 |
ໃນກອງປະຊຸມສອງຝ່າຍໄດ້ແຈ້ງກ່ຽວກັບສະພາບການພັດທະນາເສດຖະກິດ-ສັງຄົມ ແລະ ການເຄື່ອນໄຫວທີ່ພົ້ນເດັ່ນຂອງວຽກງານການກວດສອບ; ພ້ອມຕີລາຄາຜົນສໍາເລັດ ແລະ ຍົກໃຫ້ເຫັນຜົນການຈັດຕັ້ງປະຕິບັດແຜນກວດສອບເປົ້າໝາຍຕ່າງໆ, ການຕິດຕາມຊຸກຍູ້ການແກ້ໄຂຜົນການກວດສອບ, ຍົກລະດັບຄວາມຮູ້ຄວາມສາມາດຂອງນັກກວດສອບແຕ່ລະຂັ້ນ, ຕະຫຼອດຮອດການຮຽນຮູ້ ແລະ ນໍາໃຊ້ລະບົບປັນຍາປະດິດເຂົ້າໃນການກວດສອບ. ພ້ອມກັນນີ້, ສອງຝ່າຍໄດ້ເອກະພາບກັນກຳນົດທິດທາງການຮ່ວມມືໃນຕໍ່ໜ້າຄື: ໜຶ່ງ, ການຈັດກອງປະຊຸມ ແລະ ການຢ້ຽມຢາມທາງການໃນລະດັບການນໍາ ເພື່ອຊຸກຍູ້ການແລກປ່ຽນບົດຮຽນ ແລະ ປະສົບການຮ່ວມກັນໃນຂົງເຂດວຽກງານການກວດສອບພາກລັດ ໃຫ້ເປັນປົກກະຕິ; ສອງ, ແລກປ່ຽນບົດຮຽນດ້ານວິຊາການຢ່າງເປັນປົກກະຕິ ໂດຍສະເພາະແມ່ນລົງເລິກວຽກງານການກວດສອບ ຂົງເຂດລັດວິສາຫະກິດຕິດພັນກັບການກວດສອບຜົນການຈັດຕັ້ງປະຕິບັດ ແລະ ການຕິດຕາມການແກ້ໄຂຜົນການກວດສອບ ແລະ ສາມ, ການສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ ພາຍໃຕ້ຂອບການຮ່ວມມືຂອງ TISAI, ASOSAI ແລະ ASEA SAI.
ໃນຕອນທ້າຍ, ທ່ານ ວຽງທະວີສອນ ເທບພະຈັນ ໄດ້ສະແດງຄວາມຂອບໃຈຢ່າງຈິງໃຈມາຍັງອົງການກວດສອບແຫ່ງຊາດມາເລເຊຍ ທີ່ໃຫ້ການຕ້ອນຮັບອັນອົບອຸ່ນ, ພ້ອມທັງຊົມເຊີຍອົງການກວດສອບແຫ່ງຊາດມາເລເຊຍ ເນື່ອງໃນໂອກາດຄົບຮອບວັນສ້າງຕັ້ງອົງການກວດສອບແຫ່ງຊາດມາເລເຊຍ ຄົບຮອບ 120 ປີ ໃນການພັດທະນາວຽກງານກວດສອບ, ຄວາມໂປ່ງໃສ, ຄວາມຮັບຜິດຊອບ ແລະ ການບໍລິຫານການເງິນພາກລັດ; ພ້ອມກັນນີ້, ທ່ານ ວຽງທະວີສອນ ເທບພະຈັນ ຍັງໄດ້ຖືໂອກາດກ່າວເຊື້ອເຊີນ ທ່ານປະທານອົງການກວດສອບແຫ່ງຊາດ ມາເລເຊຍ ເດີນທາງມາຢ້ຽມຢາມ ສປປ ລາວ ໃນໂອກາດທີ່ສະດວກອີກດ້ວຍ.
ພາຍຫຼັງສຳເລັດກອງປະຊຸມພົບປະສອງຝ່າຍແລ້ວ, ທັງສອງຝ່າຍໄດ້ເຂົ້າຮ່ວມພິທີລົງນາມບົດບັນທຶກຄວາມເຂົ້າໃຈ (MOU) ສະບັບໃໝ່ ລະຫວ່າງອົງການກວດສອບແຫ່ງລັດ ສປປ ລາວ ແລະ ອົງການກວດສອບແຫ່ງຊາດມາເລເຊຍ ຊຶ່ງບົດບັນທຶກຄວາມເຂົ້າໃຈ (MOU) ສະບັບນີ້ ແມ່ນເປັນບາດກ້າວບຸກທະລຸໃນການຍົກລະດັບການຮ່ວມມືໃຫ້ເລິກເຊິ່ງກວ່າເກົ່າເປັນຕົ້ນ: ການແລກປ່ຽນຜູ້ຊ່ຽວຊານ, ການແລກປ່ຽນຄວາມຮູ້ ແລະ ປະສົບການ, ການຝຶກອົບຮົມ, ການກວດສອບດີຈີຕອນ (Digital Audit), Data Analytics, ປັນຍາປະດິດ AI ແລະ ຂົງເຂດອື່ນໆທີ່ສອງຝ່າຍມີຄວາມສົນໃຈຮ່ວມກັນ.
ນອກຈາກນັ້ນ, ຄະນະຜູ້ແທນອົງການກວດສອບແຫ່ງລັດ ສປປ ລາວ, ຍັງໄດ້ສືບຕໍ່ເຂົ້າຮ່ວມກອງ ປະຊຸມປະຈຳສອງປີ ຂອງຄະນະກຳມະການແລກປ່ຽນຄວາມຮູ້ ASEA SAI (ASEA SAI Knowledge Sharing Committee - KSC) ຄັ້ງທີ 5 ທີ່ຈັດຂຶ້ນໃນຄັ້ງນີ້ຢ່າງຕັ້ງໜ້າ ຊຶ່ງເປັນການປະກອບສ່ວນອັນສໍາຄັນໃນການຮຽນຮູ້, ສ້າງເຄືອຂ່າຍວິຊາຊີບ ແລະ ຍົກສູງບົດບາດຂອງອົງການກວດສອບແຫ່ງລັດ ສປປ ລາວ ໃນເວທີພາກພື້ນ,
ຈາກນັ້ນ, ທ່ານ ນາງ ດາໂຕະ ວັນ ສຸຣາຢະ ວັນ ໂມຮາມັດ ຣາຊີ ກໍໄດ້ສະແດງຄວາມຍິນດີ ແລະ ເຊື່ອໝັ້ນວ່າອົງການກວດສອບແຫ່ງລັດ ສປປ ລາວ ແລະ ສຳນັກງານກວດສອບແຫ່ງຊາດ ມາເລເຊຍ ຈະສືບຕໍ່ສະໜັບສະໜູນອົງການກວດສອບແຫ່ງລັດ ສປປ ລາວ ແລະ ຈະເສີມຂະຫຍາຍສາຍພົວພັນຮ່ວມມື ລະຫວ່າງສອງອົງການກວດສອບແຫ່ງລັດ ໃຫ້ກ້າວໜ້າຂຶ້ນເລື້ອຍໆ.
(ຂ່າວ-ພາບ: ອົງການກວດສອບແຫ່ງລັດ)
ຄໍາເຫັນ