ວັນທີ8 ພຶດສະພາ 2024 ນີ້ ທີ່ຫ້ອງການ ອົງການກາແດງແຂວງຫຼວງພະບາງ ໄດ້ມີພິທີສະເຫຼີມສະຫຼອງ ວັນກາແດງ ແລະຊີກວົງເດືອນແດງສາກົນ ຄົບຮອບ 161 ປີ, ມີ ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງແຂວງຫຼວງພະບາງ ພະອາຈານ ຕ່າ ຕິດສະວັງໂສ ເຈົ້າອະທິການວັດພູຊ້າງຄຳໂພໄຊຊະນະ ນະຄອນ ຫຼວງພະບາງ, ພ້ອມດ້ວຍພະນັກງານອົງການກາແດງແຂວງ, ພະສົງ-ສາມະເນນ ແລະນັກຮຽ-ນັກສຶກສາ ເຂົ້າຮ່ວມ. ທ່ານ ວຽງສະຫວັນ ກະເສີມສຸກ ໄດ້ມີຄຳເຫັນກ່າວເປີດງານວ່າ: ສະຫະພັນກາແດງ ແລະຊີກວົງເດືອນແດງສາກົນ ແມ່ນເຄືອຂ່າຍ ມະນຸດສະທໍາທີ່ໃຫຍ່ທີ່ສຸດຂອງໂລກ ແລະໄດ້ມີຂະບວນການເຄື່ອນໄຫວຕາມ 7 ຫຼັກການພື້ນຖານຄື: ມະນຸດສະທໍາ, ເປັນກາງ, ທ່ຽງທໍາ, ເປັນເອກະລາດ, ສະໝັກໃຈ, ເປັນເອກະພາບ ແລະມີນ້ຳໃຈສາກົນ, ແນວຄວາມຄິດຕໍ່ກັບວັນກາແດງ ແລະຊີກວົງເດືອນແດງສາກົນ ໄດ້ລິເລີ່ມ ພາຍຫຼັງສົງຄາມໂລກ ຄັ້ງທີ I, ເຊີ່ງໄດ້ຍົກຂຶ້ນມາປຶກສາຫາລືກັນ ໃນກອງປະຊຸມໃຫຍ່ກາແດງສາກົນ ຄັ້ງທີ 14 ກ່ຽວກັບ “ ທຳນຽມປະຕິບັດ ທີ່ສາມາດຈັດຂຶ້ນໄດ້ທຸກໆປີ ໃນທົ່ວໂລກ,ເຊິ່ງຈະມີສ່ວນສະໜັບສະໜູນອັນສໍາຄັນຕໍ່ສັນຕິພາບ”. ໂດຍສືບເນື່ອງຈາກ ກອງປະຊຸມຄັ້ງນັ້ນ, ໃນທີ່ສຸດ ກໍໄດ້ເລືອກເອົາ ວັນຄົບຮອບ ວັນເກີດຂອງຜູ້ກໍ່ຕັ້ງຄະນະກໍາມະການກາແດງສາກົນ ຄື: ທ່ານ ອັງຣີ ດຸຍນັງ ເປັນວັນກາແດງ ແລະຊີກວົງເດືອນແດງສາກົນ ວັນທີ8 ພຶດສະພາ ປີນີ້ ໄດ້ໝູນວຽນມາຄົບຮອບ 161 ປີ ໂດຍມີການສະເຫຼີມສະຫຼອງພາຍໃຕ້ຫົວຂໍ້: “ຮັກສາຫຼັກມະນຸດສະທຳໃຫ້ຄົງຢູ່”. ສະເພາະອົງການກາແດງແຫ່ງຊາດລາວ ໄດ້ສ້າງຕັ້ງຂື້ນໃນວັນທີ່ 1 ມັງກອນ 1955 ທັງໄດ້ຮັບການພັດທະນາເປັນກ້າວໆມາ, ຈາກສູນກາງ ມາຮອດຂັ້ນແຂວງ,ສະເພາະອົງການກາແດງແຂວງຫຼວງພະບາງແລ້ວສ້າງຕັ້ງຂຶ້ນໃນວັນທີ12 ຕຸລາ 1993,ເປັນອົງການຈັດຕັ້ງທາງສັງຄົມ ທີ່ເຄື່ອນໄຫວວຽກງານມະນຸດສະທໍາຢ່າງເປັນເອກະລາດ ຢູ່ພາຍໃຕ້ລັດຖະທໍາມະນູນ, ກົດໝາຍ ແລະ 7 ຫຼັກການພື້ນຖານ ຂອງຂະບວນການກາງແດງ ແລະຊີກວົງເດືອນສາກົນ, ໃນນັ້ນ ໄດ້ປະຕິບັດ 9 ວຽກງານສໍາຄັນ ເຊັ່ນ: ການຊ່ວຍເຫຼືອບັນເທົາທຸກເບື້ອງຕົ້ນ, ການປຸກລະດົມຂົນຂວາຍການບໍລິຈາກເລືອດ ແລະສະໜອງເລືອດທີ່ປອດໄພ, ການສົ່ງເສີມສຸຂະພາບຂັ້ນຟື້ນຖານ, ການປະຖົມພະຍາບານ, ການກູ້ໄພສຸກເສີນ, ການໂຄສະນາຂົນຂວາຍແຫຼ່ງທຶນ, ການສ້າງສະມາຊິກ ແລະອາສາສະໝັກກາແດງ, ການສືບທາວຫາຍາດພີ່ນ້ອງ ແລະການພົວພັນ ແລະ ການຮ່ວມມືສາກົນ.
ກິດຈະກຳການສະເຫຼີມສະຫຼອງຄັ້ງນີ້ ຜູ້ເຂົ້າຮ່ວມ ໄດ້ຮັບຟັງການບັນຍາຍທຳເລື່ອງການເຮັດບຸນດ້ວຍການບໍລິຈາກເລືອດ ຈາກ ພະອາຈານ ຕ່າ ຕິດສະວັງໂສ, ພ້ອມທັງຈັດຕັ້ງການຮັບບໍລິຈາກເລືອດແບບສະໝັກໃຈ ແລະປຸກລະດົມການຮັບບໍລິຈາກເຄື່ອງນຸ່ງຮົ່ມ, ເຂົ້າສານ-ອາຫານແຫ້ງ ແລະເງິນສົດ ເພື່ອຊ່ວຍເຫລືອສັງຄົມ, ພ້ອມທັງແຈກລາງວັນໃຫ້ກັບຜູ້ບໍລິຈາກເລືອດ ໂດຍມີຫຼາຍພາກສ່ວນເຂົ້າຮ່ວມກິດຈະກຳຢ່າງມ່ວນຊື່ນ.
ຄໍາເຫັນ