມມີ ຫົວໜ້າພະແນກ ຍທຂ ແຂວງ ບໍລິຄຳໄຊ ລາຍງານສະພາບຄວາມເສຍຫາຍຂອງເສັ້ນທາງຫຼວງແຫ່ງຊາດ, ທາງຫຼວງທ້ອງຖິ່ນ, ຂົວ, ທໍ່ ແລະ ລະບົບຕ້ານເຈື່ອນ ທີ່ໄດ້ຮັບຜົນກະທົບຈາກສະພາບດິນຟ້າອາກາດທີ່ມີຝົນຕົກໜັກ ແລະ ພະຍຸພັດຜ່ານຢ່າງຕໍ່ເນື່ອງ ໃນໄລຍະເດືອນມິຖຸນາ ຫາ ສິງຫາ 2026 ຜ່ານມາ, ເສັ້ນທາງຫຼວງແຫ່ງຊາດເລກ 8Aໄດ້ຮັບຜົນກະທົບເກີດຂຶ້ນ 2 ຄັ້ງໃຫຍ່ຄື:ຄັ້ງທີ 1 (ຊ່ວງວັນທີ 14-16 ກໍລະກົດ 2026): ມີນໍ້າກັດເຊາະໜ້າທາງ ແລະ ຮ່ອງລະບາຍນໍ້າ 2 ຈຸດໃຫຍ່ ຢູ່ຊ່ວງກມ 35+800 (ພູຜາມ່ານ) ແລະ ກມ 43+600 (ພູໄຮ), ພ້ອມທັງມີດິນເຈື່ອນທັບທາງ 4 ຈຸດໃຫຍ່.ດິນເຈື່ອນທັບເຮືອນປະຊາຊົນ ຢູ່ເຂດບ້ານທ່າບັກ ເມືອງຄໍາເກີດມີຜູ້ເສຍຊີວິດ 3 ຄົນ.ຄັ້ງທີ 2 (ຊ່ວງວັນທີ 3-4 ສິງຫາ 2026): ເກີດດິນ ແລະ ຫີນກ້ອນໃຫຍ່ເຈື່ອນທັບຖົມໜ້າທາງຊ່ວງພູຜາມ່ານ ຈຳນວນ 9 ຈຸດ (ຍາວປະມານ 400 ແມັດ), ນໍ້າກັດເຊາະໜ້າທາງ 7 ຈຸດ, ຮ່ອງລະບາຍນໍ້າເສຍຫາຍ 3,500 ແມັດ ແລະ ນໍ້າຖ້ວມທາງ 5 ຈຸດ.ຮາກຖານເສົາຂົວຫ້ວຍຊາຍ (ກມ 20+800) ກໍຖືກນໍ້າກັດເຊາະເສຍຫາຍ ຈົນລົດບໍ່ສາມາດສັນຈອນໄດ້.ປັດຈຸບັນ, ພະແນກ ຍທຂ ແຂວງ ຮ່ວມກັບ ກົມຂົວທາງ ແລະ ບໍລິສັດຜູ້ຮັບເໝົາ ໄດ້ເລັ່ງນຳກົນຈັກເຂົ້າແກ້ໄຂສຸກເສີນ ໂດຍການຍົກຍ້າຍດິນ,ເຈາະລະເບີດກ້ອນຫີນໃຫຍ່ ແລະ ຕິດຕັ້ງກະຕ່າຫີນຢູ່ຈຸດຂົວຫ້ວຍຊາຍ,ເປີດໃຫ້ລົດນ້ອຍປະເພດກະບະສາມາດສັນຈອນຜ່ານໄດ້, ສ່ວນລົດຂົນສົ່ງສິນຄ້າແມ່ນຍັງບໍ່ທັນອະນຸຍາດໃຫ້ຜ່ານ ເນື່ອງຈາກມີຄວາມສ່ຽງໜ້າທາງຍຸບ ສຳລັບເສັ້ນທາງຫຼວງແຫ່ງຊາດເລກ 13 ໃຕ້ ທີ່ມີນໍ້າຖ້ວມຂັງ 2 ຈຸດ ປັດຈຸບັນນໍ້າແຫ້ງແລ້ວ ແລະ ສັນຈອນໄດ້ປົກກະຕິ. ດ້ານເສັ້ນທາງຫຼວງທ້ອງຖິ່ນ ຢູ່ບັນດາເມືອງ ເຊັ່ນ: ເມືອງໄຊຈໍາພອນ, ປາກກະດິງ, ບໍລິຄັນ, ທ່າພະບາດ ແລະ ເມືອງວຽງທອງ ແມ່ນໄດ້ຮັບຜົນກະທົບດິນເຈື່ອນ ແລະ ນໍ້າຖ້ວມເຊັ່ນກັນ ເຊິ່ງບາງເສັ້ນທາງຍັງບໍ່ສາມາດປະເມີນຜົນກະທົບໄດ້ເທື່ອ.ສຳລັບການຈັດຕັ້ງປະຕິບັດວຽກງານສຸກເສີນແມ່ນພົບຂໍ້ຫຍຸ້ງຍາກຫຼາຍ ໂຍສະເພາະສະພາບຝົນທີ່ຕົກລົງມາຢ່າງຕໍ່ເນື່ອງເຮັດໃຫ້ດິນເຈື່ອນຊໍ້າຊ້ອນ, ແລະ ການຊອກຫາບໍລິສັດເຂົ້າມາແກ້ໄຂວຽກສຸກເສີນ ຍ້ອນຜ່ານມາບໍລິສັດຈັດຕັ້ງປະຕິບັດວຽກສຳເລັດແລ້ວ ແຕ່ຍັງຂາດງົບປະມານຊຳລະ ແລະ ການນຳສະເໜີເຂົ້າແຜນງົບປະມານມີຄວາມຫຼ້າຊ້າ.ສ່ວນມູນຄ່າຄວາມເສຍຫາຍຍັງບໍ່ວາມາດປະເມີນໄດ້.
 |
ໂອກາດນີ້ ທ່ານ ເຫຼັກໄຫຼ ສີວິໄລ ໄດ້ມີຄຳເຫັນຊີ້ນຳໃຫ້ຄະນະກຳມະການປົກຄອງແຂວງ ບໍລິຄຳໄຊ ແລະ ແຂວງຄຳມ່ວນ ພະແນກການທີ່ກ່ຽວຂ້ອງຈົ່ງໄດ້ປະສານສົມທົບກັບບໍລິສັດທີ່ຮັບເໜົາແກ້ໄຂສຸກເສີນ ແກ້ໄຂເສັ້ນທາງໃຫ້ສາມາດນຳໃຊ້ໄດ້ປົກກະຕິໂດຍໄວ,ພ້ອມນັ້ນເກັບກຳຂໍ້ມູນເພື່ອປັບປຸງປູງຫຼັງສິ້ນສຸດລະດູຝົນ,ເສັ້ນທາງເລກທີ 8A ເປັນເສັ້ນຫຼັກໃນການຈໍລະຈອນສິນຄ້າລະຫວ່າງປະເທດຈາກ ສປປລາວ ອອກສູ່ ສສ ຫວຽດນາມ,ຈາກ ສສ ຫວຽດນາມເຂົ້າລາວອອກໄປສູ່ປະເທດທີ 3.ຂ່າວ: ສາຍສະໝອນ-ພາບ: ພຸດຕີ້
ຄໍາເຫັນ