ທ່ານ ວັນໄຊ ພອງສະຫວັນ ໄດ້ຊີ້ແຈງກ່ຽວກັບບັນຫາໃນຕໍ່ໜ້າຢາກໃຫ້ເພີ່ມທະວີວຽກງານກວດກາປົກກະຕິ ແລະ ການກວດກາແຕ່ຫົວທີ ເປັນບັນຫາຕົ້ນຕໍຂອງວຽກງານກວດກາ. ວຽກງານກວດກາ ແມ່ນໜຶ່ງໃນກົນໄກສຳຄັນຂອງລັດ ໃນການຄໍ້າປະກັນຕໍ່ການນຳໃຊ້ສິດອຳນາດ ແລະ ຊັບພະຍາກອນຂອງຊາດເປັນໄປຢ່າງຖືກຕ້ອງ ໂປ່ງໃສ ແລະ ຮັບໃຊ້ປະຊາຊົນຢ່າງແທ້ຈິງ, ການກວດກາ ເພື່ອເປັນການປັບປຸງ ບໍ່ແມ່ນເພື່ອການລົງໂທດ ຫຼືໃຊ້ວິໃນຂອງພະນັກງານແຕ່ຢ່າງດຽວ, ການກວດກາ ແມ່ນເສົາຄໍ້າຫຼັກ, ການກວດກາດີຈະເຮັດໃຫ້ກົດໝາຍມີຄວາມສັກສິດ, ມີຄວາມເຂັ້ມງວດ ແລະ ຈະບໍ່ໃຫ້ບຸກຄົນໃດຢູ່ເໜືອກົດໝາຍ. ດັ່ງນັ້ນ, ໃນໄລຍະຜ່ານມາວຽກງານກວດກາ, ຄະນະພັກແຕ່ລະຂັ້ນນັບທັງສູນກາງ ແລະ ທ້ອງຖິ່ນ ໄດ້ມີຄວາມພະຍາຍາມເອົາໃຈໃສ່ໃນການຊີ້ນໍາວຽກງານກວດກາ ເປັນຕົ້ນ ແມ່ນການກວດກາປົກກະຕິ, ກວດກາແຕ່ຫົວທີ ແຕ່ໃນການຈັດຕັ້ງປະຕິບັດຕົວຈິງນັ້ນ ເຫັນວ່າຍັງບໍ່ທັນໄດ້ເຮັດຢ່າງຕໍ່ເນື່ອງເປັນປົກກະຕິ ແລະ ບໍ່ທັນໄດ້ຮັບປະສິດທິພາບ ແລະ ປະສິດທິຜົນແທ້. ຕໍ່ບັນຫາດັ່ງກ່າວ ການນຳແຕ່ລະຂັ້ນ ຕ້ອງໄດ້ເພີ່ມທະວີໃນການຊີ້ນຳ-ນໍາພາຕົວຈິງ. ຜ່ານມາ, ພວກເຮົາເວົ້າວ່າວຽກງານກວດກາ ເປັນວຽກງານທີ່ມີຄວາມສຳຄັນ ເປັນວຽກງານຍຸດທະສາດ ແຕ່ໃນພາກປະຕິບັດ ໃນການຊີ້ນຳບັນຊາຕົວຈິງບໍ່ທັນໄດ້ສະແດງອອກຢ່າງເດັ່ນຊັດ ໃຫ້ສົມກັບເປັນວຽກງານຍຸດທະສາດ ເປັນວຽກງານຂອງພັກແທ້, ເມື່ອເປັນແນວນັ້ນ, ທາງອົງການກວດກາແຫ່ງລັດ ໄດ້ຄົ້ນຄວ້າຄຳແນະນຳເຖິງເລຂາຄະນະພັກກະຊວງ, ອົງການ, ເລຂາຄະນະພັກແຂວງ ຕ້ອງເພີ່ມທະວີວຽກງານກວດກາປົກກະຕິ, ກວດກາແຕ່ຫົວທີຂອງຄະນະພັກແຕ່ລະຂັ້ນ ເພື່ອເປັນບ່ອນອີງໃຫ້ການຈັດຕັ້ງປະຕິບັດ ມັນຍັງຄາຢູ່ຂອດນໍາພາການຈັດຕັ້ງປະຕິບັດຕົວຈິງ, ບັນດາທິດທາງ, ແຜນການວາງອອກຈະຢູ່ໃນຂົງເຂດໃດກໍຕາມ ແມ່ນມີຄວາມຖຶກຕ້ອງສອດຄ່ອງ ບໍ່ວ່າໃນຂົງເຂດໃດກໍຕາມ ແຕ່ຂອດການບັນຊາ ນໍາພາການປະຕິບັດຕົວຈິງ ເປັນບັນຫາໜຶ່ງທີ່ພວກເຮົາຈະຕ້ອງໄດ້ເອົາໃຈໃສ່ແທ້ໆ, ໃນຖານະເບື້ອງກວດກາ ຈະເອົາໃຈໃສ່ຊຸກຍູ້, ຕິດຕາມໃນການຈັດຕັ້ງປະຕິບັດວຽກງານດັ່ງກ່າວໃຫ້ມັນດີກວ່າເກົ່າ.
