ກອງປະຊຸມໄດ້ຜ່ານບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໃນໄລຍະ 1 ປີຜ່ານມາ, ພ້ອມທັງໄດ້ກໍານົດທິດທາງວຽກງານຈຸດສຸມໃນຕໍ່ໜ້າ; ພ້ອມນີ້, ຍັງໄດ້ຮັບຟັງການເຜີຍແຜ່ບາງເນື້ອໃນທີ່ສຳຄັນ ຂອງບົດສະຫຼຸບຕີລາຄາວຽກງານຈັດຕັ້ງ ແລະ ບົດຄຳເຫັນໂອ້ລົມຂອງຄະນະພັກຂັ້ນເທິງ ຕໍ່ການສະຫຼຸບຕີລາຄາວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດ ປະຈໍາປີ 2024, ເຜີຍແຜ່ ໂດຍ ສະຫາຍ ຕ້ອຍ ພົນທິລາດ ຄະນະປະຈໍາພັກ ປະທານຄະນະກວດກາພັກ ຮອງປະທານອົງການກວດສອບແຫ່ງລັດ.
ນອກນັ້ນ, ກອງປະຊຸມ ຍັງໄດ້ຮັບຟັງການມີຄໍາເຫັນເຈາະຈີ້ມຈາກ ສະຫາຍ ວຽງທະວີສອນ ເທບພະຈັນ ກ່ຽວກັບສະພາບການຈັດຕັ້ງປະຕິບັດວຽກງານຈັດຕັ້ງກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໃນໄລຍະຜ່ານມາ ແລະ ການປະກອບຄໍາຄິດຄໍາເຫັນແລກປ່ຽນຂອງບັນດາກົມ, ຫ້ອງການ, ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ແລະ ອົງການກວດສອບປະຈໍາພາກ ຕໍ່ວຽກງານຈັດຕັ້ງກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຢູ່ໃນຂົງເຂດຕົນຮັບຜິດຊອບ. ພ້ອມນັ້ນ, ກອງປະຊຸມໄດ້ສະຫຼຸບຕີລາຄາຂະບວນການແຂ່ງຂັນ-ຍ້ອງຍໍຜົນງານ ປະຈໍາປີ 2024 ແລະ ທິດທາງແຜນການ ປະຈໍາປີ 2025, ໄດ້ມອບໃບຍ້ອງຍໍໃຫ້ແກ່ພະນັກງານ-ນັກກວດສອບ ປະຈໍາປີ 2024 ຈໍານວນ 434 ທ່ານ (ຜູ້ທີ່ມີຜົນງານດີເດັ່ນ ຈໍານວນ 188 ທ່ານ, ຜົນງານດີ ຈໍານວນ 227 ທ່ານ ແລະ ຊົມເຊີຍ ຈໍານວນ 19 ທ່ານ) ແລະ ໄດ້ເປີດຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2025 ຂອງພະນັກງານ-ນັກກວດສອບຂອງອົງການກວດສອບແຫ່ງລັດ ຂັ້ນສູນກາງແລະ ອົງການກວດສອບປະຈໍາພາກ.
