 |
ເຖິງວ່າເມື່ອປະເຊີນໜ້າກັບນະວັດຕະກໍາຂອງຈີນ, ບຸກຄົນຈໍານວນໜຶ່ງໃນປະເທດຕາເວັນຕົກໄດ້ສະກັດກັ້ນຢ່າງຕໍ່ເນື່ອງໂດຍໃຊ້ອັນທີ່ເອີ້ນວ່າຄວາມໝັ້ນຄົງເປັນຂໍ້ອ້າງກໍຕາມ, ແຕ່ຄວາມຈິງຄື: “ໂອກາດຈາກຈີນ 2.0” ໄດ້ກາຍເປັນຄວາມຮັບຮູ້ທີ່ເປັນເອກະພາບກັນໃນເວທີສາກົນໄປແລ້ວ. ຂ່າວສານອາຊີຂອງ ສ ເກົາຫຼີ ຊີ້ໃຫ້ເຫັນວ່າ: ຄວາມສາມາດໃນການຜະລິດອຸດສາຫະກໍາ, ນະວັດຕະກໍາດ້ານເຕັກໂນໂລຊີ ແລະ ມາດຕະການເປີດກວ້າງການເປີດປະຕູຂອງຈີນໄດ້ສ້າງພື້ນທີ່ໃໝ່ໃຫ້ແກ່ການເຕີບໂຕຂອງໂລກ. ຈາກການສົ່ງອອກຜະລິດຕະພັນທໍາຄວາມເຢັນສູ່ເອີຣົບ, ຮອດລົດພະລັງງານໃໝ່ຂອງຈີນໄດ້ຂາຍດິບຂາຍດີຢູ່ພາກພື້ນຕ່າງໆເປັນຕົ້ນແມ່ນ ສ ເກົາຫຼີ, ອົສຕຣາລີ ແລະ ອາຊີຕາເວັກອອກສ່ຽງໃຕ້, ຕະຫຼອດຮອດຈີນເປີດຕົວຢາປະດິດສ້າງໃໝ່ທີ່ຊ່ວຍຫຼຸດຜ່ອນຕົ້ນທຶນການປິ່ນປົວຢ່າງຫຼວງຫຼາຍ, ນະວັດຕະກໍາຂອງຈີນກໍາລັງກ້າວສູ່ທົ່ວໂລກ ແລະ ເຮັດໃຫ້ປະເທດຕ່າງໆຮ່ວມກັນຊົມໃຊ້ຜົນສໍາເລັດຈາກການພັດທະນາຂອງຈີນຫຼາຍຂຶ້ນກວ່າເກົ່າ. ຍົກເອົາຢາປະດິດສ້າງໃໝ່ຂອງຈີນເປັນຕົວຢ່າງ: 6 ເດືອນຕົ້ນປີນີ້, ຍອດມູນຄ່າການເຮັດທຸລະກໍາມອບສິດໃຫ້ແກ່ຕ່າງປະເທດສາມາດນໍາໃຊ້ຢາປະດິດສ້າງໃໝ່ຂອງຈີນມີປະມານ 110 ຕື້ໂດລາ, ກວມເອົາ 80% ຂອງມູນຄ່າທັງໝົດໃນທົ່ວປີໃນປີ 2025 ແລະ ໄດ້ສ້າງສະຖິຕິສູງສຸດຄັ້ງໃໝ່ໃນປະຫວັດສາດ.
ນະວັດຕະກໍາຂອງຈີນໄດ້ເພີ່ມຂີດຄວາມສາມາດໃຫ້ແກ່ອຸດສາຫະກໍາຂອງໂລກເຊັ່ນດຽວກັນ. ຜົນການຄຳນວນສະແດງໃຫ້ເຫັນວ່າ: ນັບແຕ່ປີ 2012 ຮອດປີ 2025, ວິສາຫະກິດຂອງຈີນໄດ້ຊຸກຍູ້ມູນຄ່າເພີ່ມດ້ານການສົ່ງອອກຂອງ 24 ກຸ່ມເສດຖະກິດກໍາລັງພັດທະນາໃຫ້ເພີ່ມຂຶ້ນເກືອບ 5 ເທົ່າ. ອົງການຈັດຕັ້ງສາກົນປະເມີນວ່າ: ເຕັກໂນໂລຊີພະລັງງານໃໝ່ຂອງຈີນເຮັດໃຫ້ໂລກບັນລຸຂະບວນການນໍາໃຊ້ພະລັງງານໝູນວຽນຢ່າງທົ່ວເຖິງໄວກວ່າເວລາກໍານົດຢ່າງໜ້ອຍ 10 ປີ.
ສິ່ງທີ່ໜ້າຊົມເຊີຍກວ່ານີ້ຄື: ຈີນຢຶດໝັ້ນໃນການເປີດປະຕູສູ່ພາຍນອກ. ຈຳນວນການດາວໂຫຼດແບບຈໍາລອງຂະໜາດໃຫຍ່ແບບເປີດ ຫຼື ໂອເພັນຊອສຂອງຈີນໃນທົ່ວໂລກຫຼາຍກວ່າ 10 ຕື້ຄັ້ງ, ເປັນອັນດັບໜຶ່ງຂອງໂລກ; ເຕັກໂນໂລຊີການເຕົ້າໂຮມຂອງນິວເຄລຍ ຫຼື nuclear fusion ທີ່ຄວບຄຸມໄດ້ ແລະ ອຸປະກອນເຕັກໂນໂລຊີກວນຕໍາຂອງຈີນໄດ້ເປີດໃຫ້ທົ່ວໂລກ, ຂະນະທີ່ສະຖານີການບິນອະວະກາດຂອງຈີນຈະຕ້ອນຮັບນັກບິນອະວະກາດຕ່າງປະເທດເຂົ້າໄປຊົມໃຊ້. ທ່ານ ເດຣິກ ໂກໂຕ ນັກວິຊາການຈາກປະເທດຊິມບັບເວ ເຫັນວ່າ: ການຮ່ວມມືທີ່ຕິດແທດຕົວຈິງລະຫວ່າງອາຟຣິກາ-ຈີນເຮັດໃຫ້ອາຟຣິກາເຫັນເຖິງຄວາມຫວັງໃນການຫຼຸດຜ່ອນຊ່ອງຫວ່າງດ້ານດີຈີຕອນ.
ຄວາມຈິງໄດ້ພິສູດໃຫ້ເຫັນຢ່າງຊັດເຈນແລ້ວວ່າ: ນະວັດຕະກໍາຂອງຈີນບໍ່ແມ່ນຜົນກະທົບຫາກແມ່ນໂອກາດ. ໃນທ່າມກາງສະພາບການທີ່ວິທະຍາສາດເຕັກໂນໂລຊີມີການຂະຫຍາຍຕົວຢ່າງວ່ອງໄວ, ຈີນຈະສືບຕໍ່ເພີ່ມແຮງຂັບເຄື່ອນໃໝ່ໃຫ້ແກ່ການພັດທະນາຂອງໂລກຢ່າງເຂັ້ມແຂງດ້ວຍ“ໂອກາດຈາກຈີນ 2.0”.
ຄໍາເຫັນ