ອົງການກວດສອບແຫ່ງລັດ ຈະຫັນການເຮັດວຽກໃນລະບົບທີ່ທັນສະໄໝ

ທ່ານ ປະທານອົງການກວດສອບແຫ່ງລັດ ຊີ້ແຈງວ່າ: ບັນຫາອົງການກວດສອບແຕ່ລະປີ ຫຼື 5 ປີ ກວດສອບເຫັນຫຼາຍ ແຕ່ແກ້ໄຂໄດ້ໜ້ອຍ ແຕ່ຖ້າທຽບໃນປີ 2021 ໃສ່ 2025, ຕົວເລກການລະເມີດຖ້າເບິ່ງໃນພາບ ລວມກໍມີທ່າອ່ຽງຫຼຸດລົງ, ເປີເຊັນການແກ້ໄຂເຖິງບໍ່ຫຼາຍກໍ່ມີທ່າຕັ້ງໜ້າຂຶ້ນຈາກ 5% ຂຶ້ນມາເປັນ 48%, ແຕ່ສິ່ງທີ່ຕັ້ງໜ້າໄປກວ່ານັ້ນ ຈາກການກວດສອບທີ່ເຄັ່ງຄັດຂຶ້ນ ແມ່ນໄດ້ຈຳກັດການລະເມີດວິໃນແຜນການ ການເງິນໄດ້ຫຼາຍ ແລະ ໄດ້ສ່ອງແສງໃຫ້ເຫັນໃນການເກັບລາຍຮັບເຂົ້າງົບປະມານແຫ່ງລັດທີ່ມີຕົວເລກສູງຂຶ້ນ.

ສຳລັບແຜນການຕໍ່ໜ້າທີ່ວາງຄາດໝາຍໄວ້ສູງນັ້ນ, ຕໍ່ບັນຫານີ້ກໍຈະໃຊ້ຄວາມພະຍາຍາມເຮັດຕາມເປົ້າໝາຍທີ່ວາງໄວ້ ໂດຍອີງໃສ່ແບບແຜນການເຮັດວຽກແບບໃໝ່ ຂອງພະນັກງານທີ່ມີຄວາມຮູ້ຄວາມສາມາດ ແລະ ຄວາມຮັບຜິດຊອບສູງຂຶ້ນ, ໃຊ້ເວລາສັ້ນຂຶ້ນ, ນຳໃຊ້ເຄື່ອງມືທີ່ທັນສະໄໝ ແລະ ເຕັກໂລຊີເຂົ້າໃນລະບົບຂໍ້ມູນຂ່າວສານ,ລະບົບດີຈີຕອນ ແລະ ລະບົບເອໄອເຂົ້າມາຊ່ວຍໃນການເຮັດວຽກ, ສຳລັບການເຮັດວຽກຂອງຜູ້ກວດສອບ ແລະ ຜູ້ຖືກກວດສອບ ບາງຄັ້ງກໍບໍ່ສອດຄ່ອງກັນ ແຕ່ການເຮັດວຽກຂອງພວກເຮົາແມ່ນອີງໃສ່ກົດໝາຍ ແລະ ນິຕິກຳ, ຕໍ່ກັບການຍົກສູງຄຸນນະພາບການກວດສອບ ແມ່ນໄດ້ເອົາໃສ່ທີ່ສຸດ ແລະ ກໍໄດ້ມີການປັບປຸງຈຸດທີ່ບົກຜ່ອງ ຊຶ່ງຈຸດບົກຜ່ອງນັ້ນ ເປັນຕົ້ນ ບຸກຄະລະກອນບໍ່ພຽງພໍ ທາງດ້ານປະລິມານ ແລະ ຄຸນນະພາບ. ໃນນັ້ນ ບັນຫາເລື່ອງນິຕິກຳ, ມາດຕະຖານ, ບັນຫາເລື່ອງງົບປະມານ, ວັດຖຸອຸປະກອນ, ພາຫະນະຮັບໃຊ້ແມ່ນຍັງມີຂໍ້ຈຳກັດຫຼາຍໃນການເຄື່ອນໄຫວລົງເຮັດວຽກງານ.

ໃນຂະນະດຽວກັນ, ຕໍ່ກັບບັນຫາການເຮັດວຽກຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດທັບຊ້ອນກັນນັ້ນ, ໃນຄວາມເປັນຈິງສອງອົງການດັ່ງກ່າວແມ່ນບໍ່ໄດ້ເຮັດວຽກທັບຊ້ອນກັນ ໂດຍທຸກອົງການມີພາລະບົດບາດ ແລະ ໜ້າທີ່ຂອງຕົນທີ່ຊັດເຈນ, ກວດສອບແມ່ນມີໜ້າທີ່ກວດສາມປະເພດຄື: ກວດສອບຄວາມສອດຄ່ອງຂອງການຈັດຕັ້ງປະຕິບັດກັບກົດໝາຍ, ກວດສອບການເງິນ ແລະ ກວດສອບຜົນການຈັດຕັ້ງປະຕິບັດ,ອົງການກວດສອບ ແມ່ນໄປເຮັດວຽກໃນເປົ້າໝາຍທີ່ຈຳກັດ ໄປຕາມແຜນທີ່ສະພາແຫ່ງຊາດ ແລະ ສະພາປະຊາຊົນແຂວງຮັບຮອງຕາມພາລະບົດບາດທີ່ຊັດເຈນ. (ຂ່າວ-ພາບ: ສຳນານ)