 |
ວາລະທີ 1 ຂອງກອງປະຊຸມ, ທ່ານ ຕ້ອຍ ພົນທິລາດ ຮອງປະທານອົງການກວດສອບແຫ່ງລັດ ໄດ້ເຜີຍແຜ່ເອກະສານປາຖະກະຖາ ວັນສະຖາປະນາ ສປປ ລາວ ຄົບຮອບ 50 ປີ (2/12/1975-2/12/2025) ແລະ ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ (13/12/1920-13/12/2025) ຊຶ່ງທ່ານໄດ້ເຜີຍແຜ່ໃຫ້ຮູ້ເຖິງໄຊຊະນະຢ່າງສົມບູນຂອງການປະຕິວັດຊາດ ປະຊາທິປະໄຕ ແລະ ຜົນງານພາລະກິດປົກປັກຮັກສາ ແລະ ພັດທະນາປະເທດຊາດ 50 ປີຜ່ານມາ ພາຍໃຕ້ການນໍາພາຂອງພັກ ຊຶ່ງໄດ້ເຮັດໃຫ້ໂສມໜ້າຂອງປະເທດຊາດ ມີການປ່ຽນແປງໃຫຍ່ຫຼວງຮອບດ້ານ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ ສະແດງອອກໃນແຕ່ລະຂົງເຂດວຽກງານໃນດານການເມືອງ, ການພັດທະນາເສດຖະກິດ-ສັງຄົມ; ພ້ອມນີ້, ກໍໄດ້ເຜີຍແຜ່ໃຫ້ຮູ້ກ່ຽວກັບ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ກັບພາລະກິດປົດປ່ອຍຊາດ ແລະ ຜົນງານ-ຄຸນງາມຄວາມດີຂອງ ປະທານ ໄກສອນ ພົມວິຫານ ພ້ອມທັງໄດ້ເນັ້ນບາງເນື້ອໃນ ເພື່ອເສີມຂະຫຍາຍມູນເຊື້ອວັນທີ 2 ທັນວາ ໃນພາລະກິດປົກປັກຮັກສາ ແລະ ພັດທະນາປະເທດຊາດ, ຕັ້ງໜ້າຮໍ່າຮຽນແບບຢ່າງຄຸນສົມບັດຂອງ ປະທານ ໄກສອນ ພົມວິຫານ. ທ່ານ ຕ້ອຍ ພົນທິລາດ ຍັງໄດ້ເຜີຍແຜ່ເອກະສານ ວັນສ້າງຕັ້ງການທູດລາວ ຄົບຮອບ 80 ປີ (12/10/1945-12/10/2025) ໂດຍໄດ້ເຜີຍແຜ່ປະຫວັດຄວາມເປັນມາຂອງວັນການທູດລາວ ໃນແຕ່ລະໄລຍະ ແລະ ຜົນສຳເລັດໃນການເປີດກວ້າງການພົວພັນສາກົນຂອງ ສປປ ລາວ, ບາງຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ຈາກການເຄື່ອນໄຫວວຽກງານກຕ່າງປະເທດຂອງ ສປປ ລາວ. ນອກນີ້, ກໍໄດ້ເຜີຍແຜ່ເອກະສານວັນຍຶດອໍານາດ ຄົບຮອບ 80 ປີ (23/8/1945-23/8/2025) ແລະ ຄົບຮອບ 50 ປີ (23/8/1975-23/8/2025).
 |
ວາລະທີ 2, ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ໄດ້ເຜີຍແຜ່ເອກະສານວັນລັດຖະທໍາມະນູນ ຄົບຮອບ 34 ປີ (15/8/1991-15/8/2025) ໂດຍໄດ້ເຜີຍແຜ່ໃຫ້ຮູ້ເຖິງຄວາມໝາຍລັດຖະທໍາມະນູນ ແລະ ວັນລັດຖະທໍາມະນູນ ແຫ່ງ ສປປ ລາວ, ຄວາມສໍາຄັນຂອງລັດຖະທໍາມະນູນ, ຄວາມເປັນມາໃນການສ້າງ ແລະ ປັບປຸງລັດຖະທໍາມະນູນ, ການຕີລາຄາດ້ານດີການຈັດຕັ້ງປະຕິບັດລັດຖະທໍາມະນູນ, ຕີລາຄາດ້ານອ່ອນ ແລະ ບົດຮຽນທີ່ຖອດຖອນໄດ້ ໃນຕະຫຼອດ 34 ປີຜ່ານມາ; ພ້ອມນີ້, ກໍເຜີຍແຜ່ໃຫ້ຮູ້ເນື້ອໃນສຳຄັນຂອງລັດຖະທໍາມະນູນ ສະບັບປັບປຸງປີ 2025. ພ້ອມດຽວກັນນີ້, ທ່ານ ຍັງໄດ້ເຜີຍແຜ່ເອກະສານ ວັນປະກາດເອກະລາດ ຄົບຮອບ 80 ປີ (12/10/1945-12/10/2025) ໂດຍໄດ້ເຜີຍແຜ່ໃຫ້ຮູ້ ບັນດາປັດໄຈສຳຄັນ ທີ່ສ້າງເງື່ອນໄຂໃຫ້ແກ່ການປະກາດເອກະລາດ, ຄວາມໝາຍສຳຄັນວັນປະກາດເອກະລາດ, ສິ່ງທີ່ຕ້ອງເອົາໃຈໃສ່ໃນການເສີມຂະຫຍາຍມູນເຊື້ອວັນປະກາດເອກະລາດ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
 |
ວາລະທ້າຍຂອງກອງປະຊຸມ, ທ່ານ ວຽງທະວີສອນ ເທບພະຈັນ ໄດ້ມີຄໍາເຫັນໂອ້ລົມຕໍ່ກອງປະຊຸມ ຊຶ່ງໄດ້ໃຫ້ທິດຊີ້ນໍາໃນການຈັດຕັ້ງປະຕິບັດວຽກງານຂອງອົງການກວດສອບແຫ່ງລັດ.
(ຂ່າວ: ສຸກສະຫວັນ, ພາບ: ຄໍາພັນ)
ຄໍາເຫັນ