ອົງການຈັດຕັ້ງກໍາມະບານແຕ່ລະຂັ້ນ ຈົ່ງເປັນເຈົ້າການປະຕິບັດຕາມສິດໜ້າທີ່ຂອງຕົນ

ເນື່ອງໃນໂອກາດວັນກຳມະກອນສາກົນທີ 1 ພຶດສະພາ ຄົບຮອບ 140 ປີ, ສູນກາງສະຫະພັນກໍາມະບານລາວໄດ້ແຈ້ງການເຖິງ ສະຫະພັນກໍາມະບານແຕ່ລະຂັ້ນ ໃນທົ່ວປະເທດ ເພື່ອຈັດຕັ້ງການສະ ເຫຼີມສະຫຼອງວັນກໍາມະກອນສາກົນປີນີ້ ໃຫ້ເປັນຂະບວນຟົດຟື້ນ ແລະ ກວ້າງຂວາງ ດ້ວຍຂະບວນການ ແລະ ເນື້ອໃນ ດັ່ງນີ້: ໃຫ້ຖືເອົາວັນກໍາມະກອນສາກົນ ວັນທີ 1 ພຶດສະພາ ແມ່ນວຽກໜຶ່ງ ແລະ ກິດຈະກໍາໜຶ່ງທີ່ສໍາຄັນ ຂອງສະຫະພັນກໍາມະບານລາວ, ເພາະເປັນການທົບທວນຫວນຄືນພາລະກໍາປະຫວັດສາດ, ມູນເຊື້ອ ແລະ ສືບຕໍ່ຜັນຂະຫຍາຍເພື່ອປົກປ້ອງສິດ ແລະ ຜົນປະໂຫຍດອັນຊອບທໍາ ຂອງສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ ໂດຍຈັດຕັ້ງການໂຄສະນາ, ປາຖະກະຖາມູນເຊື້ອວັນກໍາມະກອນສາກົນຕິດພັນກັບການສຶກສາອົບຮົມໃຫ້ແກ່ສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານໃຫ້ຮັບຮູ້, ເຂົ້າໃຈຢ່າງເລິກເຊິ່ງຕໍ່ພາລະກໍາປະຫວັດສາດຂອງກໍາມະກອນສາກົນ ແລະ ຂອງກໍາມະກອນລາວ ແລະ ເພື່ອເຮັດໃຫ້ສະມາຊິກກໍາມະບານ, ກຳມະກອນ ແລະ ຊາວຜູ້ອອກແຮງງານມີຄວາມສາມັກຄີ, ມີຄວາມຕື່ນຕົວທາງການເມືອງ, ຮູ້ສິດ, ພັນທະ ແລະ ຜົນປະໂຫຍດຂອງຕົນ, ມີຄວາມຮູ້ຄວາມສາມາດທາງດ້ານວິທະຍາສາດເຕັກໂນໂລຊີ, ມີອະລິຍະທຳທາງດ້ານຈິດໃຈແລະ ມີວິໄນ ໃນການອອກແຮງງານ; ສ້າງເງື່ອນໄຂໃຫ້ຄະນະພັກ, ຄະນະນໍາຂັ້ນຕ່າງໆ ລົງພົບປະຢ້ຽມຢາມກໍາມະກອນຢູ່ຕາມໂຮງຈັກ, ໂຮງງານ ແລະ ຫົວໜ່ວຍແຮງງານ ຕາມເງື່ອນໄຂ ແລະ ຄວາມສາມາດຕົວຈິງ; ສ້າງຂະບວນການ ແລະ ກິດຈະການຕ່າງໆໃຫ້ເປັນຂະບວນກວ້າງຂວາງ ເຊັ່ນ: ການອະນາໄມສໍານັກງານ, ອົງການ, ສະຖານທີ່ເຮັດວຽກ, ໂຮງຈັກໂຮງງານ; ຈັດກິດຈະກໍາຖາມ-ຕອບ ຄວາມຮູ້ກ່ຽວກັບວັນກໍາມະກອນສາກົນ; ຈັດການແຂ່ງຂັນສີມືແຮງງານ, ການບໍລິຈາກເລືອດ ເພື່ອຊ່ວຍເຫຼືອສັງຄົມ, ການແຂ່ງຂັນກິລາ, ສິລະປະວັນນະຄະດີ ແລະ ອື່ນໆ.

ທ່ານ ຄໍາຜອຍ ວັນນະສານ ໄດ້ໃຫ້ຮູ້ຕື່ມອີກວ່າ: ສໍາລັບສູນກາງສະຫະພັນກຳມະບານລາວ ຈະໄດ້ຈັດກິດຈະກໍາຍ່າງເພື່ອສຸຂະພາບເນື່ອງໃນໂອກາດສະເຫຼີມສະຫຼອງວັນກຳມະກອນສາກົນ ໃນ 1 ພຶດສະພາ 2026 ຢູ່ທີ່ສວນປະຕູໄຊ, ໂດຍຈະເຊີນການນໍາພັກ, ລັດ, ສະມາຊິກກໍາມະບານ; ຜູ້ບໍລິຫານຈັດການຫົວໜ່ວຍທີ່ໃຊ້ແຮງງານ, ຜູ້ຕາງໜ້າກໍາມະກອນ ແລະ ຊາວຜູ້ອອກແຮງງານຈໍານວນໜຶ່ງເຂົ້າຮ່ວມ ແລະ ຮຽກຮ້ອງມາຍັງການນໍາພັກ, ລັດ ແຕ່ລະຂັ້ນ ເອົາໃຈໃສ່ຊີ້ນໍາ-ນໍາພາ ການຈັດຕັ້ງກໍາມະບານໃນຂັ້ນຂອງຕົນໃຫ້ສາມາດປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ຖືກຕ້ອງ ແລະ ປະກົດຜົນເປັນຈິງ; ຮຽກຮ້ອງມາຍັງອົງການຈັດຕັ້ງກໍາມະບານຢູ່ແຕ່ລະຂັ້ນ, ແຕ່ລະບ່ອນ ຈົ່ງເປັນເຈົ້າການຈັດຕັ້ງປະຕິບັດຕາມສິດ ແລະ ໜ້າທີ່ຂອງຕົນ ໃຫ້ຖືກຕ້ອງ, ເຂັ້ມງວດ ແລະ ມີປະສິດທິຜົນສູງ; ເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃຫ້ຖືກຕ້ອງ ແລະ ມີປະສິດທິຜົນ, ຕັ້ງໜ້າປະຕິບັດໜ້າທີ່, ສິດ ແລະ ພັນທະຂອງຕົນ ໃຫ້ມີຜົນສໍາເລັດ, ມີປະສິດຕິຜົນສູງ.

ຂ່າວ-ພາບ: ບຸນອູ້ມ