ກອງປະຊຸມຍັງໄດ້ຮັບຟັງການໂອ້ລົມຂອງສະຫາຍ ວຽງທະວີສອນ ເທບພະຈັນ ຊຶ່ງໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ໂດຍສະເພາະ ວຽກງານກໍ່ສ້າງ-ບໍາລຸງພະນັກງານ, ການແຕ່ງຕັ້ງ-ສັບຊ້ອນ ແລະ ການປະຕິບັດນະໂຍບາຍຕ່າງໆ ຕໍ່ພະນັກງານ-ລັດຖະກອນ ທົ່ວອົງການກວດສອບແຫ່ງລັດ; ສະຫາຍຍັງໄດ້ເນັ້ນໃຫ້ ບັນດາກົມກອງ ໂດຍສະເພາະ ໜ່ວຍພັກຮາກຖານ ອົງການກວດສອບແຫ່ງລັດຕ້ອງເອົາໃຈໃສ່ຢ່າງຕັ້ງໜ້າ ໃນບັນດາວຽກງານດັ່ງນີ້:
1. ສືບຕໍ່ເປັນເຈົ້າການເຮັດບົດບາດເປັນເສນາທິການໃຫ້ຄະນະພັກ, ຄະນະໜ່ວຍພັກອົງການກວດສອບແຫ່ງລັດ ຢ່າງແຂງແຮງ, ຢາກສຳເລັດບົດບາດໜ້າທີ່ດັ່ງກ່າວໄດ້ດີ, ກ່ອນອື່ນໝົດ ພວກເຮົາຕ້ອງຕັ້ງໜ້າຄົ້ນຄວ້າ, ເຊື່ອມຊຶມ ແລະ ກຳແໜ້ນບັນດານິຕິກຳທີ່ກ່ຽວກັບວຽກພັກ-ພະນັກງານ ໃຫ້ໄດ້ດີ.
2. ເປັນເຈົ້າການສືບຕໍ່ຕິດຕາມ, ຊຸກຍູ້, ໃຫ້ຄຳແນະນຳກ່ຽວກັບການຈັດຕັ້ງປະຕິບັດບັນດານິຕິກຳໂດຍສະເພາະວຽກຈຸດສຸມທີ່ເປັນບຸລິມະສິດ, ຊ່ວຍຄະນະພັກ-ຄະນະນໍາ ໃນການສະຫຼຸບຕີລາຄາ ແລະ ຖອດຖອນບົດຮຽນ.
3. ປະກອບສ່ວນເຂົ້າໃນການແກ້ໄຂບັນດາປະກົດການຫຍໍ້ທໍ້ໃນຖັນແຖວສະມາຊິກພັກ-ພະນັກງານຢ່າງແຂງແຮງ.
4. ເອົາໃຈໃສ່ປັບປຸງລະບອບແບບແຜນເຮັດວຽກຂອງບັນດາໜ່ວຍພັກໃຫ້ຮັບປະກັນດ້ານຫຼັກການຂອງພັກ.
5. ພະນັກງານ ຮັບຜິດຊອບວຽກຈັດຕັ້ງຕ້ອງເປັນຜູ້ທີ່ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມປອດໃສ, ມີຫົວຄິດປະດິດສ້າງ, ມີໄຫວພິບ ແລະ ເປັນຜູ້ທີ່ມີຄວາມຮັບຜິດຊອບສູງ ຕໍ່ໜ້າທີ່ວຽກງານທີ່ໄດ້ຮັບມອບໝາຍ, ຕ້ອງມີທັດສະນະທີ່ຖືກຕ້ອງ ໂດຍສະເພາະແມ່ນການເບິ່ງບັນຫາ, ການຕີລາຄາບັນຫາພະນັກງານຢ່າງພາວະວິໄສ, ຮອບຄອບ, ເຫັນໄດ້ດ້ານຕັ້ງໜ້າ, ຫຍໍ້ທໍ້ ແລະ ທ່າຂະຫຍາຍຕົວຂອງພະນັກງານ, ສຳຄັນທີ່ສຸດ ທັດສະນະຂອງພະນັກງານຈັດຕັ້ງ ຕ້ອງມີຄວາມສັດຊື່, ທ່ຽງທຳ, ເປັນຜູ້ທີ່ໄດ້ຮັບຄວາມໄວ້ວາງໃຈຈາກຄະນະພັກ-ຄະນະນໍາ ແລະ ມະຫາຊົນ ຢ່າງກວ້າງຂວາງອີກດ້ວຍ.
(ຂ່າວ: ອົງການກວດສອບແຫ່ງລັດ, ພາບ: ແສງຈັນ)
ຄໍາເຫັນ