ການພົບປະສອງຝ່າຍ ໃນຄັ້ງນີ້ ແມ່ນໂອກາດອັນສໍາຄັນເພື່ອປຶກສາຫາລື ແລະ ແລກປ່ຽນບົດຮຽນກ່ຽວກັບ ວຽກງານໄອຍະການ, ການທົບທວນຄືນໝາກຜົນການຮ່ວມມືໃນໄລຍະຜ່ານມາ ແລະ ວາງທິດທາງຕໍ່ໜ້າເພື່ອຍົກລະດັບສາຍພົວພັນຮ່ວມມືຂອງສອງອົງການໄອຍະການ ໃຫ້ນັບມື້ເຂົ້າສູ່ລວງເລິກ, ມີປະສິດທິພາບ ແລະ ເກີດດອກອອກຜົນຕົວຈິງໃນອະນາຄົດ. ສອງປະເທດລາວ - ລັດເຊຍແມ່ນຄູ່ຮ່ວມມືຍຸດທະສາດຮອບດ້ານ ແລະ ໄດ້ໃຫ້ການສະໜັບສະໜູນຊ່ວຍເຫຼືອຊຶ່ງກັນ ແລະ ກັນຕະຫຼອດມາ, ບໍ່ວ່າໃນໄລຍະແຫ່ງການຕໍ່ສູ້ປົດປ່ອຍຊາດ ກໍຄືໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ. ສິ່ງນີ້ແມ່ນພື້ນຖານອັນໜັກແໜ້ນທີ່ສຸດໃຫ້ແກ່ການຮ່ວມມືໃນທຸກຂົງເຂດ, ລວມທັງການຮ່ວມມືໃນຂົງເຂດຍຸຕິທໍາ ແລະ ວຽກງານໄອຍະການ. ການຮ່ວມມືລະຫ່ວາງອົງການໄອຍະການປະຊາຊົນຂອງສອງປະເທດກໍໄດ້ຮັບການເພີ່ມທະວີຂຶ້ນຢ່າງຕໍ່ເນື່ອງ, ໂດຍສະເພາະແມ່ນພາຍຫຼັງການລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນ ປີ 2023 ແລະ 2024 ທີ່ຜ່ານມາ. ດ້ວຍການຊີ້ນໍາ-ນໍາພາຈາກການນໍາຂອງສອງປະເທດ ແລະ ການນໍາພາໂດຍກົງຂອງອົງການໄອຍະການສູງສຸດຂອງສອງປະເທດ, ການຮ່ວມມືຍິ່ງແໜ້ນແຟ້ນ ແລະ ເຂົ້າສູ່ລວງເລິກກວ່າເກົ່າ. ບົນຈິດໃຈແຫ່ງສາຍພົວພັນອັນດີງາມ ແລະ ເພື່ອສືບຕໍ່ເສີມຂະຫຍາຍການຮ່ວມມືລະຫວ່າງສອງອົງການໄອຍະການ ໃຫ້ມີບາດກ້າວໃໝ່ ໂດຍຕ່າງຝ່າຍຕ່າງມີຄວາມເພິ່ງພໍໃຈໃນການສືບຕໍ່ການແລກປ່ຽນຄະນະຜູ້ແທນຂອງສອງຝ່າຍ ໂດຍສະເພາະແມ່ນການຢ້ຽມຢາມ ແລະ ແລກປ່ຽນບົດຮຽນຂອງຄະນະຜູ້ແທນຂັ້ນສູງຂອງສອງປະເທດ ແລະ ການແລກປ່ຽນບົດຮຽນທາງດ້ານວິຊາການ ກ່ຽວກັບວຽກງານໄອຍະການ ເພື່ອຮັດແໜ້ນສາຍພົວພັນຮ່ວມມື ຊຶ່ງກັນ ແລະ ກັນ ລະຫວ່າງສອງອົງການໄອຍະການ ສປປ ລາວ ແລະ ສ ຣັດເຊຍ ກ້າວສູ່ລວງເລິກຢ່າງຮອບດ້ານຕາມເງື່ອນໄຂທີ່ເໜາະສົມ, ຈັດກິດຈະກໍາແລກປ່ຽນຄວາມຮູ້ທາງດ້ານວິຊາສະເພາະ ໂດຍການຈັດການສົນ ທະນາ ຫຼື ຝຶກອົບຮົມທາງໄກ ໃນຫົວຂໍ້ທີ່ມີຄວາມສົນໃຈຮ່ວມກັນ ເຊັ່ນ: ການຕ້ານອາຊະຍາກໍາຂ້າມຊາດທີ່ມີການຈັດຕັ້ງ, ການຮ່ວມມືລະຫວ່າງປະເທດທາງອາຍາ, ການຕ້ານອາຊະຍາກໍາຢາເສບຕິດ, ການປົກປ້ອງສິດທິເດັດ ແລະ ອື່ນໆ, ແລກປ່ຽນຂໍ້ມູນຂ່າວສານ ແລະ ເອກະສານທາງວິຊາການ ເປັນຕົ້ນ: ແລະປ່ຽນຂໍ້ມູນກ່ຽວກັບກົດໝາຍ, ນິຕິກໍາ ແລະ ສິ່ງພິມວາລະສານຕ່າງໆ ທີ່ກ່ຽວຂ້ອງກັບວຽກງານໄອຍະການ ແລະ ການຮ່ວມມືໃນລະດັບທ້ອງຖິ່ນ; ໃນອະນາຄົດຫາກມີເງື່ອນໄຂ, ອາດຈະພິຈາລະນາຈັດກິດຈະກໍາແລກປ່ຽນບົດຮຽນລະຫວ່າງ ອົງການໄອຍະການປະຊາຊົນໃນລະດັບທ້ອງຖິ່ນຂອງສອງປະເທດ ຊຶ່ງອາດຈັດຜ່ານລະບົບທາງໄກ ຫຼື ຮູບແບບອື່ນໆທີ່ເໝາະສົມ.
(ຂ່າວ: ວົງເດືອນ)
ຄໍາເຫັນ