ອຄ ຈັດອົບຮົມເສີມສ້າງທັກສະ ແລະ ຄວາມອາດສາມາດໃຫ້ພະນັກງານນໍາພາ-ຄຸ້ມຄອງ

ກໍ່ສ້າງພັກ-ພະນັກງານ; ດ້ານທິດສະດີ ແລະ ແນວທາງນະໂຍບາຍຂອງພັກ.

ໃນວັນທີ ວັນທີ 18 ພະຈິກ ຜ່ານມາທີ່ກະຊວງອຸດສາຫະກໍາ ແລະ ການຄ້າໄດ້ຈັດຊຸດຝຶກອົບຮົມວຽກງານຈັດຕັ້ງ ແລະ ກໍ່ສ້າງພັກ-ພະນັກງານ ໃຫ້ພະນັກງານນໍາພາ-ຄຸ້ມຄອງ ໄລຍະ 5 ວັນ, ໂດຍການເປັນປະທານຂອງທ່ານ ນາງ ຈັນສຸກ ແສງພະຈັນຮອງເລຂາຄະນະບໍລິຫານງານພັກກະຊວງອຸດສາຫະກຳ ແລະ ການຄ້າ; ທ່ານ ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກ; ມີຫົວໜ້າສູນພັດທະນາວຽກງານຈັດຕັ້ງ, ຄະນະຈັດຕັ້ງສູນກາງພັກ, ຄະນະປະຈໍາພັກ, ຄະນະພັກ, ເລຂາໜ່ວຍພັກຕະຫຼອດທັງພະນັກງານຫຼັກແຫຼ່ງ ຂອງບັນດາກົມກອງອ້ອມຂ້າງກະຊວງເຂົ້າຮ່ວມ.

ທ່ານ ນາງ ຈັນສຸກ ແສງພະຈັນ ໄດ້ກ່າວວ່າ: ບັນດາທ່ານທີ່ເຂົ້າຮ່ວມ ຊຸດຝຶກອົບຮົມໃນຄັ້ງນີ້ ລ້ວນແລ້ວແຕ່ເປັນພະນັກງານນຳພາ-ຄຸ້ມຄອງຫຼັກແຫຼ່ງສືບທອດປ່ຽນແທນ ທີ່ຢູ່ໃນແຜນກຳນົດພະນັກງານນຳພາ-ຄຸ້ມຄອງ ຂອງຂະແໜງ ອຄ, ທັງເປັນຄະນະປະຈຳພັກ, ຄະນະພັກ-ເລຂາໜ່ວຍພັກ, ຄະນະກົມ ແລະ ເປັນພະນັກງານນຳພາ-ຄຸ້ມຄອງ ຢູ່ໃນແຕ່ລະຂົງເຂດຂອງຂະແໜງ ອຄ.

ທ່ານກ່າວອີກວ່າ: ການຝຶກອົບຮົມຄັ້ງນີ້ ສຸດທີ່ມີຄວາມໝາຍ ຄວາມສຳຄັນ ເພື່ອເປັນການເສີມສ້າງທັກສະ ແລະ ຄວາມອາດສາມາດກຳໄດ້ຄວາມຮູ້ທາງດ້ານວຽກງານຈັດຕັ້ງ, ກໍ່ສ້າງພັກ-ພະນັກງານ, ກຳໄດ້ທາງດ້ານທິດສະດີ ແລະ ແນວທາງນະໂຍບາຍຂອງພັກ. ນອກຈາກນີ້, ກໍເປັນການປັບປຸງທັດສະນະຫຼັກໝັ້ນຂອງສະພາຊິກພັກ-ພະນັກງານ, ການປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ສ້າງຄວາມເປັນເອກະພາບກັບແນວທາງ, ແຜນນະໂຍບາຍຂອງພັກ ເພື່ອນຳໄປຜັນຂະຫຍາຍ ແລະ ຈັດຕັ້ງປະຕິບັດໃນຂົງເຂດວຽກງານຕົວຈິງ ທີ່ຕົນຮັບຜິດຊອບໃຫ້ເກີດດອກອອກຜົນສູງຊຶ່ງຈະຕ້ອງໄດ້ຍົກລະດັບໃຫ້ແກ່ພະນັກງານນຳພາ-ຄຸ້ມຄອງ ເພື່ອຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່; ສະນັ້ນ, ກະຊວງອຸດສາຫະກຳ ແລະ ການຄ້າ ຈຶ່ງໄດ້ສົມທົບກັບ ສູນພັດທະນາວຽກງານຈັດຕັ້ງ, ຄະນະຈັດຕັ້ງສູນກາງພັກ ປະຕິບັດຕາມແນວທາງນະໂຍບາຍຂອງພັກ ໃນການກໍ່ສ້າງ-ບຳລຸງ ພະນັກງານນຳພາ-ຄຸ້ມຄອງ ຫຼັກແຫຼ່ງຂອງຂະແໜງ ອຄ ໃຫ້ມີຄຸນນະພາບສູງ ເພື່ອຕອບສະໜອງ ໃຫ້ແກ່ການປະຕິບັດໜ້າທີ່ການເມືອງຂອງຂະແໜງການເງິນ ໃນສະເພາະໜ້າ ແລະ ຍາວນານ.ເຊື່ອໝັ້ນວ່າ ບັນດາສະຫາຍຈະພ້ອມກັນສຸມທຸກກຳລັງ ເຫື່ອແຮງ, ມີຄວາມອົດທົນ ເພື່ອຜ່ານຜ່າ ອຸປະສັກຕ່າງໆ ເນື່ອງຈາກວ່າບັນດາທ່ານ ລ້ວນແຕ່ແມ່ນພະນັກງານນຳພາ-ຄຸ້ມຄອງ ທີ່ກຳບັນຫາຂອງຂະແໜງ ອຄ ໄດ້ຢ່າງເລິກເຊິ່ງສົມຄວນ.

(ຂ່າວ: ອຄ)