ທ່ານ ພົນຈັດຕະວາ ນາງ ລີວົງ ລາວລີ ຫົວໜ້າ ອົງການໄອຍະການ ປະຊາຊົນສູງສຸດ ໄດ້ລາຍງານ ກ່ຽວກັບແຜນການເຄື່ອນໄຫວວຽກງານ 5 ປີ (2026-2030) ຕໍ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X, ໃນວັນທີ 24 ມີນານີ້, ທີ່ສະພາແຫ່ງຊາດ, ໂດຍການເປັນປະທານ ຂອງ ທ່ານ ນາງ ສູນທອນ ໄຊຍະຈັກ ຮອງປະທານ ສະພາແຫ່ງຊາດ.
ທ່ານ ຫົວໜ້າ ອົງການໄອຍະການ ປະຊາຊົນ ສູງສຸດ ກ່າວວ່າ: ໃນ 5 ປີ ຕໍ່ໜ້ານີ້, ອົງການໄອຍະການປະຊາຊົນແຕ່ລະຂັ້ນຈະສຸມໃສ່ປະຕິບັດ 6 ແຜນງານ 27 ໂຄງການ ແລະ 104 ກິດຈະກໍາ ດັ່ງນີ້:ແຜນງານທີ1: ແຜນງານພັດທະນາບຸກຄະລາກອນ, ປະກອບມີ 4 ໂຄງການ 13 ກິດຈະກໍາ ຊຶ່ງແຜນງານນີ້ຈະສຸມໃສ່ສຶກສາອົບຮົມການເມືອງ-ແນວຄິດ ພະນັກງານ-ລັດຖະກອນ ທົ່ວລະບົບອົງການໄອຍະການປະຊາຊົນ ແລະ ອົງການໄອຍະການທະຫານ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສີນທໍາປະຕິວັດ, ມີຈັນຍາບັນ, ຈັນຍາທໍາ, ຊື່ສັດບໍລິສຸດ. ຍົກລະດັບຄວາມຮູ້ຄວາມສາມາດທາງດ້ານວິຊາສະເພາະ, ພາສາຕ່າງປະເທດ, ເຕັກນິກ ແລະ ເຕັກໂນໂລຊີ ຢ່າງເປັນລະບົບຕໍ່ເນື່ອງ ແລະ ຮັບປະກັນຄຸນນະພາບ, ຈັດຝຶກອົບຮົມຫຼັກສູດພະນັກງານໄອຍະການ ໃຫ້ໄດ້ 4 ຄັ້ງຕໍ່ປີ; ແຜນງານທີ 2: ແຜນງານພັດທະນາລະບົບການຈັດຕັ້ງ ປະກອບມີ 1 ໂຄງການ 6 ກິດຈະກໍາ, ແຜນງານນີ້ ຈະເອົາໃຈໃສ່ປັບປຸງລະບົບກົງຈັກການຈັດຕັ້ງ ໃຫ້ເປັນລະບົບຄົບຊຸດ, ໜັກແໜ້ນ, ເຂັ້ມແຂງ ແຕ່ສູນກາງຮອດທ້ອງຖິ່ນ ໃຫ້ສໍາເລັດຕາມແຜນການ ສອດຄ່ອງກັບ ລັດຖະທໍາມະນູນ ສະບັບປັບປຸງປີ 2025 ແລະ ກົດໝາຍວ່າດ້ວຍອົງການໄອຍະການປະຊາຊົນ ສະບັບປັບປຸງປີ 2024 ໂດຍສະເພາະແມ່ນການຫັນວຽກງານອົງການໄອຍະການປະຊາຊົນລົງສູ່ຮາກຖານ ດ້ວຍການຫັນເອົາພະນັກງານໄອຍະການຢູ່ເຂດ ໄປປະຈຳຢູ່ເມືອງ ເພື່ອໃຫ້ບໍລິການປະຊາຊົນບັນດາເຜົ່າ ແລະ ເຮັດໜ້າທີ່ຕິດຕາມ ກວດກາ ການປະຕິບັດກົດໝາຍ ຂອງອົງການສືບສວນ-ສອບສວນ ຢູ່ຂັ້ນເມືອງ ໃຫ້ໄດ້ 30 ເມືອງ; ແຜນງານທີ 3: ແຜນງານກວດກາ ແລະ ຕ້ານການສໍ້ລາດບັງຫຼວງ ປະກອບມີ 3 ໂຄງການ 10 ກິດຈະກໍາ, ແຜນງານີ້, ຈະເອົາໃຈໃສ່ຕິດຕາມ ກວດກາການຈັດຕັ້ງປະຕິບັດມະຕິ, ຄໍາສັ່ງ, ກົດລະບຽບພັກ ແລະ ການເຄື່ອນໄຫວການປະຕິບັດໜ້າທີ່ ຂອງບັນດາສະມາຊິກພັກ-ພະນັກງານ ຢ່າງເປັນປົກກະຕິ ແລະ ກວດກາແຜນການກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ; ຍົກສູງຄຸນນະພາບວຽກງານກວດກາລັດ; ຕ້ານ, ສະກັດກັ້ນ ການສໍ້ລາດບັງຫຼວງ ແລະ ການແກ້ໄຂຄໍາຮ້ອງຄໍາສະເໜີ ຕໍ່ການປະຕິບັດໜ້າທີ່ຂອງພະນັກງານໄອຍະການປະຊາຊົນ ໃຫ້ເຂັ້ມງວດ ແລະ ເດັດຂາດປະຕິບັດວິໄນຕໍ່ພະນັກງານໄອຍະການຜູ້ທີ່ລະເມີດກົດລະບຽບຂອງພັກ ແລະ ກົດໝາຍຂອງລັດ; ແຜນງານທີ 4: ແຜນງານຍົກສູງຄຸນນະພາບການຕິດຕາມ, ກວດກາ ການປະຕິບັດກົດໝາຍ ປະກອບ ມີ 8 ໂຄງການ, 39 ກິດຈະກໍາ, ແຜນງານນີ້ ຈະເອົາໃຈໃສ່ຕິດຕາມ, ກວດກາ ອົງການສືບສວນ-ສອບສວນໃນການດຳເນີນຄະດີຕາມກົດໝາຍ ເປັນຕົ້ນແມ່ນ ການນຳໃຊ້ ວິທີການສືບສວນ-ສອບສວນ ແລະ ມາດຕະການສະກັດກັ້ນເຊັ່ນ: ການກັກຕົວ, ຈັບຕົວ, ກັກຂັງ ແລະ ອື່ນໆ ໃຫ້ຖືກຕ້ອງຕາມກົດໝາຍ; ສືບຕໍ່ຜັນຂະຫຍາຍກົນໄກປະສານງານ ເຂົ້າສູ່ວຽກງານຕົວຈິງ; ອອກຂໍ້ກຳນົດ, ຄຳແນະນຳດ້ານວິຊາການ ຈຳນວນໜຶ່ງ; ແຜນງານທີ 5: ແຜນງານພັດທະນາ ແລະ ກໍ່ສ້າງພື້ນຖານໂຄງລ່າງ ແລະ ງົບປະມານ ປະກອບມີ 5 ໂຄງການ 18 ກິດຈະກໍາ, ແຜນງານີ້, ຈະຕັ້ງໜ້າຄົ້ນຄວ້າ, ນໍາສະ ເໜີລັດຖະບານເພື່ອສະໜອງງົບປະມານ ໃນການຈັດຕັ້ງປະຕິບັດແຜນພັດທະນາວຽກງານໄອຍະການ 2026-2030 ໃຫ້ໄດ້ຮັບຜົນດີ, ໂດຍສະເພາະການກໍ່ສ້າງພື້ນຖານໂຄງລ່າງຢູ່ຂັ້ນທ້ອງຖິ່ນ, ສ້າງແຜນງົບປະມານ ແລະ ຄຸ້ມຄອງລາຍຮັບ-ລາຍຈ່າຍ, ເອົາໃຈໃສ່ສະໜອງ ແລະ ຄຸ້ມຄອງພາຫະນະ, ອຸປະກອນຮັບໃຊ້ ໃຫ້ແກ່ການເຄື່ອນໄຫວວຽກງານໄອຍະການປະຊາຊົນ ໃນແຕ່ລະໄລຍະໃຫ້ຄົບຖ້ວນຕາມການອະນຸມັດຂອງລັດຖະບານ ແລະ ຖືກຕ້ອງຕາມກົດໝາຍ; ແຜນງານທີ 6: ແຜນງານຮ່ວມມືກັບຕ່າງປະເທດ, ປະກອບມີ 6 ໂຄງການ 18 ກິດຈະກໍາ, ແຜນງານນີ້ ສືບຕໍ່ເປັນເຈົ້າການປະຕິບັດນະໂຍບາຍການພົວພັນຮ່ວມມືກັບຕ່າງປະເທດໃນເງື່ອນໄຂໃໝ່ຂອງພັກເພື່ອຍາດແຍ່ງບົດຮຽນ, ທຶນຮອນ ແລະ ເຕັກໂນໂລຊີ ປະກອບສ່ວນເຂົ້າໃນການພັດທະນາວຽກງານໄອຍະການປະຊາຊົນ ໃຫ້ຂະຫຍາຍຕົວຕາມທິດຫັນເປັນທັນສະໄໝເທື່ອລະກ້າວ. ໂດຍສຸມໃສ່ການພົວພັນຮ່ວມມືກັບປະເທດເພື່ອນມິດຍຸດທະສາດ ສສ ຫວຽດນາມ ແລະ ສປ ຈີນ ໃຫ້ກ້າວສູ່ລ່ວງເລີກ, ຮ່ວມມືກັບໄອຍະການ ບັນດາປະເທດໃນອາຊຽນ ແລະ ປະເທດອື່ນໆ ໃນພາກພື້ນ ແລະ ສາກົນ, ຄົ້ນຄວ້າສ້າງສົນທິສັນຍາ ແລະ ຈັດຕັ້ງປະຕິບັດກົນໄກການຮ່ວມມືທາງດ້ານຍຸຕິທໍາກັບຕ່າງປະເທດ ຢ່າງມີປະສິດທິຜົນ.
(ຂ່າວ-ພາບ:ສຳນານ)
ຄໍາເຫັນ