 |
ທ່ານ ເຫຼັກໄຫຼ ສີວິໄລ ກ່າວວ່າ: ວຽກງານ 3 ສ້າງ ແມ່ນວຽກໜຶ່ງທີ່ມີຄວາມສຳຄັນ ເປັນປັດໄຈກະຕຸກຊຸກຍູ້ໃຫ້ວຽກງານການກໍ່ສ້າງຮາກຖານການເມືອງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງປະເທດ ຊຶ່ງກົມການເມືອງສູນກາງພັກໄດ້ເອົາໃຈໃສ່ຕິດຕາມຊີ້ນຳລັດຖະບານຢ່າງໃກ້ຊິດ ໃນການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງຕິດພັນກັບວຽກງານພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງ ຊຶ່ງກອງປະຊຸມໄດ້ສະຫຼຸບຕີລາຄາຄືນວຽກງານ 3 ສ້າງຂອງຂະແໜງ ຍທຂ ພາຍຫຼັງໄດ້ມີການແບ່ງຄວາມຮັບຜິດຊອບໃຫ້ບັນດາພະແນກ ຍທຂ, ນະຄອນຫຼວງ/ແຂວງໃນທົ່ວປະເທດ. ພ້ອມນັ້ນ, ໃນວາລະດຳເນີນກອງປະຊຸມໄດ້ພ້ອມກັນຄົ້ນ ຄວ້າ ແລະ ປະກອບຄໍາເຫັນໃສ່ຮ່າງຄຳແນະນຳສະເພາະລົງເລິກກ່ຽວກັບຄວາມຮັບຜິດຊອບວຽກງານບູລະນະຮັກສາ ແລະ ສ້ອມແປງທາງຫຼວງ ລວມທັງການຄຸ້ມຄອງນໍ້າໜັກລົດບັນທຸກອີກດ້ວຍ.
ໂອກາດດັ່ງກ່າວ, ທ່ານ ລິດຕາ ຂັດທິຍະ ຮອງລັດຖະມົນຕີກະຊວງ ຍທຂ ໄດ້ຍົກໃຫ້ເຫັນຜົນສໍາເລັດໃນການຈັດຕັ້ງປະຕິບັດວຽກງານ 3 ສ້າງຂັ້ນສູນກາງໄລຍະປີ 2019-2024 ເປັນຕົ້ນ ວຽກຂົວທາງໄດ້ສໍາເລັດໂດຍພື້ນຖານ ຮ່າງເນື້ອໃນແຜນຍຸດທະສາດຮອດປີ 2030, ວິໄສທັດຮອດປີ 2035 ແລະ ສ້າງແຜນການພັດທະນາ 5 ປີ (2021-2025) ຂອງຂະແໜງຂົວທາງ; ສໍາເລັດເນື້ອໃນ ແລະ ຮັບຮອງການແບ່ງຄວາມຮັບຜິດຊອບແຕ່ລະໜ້າວຽກໃນການຄຸ້ມຄອງວຽກງານບູລະນະຮັກສາ ແລະ ສ້ອມແປງທາງຫຼວງແຫ່ງຊາດ ແລະ ທາງຫຼວງທ້ອງຖິ່ນກັບພະແນກ ຍທຂ ແຂວງໄຊສົມບູນ; ໄດ້ປະສານສົມທົບກັບພະແນກ ຍທຂ ແຂວງ ແລະ ນະຄອນຫຼວງວຽງຈັນສໍາຫຼວດ, ເກັບກໍາຂໍ້ມູນສະພາບທາງຫຼວງເພື່ອຈັດລຽງບູລິມະສິດ, ສ້າງແຜນວຽກ ແລະ ແຜນງົບປະມານສໍາລັບວຽກບູລະນະຮັກສາ ແລະ ສ້ອມແປງທາງຫຼວງ. ນອກຈາກນີ້, ຍັງໄດ້ສໍາເລັດການສ້າງຕັ້ງໂຄງການສ້ອມແປງທາງຫຼວງແຫ່ງຊາດ 18 ໂຄງການ, ປະຈໍາແຕ່ລະແຂວງເພື່ອຄຸ້ມຄອງຕິດຕາມ, ກວດກາ ແລະ ຢັ້ງຢືນການຈັດຕັ້ງປະຕິບັດວຽກບູລະນະຮັກສາ ແລະ ສ້ອມແປງປີ 2022-2024
 |
ສຳລັບວຽກການບິນພົນລະເຮືອນໄດ້ສໍາເລັດການສ້າງວິໄສທັດຮອດປີ 2030, ຍຸດທະສາດການພັດທະນາການ ບິນພົນລະເຮືອນຮອດປີ 2030 ແລະ ແຜນພັດທະນາ 5 ປີ (2021-2025) ຂອງກົມການບິນພົນລະເຮືອນ, ໄດ້ຄົ້ນ ຄວ້າຮ່າງຂໍ້ຕົກລົງວ່າດ້ວຍການຄວບຄຸມ ແລະ ຈໍາກັດສິ່ງກີດຂວາງການບິນຂອງສະໜາມບິນ; ໄດ້ເຜີຍແຜ່ນິຕິກໍາວຽກງານປ້ອງກັນຄວາມປອດໄພການບິນ, ອໍານາດການປົກຄອງທ້ອງຖິ່ນ ແລະ ບັນດາບ້ານອ້ອມຮອບສະໜາມບິນໃນຂອບເຂດທົ່ວປະເທດ; ສ່ວນວຽກຂົນສົ່ງໄດ້ສຳເລັດການກໍ່ສ້າງ ແລະ ເປີດນຳໃຊ້ທ່າບົກຕາມແຜນຍຸດທະສາດເພີ່ມ 2 ແຫ່ງທ່າບົກທ່ານາແລ້ງນະຄອນຫຼວງວຽງຈັນ ແລະ ທ່າບົກວັງເຕົ່າຈຳປາສັກ; ຈັດຕັ້ງປະຕິບັດໂຄງການຂົນສົ່ງແບບຍືນຍົງໃນຕົວເມືອງນະຄອນຫຼວງວຽງຈັນ ເພື່ອຄຸ້ມຄອງບໍລິການໃນຕົວເມືອງ, ມີລົດເມດ່ວນ BRT, ປັບປຸງທາງຍ່າງ ແລະ ການສັນຈອນທີ່ບໍ່ມີເຄື່ອງຈັກ, ມີສູນບັນຊາການຈະລາຈອນ ແລະ ລະບົບເກັບເງິນຄ່າໂດຍສານ.
ຂ່າວ-ພາບ: ບຸນອູ້ມ-ບຸນຕອມ
ຄໍາເຫັນ