ອອປສ ເປີດຊຸດອົບຮົມວຽກງານກໍ່ສ້າງພັກ-ພະນັກງານ ໃຫ້ແກ່ບັນດາໝ່ວຍພັກທີ່ຂຶ້ນກັບອົງຄະນະພັກ 

ອົງການໄອຍະການປະຊາຊົນສູງສຸດ (ອອປສ) ໄດ້ຈັດພິທີເປີດຊຸດຝຶກອົບຮົມວຽກງານກໍ່ສ້າງພັກ-ພະນັກງານ ໃຫ້ແກ່ບັນດາໝ່ວຍພັກທີ່ຂຶ້ນກັບອົງຄະນະພັກ ອອປສ ຂຶ້ນໃນວັນທີ 18 ທັນວາ 2023 ທີ່ ອອປສ  ໂດຍພາຍໃຕ້ການເປັນປະທານຂອງ ສະຫາຍ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ມີບັນດາຄະນະໜ່ວຍພັກ ຫ້ອງການ, ບັນດາກົມ ແລະ ສະຖາບັນຄົ້ນຄວ້າ ແລະ ຝຶກອົບຮົມໄອຍະການ, ສະມາຊິກພັກ, ພະນັກງານ ຂອງກົມຈັດຕັ້ງ-ພະນັກງານ, ກົມກວດກາ ອົງການໄອຍະການປະຊາຊົນສູງສຸດ ແລະ ຄູຝຶກທີ່ມາຈາກ ຈັດຕັ້ງສູນກາງພັກ ເຂົ້າຮ່ວມ.
ສະຫາຍ ໄຊຊະນະ ໂຄດພູທອນ ໄດ້ມີຄໍາເຫັນໃນການຝຶກອົບຮົມຄັ້ງນີ້ວ່າ: ໂດຍທ່ານໄດ້ເນັ້ນບັນຫາທີ່ສຳຄັນ ຕໍ່ຄູຝຶກ ແລະ ນັກສຳມະນາກອນ,  ສໍາລັບຊຸດຝຶກອົບຮົມແມ່ນປະກອບມີ 9 ຫົວຂໍ້ຄື: 1. ທັດສະນະຂອງພັກປະຊາຊົນລາວກ່ຽວກັບວຽກງານກໍ່ສ້າງພັກ; 2. ລະບົບການເມືອງຂອງ ສປປ ລາວ ໃນເງື່ອນໄຂໃໝ່; 3. ແບບແຜນນໍາພາ ແລະ ຫຼັກການລວມສູນປະຊາທິປະໄຕຂອງພັກ; 4. ການດໍາເນີນຊີວິດໜ່ວຍພັກ; 5. ຍົກສູງຄຸນນະພາບສະມາຊິກພັກ ແລະວຽກງານຂະຫຍາຍພັກໄລຍະ ໃໝ່; 6.ວຽກງານປ້ອງກັນພັກ ໃນໄລຍະໃໝ່; 7. ທັດສະນະຂອງພັກຕໍ່ພະນັກງານ ແລະ ວຽກງານພະນັກງານ; 8. ວຽກງານຄຸ້ມຄອງພະນັກງານ ແລະ 9. ວຽກງານການກະກຽມ ແລະ ດໍາເນີນກອງປະຊຸມໃຫຍ່ຂອງພັກ.  ທັງໝົດ 9 ຫົວຂໍ້ຫຼັກນີ້, ບັນດານັກສໍາມະນາກອນ ຈົ່ງພ້ອມກັນແລກປ່ຽນບົດຮຽນ ແລະ ສຶກສາຄົ້ນຄວ້າບົດຮຽນດັ່ງກ່າວຢ່າງກົງໄປກົງມາ ເພື່ອສ້າງຄວາມເຂັ້ມແຂງໃນການຈັດຕັ້ງປະຕິບັດໜ້າທີ່ການເມືອງ ໃນຄະນະໝ່ວຍພັກ ທີ່ຂຶ້ນກັບອົງຄະນະພັກ ອອປສ ໃນການປັບປຸງຍົກລະດັບທາງດ້ານການເມືອງ-ແນວຄິດ ແລະ ທິດສະດີຂອງພັກ, ແບບແຜນວິທີເຮັດວຽກ, ແບບແຜນໃນການນໍາພາຂອງຄະນະໜ່ວຍພັກໃຫ້ໜັກແໜ້ນເຂັ້ມແຂງ, ເຊື່ອມຊືມ ແລະ ກຳແໜ້ນແນວທາງ, ແຜນນະໂຍບາຍຂອງພັກໂດຍສະເພາະແມ່ນແນວທາງປ່ຽນແປງໃໜ່ຂອງພັກຢ່າງຮອບດ້ານ, ຍົກສູງຄຸນນະພາບໃນການຊີ້ນຳ-ນຳພາຂອງຄະນະໝ່ວຍພັກ ເພື່ອຄວາມເປັນເອກະພາບໃນການປະສານງານ, ຮັບຮູ້ໄດ້ຂອບເຂດ ແລະ ຄວາມຮັບຜິດຊອບຂອງວຽກງານພັກ, ປະກອບສ່ວນເຮັດໃຫ້ໜ່ວຍພັກມີກຳລັງແຮງສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ແລະ ມີຄຸນນະພາບໃໝ່.ຊຸດຝຶກອົບຮົມດັ່ງກ່າວແມ່ນຈະໄດ້ດຳເນີນ ໄປຮອດວັນທີ 22 ທັນວາ 2023 ຈຶ່ງສຳເລັດ.
ໂດຍ: ອານຸສັກ ກວາງວັນ