 |
ທ່ານ ຄໍາແດງ ສີບຸນເຮືອງ ກໍາມະການພັກແຂວງ ຫົວໜ້າອົງການໄອຍະການປະຊາຊົນແຂວງໄດ້ກ່າວໄຂກອງປະຊຸມ ພ້ອມທັງຜ່ານທິດທາງປະຈໍາປີ 2026. ຈາກນັ້ນ, ຜູ້ເຂົ້າຮ່ວມກໍໄດ້ຮັບຝັງບົດສະຫຼຸບການເຄື່ອນໄຫວວຽກງານອົງການໄອຍະການປະຊາຊົນແຂວງປີ 2025 ແລະ ທິດທາງແຜນການປີ 2026, ຊຶ່ງ ໄດ້ຕີລາຄາໃຫ້ເຫັນເຖິງໝາກຜົນຂອງການເຄື່ອນໄຫວວຽກງານໃນແຕ່ລະດ້ານເປັນຕົ້ນວຽກງານການເມືອງນໍາພາແນວຄິດ, ວຽກງານຫ້ອງການ-ຈັດຕັ້ງ, ການຕິດຕາມກວດກາການເຄົາລົບ, ປະຕິບັດກົດໝາຍ ແລະ ການສັ່ງຟ້ອງຜູ້ຖືກຫາຂຶ້້ນສານຕາມກົດໝາຍ. ໃນນີ້, ໄດ້ຄົ້ນຄວ້າແກ້ໄຂຄຳຮ້ອງ, ຄຳສຳເໜີຂອງການຈັດຕັ້ງ, ພົນລະເມືອງຈໍານວນ 22 ສະບັບ, ແກ້ໄຂແລ້ວ 20 ສະບັບ ເທົ່າກັບ 90.91%. ໄດ້ຕິດຕາມກວດກາການປະຕິບັດຄໍາສັ່ງຕ່າງໆ ທີ່ອອກໄປແລ້ວຈຳນວນໄດ້ທັງໝົດ 2,482 ສະບັບ, ຄໍາສັ່ງຈັບຕົວ 81 ສະບັບ, ຄໍາສັ່ງກັກຂັງພາງ 1,019 ສະບັບ, ຄໍາສັ່ງຕໍ່ກັກຂັງພາງ 566 ສະບັບ, ຄໍາສັ່ງກວດຄົ້ນເຄຫາສະຖານ 4 ສະບັບ, ຄໍາສັ່ງປ່ອຍຕົວພາງ 102 ສະບັບ, ຄໍາສັ່ງຕໍ່ການສືບສວນ-ສອບສວນ 580 ສະບັບ, ຄໍາສັ່ງຊັດມ້ຽນຄະດີ 41 ສະບັບ, ອອກຂໍ້ຕົກລົງລົບລ້າງຄໍາສັ່ງຊັດມ້ຽນ 1 ສະບັບ, ຄໍາສັ່ງປ່ອຍຕົວຜູ້ຖືກຫາ 45 ສະບັບ, ຄໍາສັ່ງທວງສໍານວນຄະດີ 1 ສະບັບ, ຄະດີອາຍາ ຂັ້ນຕົນ, ຂັ້ນອຸທອນ ທັງໝົດ 838 ເລື່ອງ, ແກ້ໄຂແລ້ວ 809 ເລື່ອງ ເທົ່າກັບ 96.53% ທຽບໃສ່ແຜນການປີເຫັນວ່າລື່ນແຜນ 1.53%, ຍັງຄ້າງ 29 ເລື່ອງ. ຄະດີອາຍາ ທັງໝົດ 753 ເລື່ອງ, ແກ້ໄຂແລ້ວ 724 ເລື່ອງ ເທົ່າກັບ 96.15%, ຍັງຄົ້ນຄວ້າ 29 ເລື່ອງ (ໃນນີ້ ໄດ້ຖະແຫຼງສັ່ງຟ້ອງຂຶ້ນສານ 443 ເລື່ອງ, ສົ່ງກັບຄືນເຈົ້າໜ້າທີ່ສືບສວນ-ສອບສວນ 177 ເລື່ອງ, ຊັດມ້ຽນຄະດີ 36 ເລື່ອງ ແລະ ໄດ້ເຂົ້າຮ່ວມປະຊຸມສານ 116 ຄັ້ງ, ຖະແຫຼງຕໍ່ສານ 432 ເລື່ອງ, ສານເອົາຕາມ 432 ເລື່ອງ ເທົ່າກັບ 100%. ຄະດີແພ່ງ ທັງໝົດ 71 ເລື່ອງ, ແກ້ໄຂຖະແຫຼງສົ່ງສານ 71 ເລື່ອງ ເທົ່າກັບ 100%, ໄດ້ເຂົ້າຮ່ວມປະຊຸມສານ 68 ຄັ້ງ, ຖະແຫຼງຕໍ່ສານ 68 ເລື່ອງ, ສານເອົາຕາມ 68 ເລື່ອງ ເທົ່າກັບ 100%. ການແກ້ໄຂຄະດີຂັ້ນອຸທອນ ໄດ້ຮັບສໍານວນຄະດີອາຍາຂັ້ນອຸທອນ 2 ເລື່ອງ, ໄດ້ຖະແຫຼງສົ່ງສານຂັ້ນອຸທອນ 2 ເລື່ອງ ເທົ່າກັບ 100%, ໄດ້ເຂົ້າຮ່ວມປະຊຸມສານ 1 ຄັ້ງ, ຖະແຫຼງຕໍ່ສານ 1 ເລື່ອງ, ສານເອົາຕາມ 1 ເລື່ອງ ເທົ່າກັບ 100%. ໄດ້ຮັບສໍານວນຄະດີແພ່ງຂັ້ນອຸທອນ 12 ເລື່ອງ, ໄດ້ຖະແຫຼງສົ່ງສານຂັ້ນອຸທອນ 12 ເລື່ອງ ເທົ່າກັບ 100%, ໄດ້ເຂົ້າຮ່ວມປະຊຸມສານ 9 ຄັ້ງ, ຖະແຫຼງຕໍ່ສານ 9 ເລື່ອງ, ສານເອົາຕາມ 9 ເລື່ອງ ເທົ່າກັບ 100%.
 |
ໃນກອງປະຊຸມ, ຍັງມີການປະກອບຄໍາຄິດເຫັນໃສ່ຮ່າງບົດສະຫຼຸບ ແລະ ທິດທາງການແກ້ໄຂບັນຫາຄະດີຕ່າງໆຮ່ວມກັບຄູ່ຮ່ວມງານແຕ່ລະພາກສ່ວນເປັນຂອດການປະສານງານ, ການເກັບກໍາຂໍ້ມູນ, ການພິສູດຫຼັກຖານ, ການສືບສວນ-ສອບສວນຄະດີເພື່ອແນໃສ່ຮັບປະກັນຄວາມຖືກຕ້ອງ, ໂປ່ງໃສ ແລະ ຍຸຕິທໍາ. ຈາກນັ້ນ ຍັງໄດ້ຜ່ານຂໍ້ຕົກລົງ ຂອງອົງການໄອຍະການປະຊາຊົນສູງສຸດ ວ່າດ້ວຍການຍ້ອງຍໍກົມກອງ ແລະ ບຸກຄົນ ຂອງອົງການໄອຍະການປະຊາຊົນແຂວງ ຕາມເນື້ອໃນຂໍ້ແຂ່ງຂັນຮັກຊາດ ແລະ ພັດທະນາດ້ວຍຄໍາຂວັນ 3 ມີ 4 ຮັບປະກັນປະຈໍາປີ 2025.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