ບັນຫາທີສອງ: ກ່ຽວກັບການຍົກສູງປະສິດທິພາບຂອງວຽກງານກວດກາ, ວຽກງານກວດກາໄດ້ເຮັດຫຼາຍ ແຕ່ປະສິດທິພາບບໍ່ສູງ. ສະນັ້ນ, ຈະເຮັດແນວໃດເພື່ອໃຫ້ວຽກງານກວດກາໃນຕໍ່ໜ້າຮັບປະກັນໃຫ້ມີປະສິດທິພາບ ປະສິດທິຜົນ, ຂໍສະເໜີບາງທັດສະນະດັ່ງນີ້: ອັນໜຶ່ງ ເບິ່ງຄືນລະບົບກົນໄກຂອງການກວດກາຂອງພວກເຮົາໃນຕໍ່ໜ້າ ພາຍຫຼັງທີ່ພວກເຮົາໄດ້ມີການປັບປຸງລະບົບການນໍາພາ-ການຄຸ້ມຄອງບໍລິຫານລັດຢູ່ຂັ້ນທ້ອງຖິ່ນ ເພື່ອໃຫ້ລະບົບການນຳພາບັນຊາແທດຕົວຈິງ, ເພີ່ມທະວີການສຶກສາອົບຮົມການປູກຈິດສຳນຶກໃຫ້ພະນັກງານ, ສະມາຊິກພັກ ແລະ ປະຊາຊົນໃຫ້ມີຄວາມຮັບຮູ້ເຂົ້າໃຈຕໍ່ວຽກງານກວດກາ ໂດຍສະເພາະແມ່ນວຽກງານການຕ້ານ ແລະ ສະກັດກັ້ນ ການສໍ້ລາດບັງຫຼວງຍັງເປັນບັນຫາ ເນື່ອງຈາກວ່າການເຮັດຕົວຈິງຜ່ານມາບໍ່ທັນໄດ້ກວ້າງຂວາງແທ້ ບໍ່ທັນເລິກເຊິ່ງ ບໍ່ທັນເຖິງທຸກເປົ້າໝາຍ, ເພື່ອໃຫ້ເຂົ້າໃຈ ແລະ ເພື່ອຈະເຮັດແນວໃດໃຫ້ເຂົາເຈົ້າເຂົ້າໃຈເຖິງລະບຽບກົດໝາຍ ແລະ ໃຫ້ເຂົ້າໃຈເຖິງໄພອັນຕະລາຍຕໍ່ການສໍ້ລາດບັງຫຼວງ ເພື່ອບໍ່ຢາກໃຫ້ພະນັກງານເຮັດໃນສິ່ງທີ່ບໍ່ຖຶກຕ້ອງ ອັນນີ້ພວກເຮົາຕ້ອງໄດ້ປູກຈິດສຳນຶກແທ້. ຊຶ່ງຂ້າພະເຈົ້າຈະເຮັດເປັນໂຄງການໜຶ່ງ ເພື່ອສຶກສາອົບຮົມວຽກງານດັ່ງກ່າວ ແລະ ຈະນໍາເອົານິຕິກຳ ເປັນຕົ້ນ ກົດໝາຍຕ່າງໆ ທີ່ພົວພັນເຖິງວຽກງານດັ່ງກ່າວໄປເຜີຍແຜ່, ເຊື່ອມຊຶມແຕ່ລະເປົ້າໝາຍໃຫ້ມີຄວາມຮັບຮູ້ ແລະ ເຂົ້າໃຈ ແລະ ໃຫ້ເຂົາເຈົ້າມີສ່ວນຮ່ວມ.
