ແຫຼ່ງຂ່າວເປີດເຜີຍວ່າ: ຖ້າຫາກການເພີ່ມປະລິມານການຜະລິດຮອບໃໝ່ນີ້ໄດ້ຮັບການອະນຸມັດຈາກສະມາຊິກ, ຈະສົ່ງຜົນໃຫ້ການຜະລິດທັງໝົດເພີ່ມຂຶ້ນ 1.78 ລ້ານບາເຣນ/ວັນ ໃນປີ 2025, ກວມເອົາຫຼາຍກວ່າ 1.5% ຂອງຄວາມຕ້ອງການນ້ຳມັນທົ່ວໂລກ.
ເຖິງວ່າຈະມີຂໍ້ຕົກລົງທີ່ຈະເພີ່ມປະລິມານການຜະລິດໃນລະດັບກຸ່ມກໍຕາມ, ແຕ່ມາຮອດປັດຈຸບັນ, OPEC+ ຍັງບໍ່ສາມາດບັນລຸເປົ້າໝາຍໄດ້, ເນື່ອງຈາກບາງປະເທດຍັງຢູ່ໃນລະຫວ່າງການຊົດເຊີຍການຜະລິດທີ່ເຄີຍເກີນໂຄຕ້າຜ່ານມາ, ໃນຂະນະທີ່ບາງປະເທດຍັງຕ້ອງການເວລາເພື່ອຟື້ນຟູລະບົບການຜະລິດທີ່ຢຸດສະງັກ.
ທ່ານ ວະລາເມຍ ປູຕິນ ປະທານາທິບໍດີຣັດເຊຍເປີດເຜີຍວ່າ: ກຸ່ມ OPEC+ ປະເມີນວ່າ ຄວາມຕ້ອງການນ້ຳມັນທົ່ວໂລກ ໂດຍສະເພາະໃນລະດູຮ້ອນຈະເພີ່ມຂຶ້ນ ຊຶ່ງອາດເປັນປັດໄຈເຮັດໃຫ້ກຸ່ມສືບຕໍ່ເພີ່ມການຜະລິດໃນໄລຍະໃກ້ໆນີ້.
OPEC+ ໄດ້ປ່ຽນແປງວິທີການຂອງຕົນຢ່າງຈະແຈ້ງໃນປີນີ້, ຫຼັງຈາກທີ່ຜ່ານມາໄດ້ຫຼຸດປະລິມານການຜະລິດຫຼາຍກວ່າ 5 ລ້ານບາເຣນຕໍ່ມື້ເປັນເວລາຫຼາຍປີ. ໂດຍການປ່ຽນແປງນະໂຍບາຍໄດ້ເລີ່ມຕົ້ນໃນເດືອນເມສາ ຜ່ານມາ. ຂະນະທີ່ 8 ປະເທດສະມາຊິກຂອງກຸ່ມດັ່ງກ່າວເລີ່ມຍົກເລີກການຫຼຸດປະລິມານການຜະລິດຮອບລ້າສຸດ 2,2 ລ້ານບາເຣນຕໍ່ມື້ ແລະ ສືບຕໍ່ເພີ່ມປະລິມານການຜະລິດໃນເດືອນພຶດສະພາ, ມິຖຸນາ ແລະ ເດືອນກໍລະກົດ.
ສຳລັບ 8 ປະເທດສະມາຊິກທີ່ມີບົດບາດສຳຄັນໃນແຜນການເພີ່ມປະລິມານການຜະລິດຄັ້ງນີ້ແມ່ນ ຊາອຸດິດ ອາຣັບບີ, ຣັດເຊຍ, ກູເວດ, ອີຣັກ, ສະຫະລັດ ອາຣັບ ເອມິເຣດ, ກາຊັກສະຖານ, ໂອມັນ ແລະ ອານເຊຣີ ໂດຍທັງໝົດຈະເຂົ້າຮ່ວມກອງປະຊຸມໃນວັນທີ 6 ກໍລະກົດນີ້ ເພື່ອປຶກສາຫາລືກ່ຽວກັບຂັ້ນຕອນຕໍ່ໄປ.
ຄໍາເຫັນ