ບັນຫາທີສາມ: ເພື່ອຢາກໃຫ້ວຽກງານກວດກາມີຄຸນນະພາບ ມັນແມ່ນຄວາມຈຳເປັນ ແມ່ນການຍົກສູງຄຸນນະພາບ, ຄັນຢາກໄປກວດກາຜູ້ອື່ນ ເຮົາຕ້ອງໄດ້ກວດກາໂຕເອງກ່ອນ ຊຶ່ງໃນຫຼັກການ, ໃນແນວທາງນະໂຍບາຍຂອງພັກແມ່ນຖຶກຕ້ອງ ເປັນຕົ້ນ ສ້າງຄວາມເປັນແບບຢ່າງນໍາໜ້າຂອງພະນັກງານນຳພາແຕ່ລະຂັ້ນ ກໍແມ່ນຂອງພະນັກງານກວດກາ ຈະຕ້ອງໄດ້ເອົາໃຈໃສ່ໃນການບຳລຸງຍົກລະດັບທັດສະນະທາງດ້ານການເມືອງ, ຄຸນສົມບັດສິນທຳປະຕິວັດ, ຈັນຍາບັນ-ຈັນຍາທຳໃຫ້ມີວິໃນແທ້ ບໍ່ໃຫ້ມີການສວຍໃຊ້ໜ້າທີ່ໃນທາງບໍ່ຖຶກຕ້ອງ, ຈະເອົາໃຈໃສ່ ແລະ ມີຄວາມພະຍາຍາມເຮັດໃຫ້ບັນຫາດັ່ງກ່າວ ເພື່ອໃຫ້ການກວດກາແຕ່ລະຂັ້ນມີຄວາມປອດໃສ, ພ້ອມທັງສ້າງວຽກງານວິຊາສະເພາະໃຫ້ກາຍເປັນຜູ້ທີ່ມີຄວາມຊໍານານງານໃຫ້ເປັນມືອາຊີບ. ຕໍ່ບັນຫາດັ່ງກ່າວສະເໜີໃຫ້ເລຂາພັກແຂວງເບິ່ງຄືນກົງຈັກການຈັດຕັ້ງ ວຽກງານກວດກາແຕ່ລະຂັ້ນທີ່ຊ່ວຍວຽກ ບໍ່ໃຫ້ມີສະພາບທີ່ວ່າ ການຊັບຊ້ອນພະ ນັກງານທີ່ມີບັນຫາໄປຢູ່ບ່ອນອື່ນ ຖ້າມີບັນຫາຕ້ອງໃຫ້ບ່ອນນັ້ນເປັນຜູ້ແກ້, ການຍົກຍ້າຍພະນັກງານທີ່ມີບັນຫາໄປຢູ່ບ່ອນອື່ນ ມັນບໍ່ແມ່ນການແກ້ໄຂບັນຫາ ມັນແມ່ນການຈະສ້າງບັນຫາຕື່ມ. ດັ່ງນັ້ນ, ຂໍໃຫ້ຄະນະພັກ, ອົງການປົກ ຄອງຊ່ວຍການຊັບຊ້ອນຈັດວາງໃຫ້ຖຶກຕ້ອງແທ້. ຂ່າວ: ພູວັນ; ພາບ: ສຳນານ
ຄໍາເຫັນ