ການລັກລອບຄ້າຂາຍສັດທະເລ ຊຶ່ງຄາດວ່າມີມູນຄ່າຫຼາຍພັນລ້ານໂດລາຕໍ່ປີ, ຖືເປັນໄພຂົ່ມຂູ່ທີ່ສຳຄັນຕໍ່ລະບົບນິເວດທາງທະເລ ແລະ ມັກຈະກວດພົບໄດ້ຍາກກວ່າການລັກລອບຂົນສົ່ງງາຊ້າງ ຫຼື ນໍແຮດ, ຍ້ອນວ່າສິ່ງຂອງເຫຼົ່ານີ້ມັກຈະຖືກເຊື່ອງໄວ້ໃນກະເປົາເດີນທາງ ຫຼື ພັດສະດຸຂອງນັກທ່ອງທ່ຽວທົ່ວໄປ.
ທີມງານຄົ້ນຄວ້າ, ນຳໂດຍນັກວິທະຍາສາດຈາກມະຫາວິທະຍາໄລ Macquarie ໃນອົສຕຣາລີ, ໄດ້ຝຶກອັລກໍຣິທຶມດ້ວຍການສະແກນເກືອບ 300 ຄັ້ງ ໂດຍໃຊ້ຕົວຢ່າງຈາກສິ່ງຂອງທີ່ຖືກຢຶດໄດ້ໃນຄະດີລັກລອບຄ້າຂາຍສັດທະເລ, ພ້ອມທັງຈຳລອງວິທີການເຊື່ອງໃນສະຖານະຕົວຈິງເຊັ່ນ: ການຫໍ່ສິ່ງຂອງໃນແຜ່ນກົ່ວ, ເສື້ອຜ້າ ຫຼື ການເຊື່ອງໄວ້ໃນເຄື່ອງຫຼິ້ນ. ລະບົບດັ່ງກ່າວສາມາດກວດພົບຄີປາສະຫຼາມໄດ້ດ້ວຍຄວາມຖືກຕ້ອງ 95%, ມ້ານ້ຳ 96% ແລະ ປີງທະເລ 86%.
ທີມງານຄົ້ນຄວ້າໄດ້ເປີດເຜີຍວ່າ: ເຕັກໂນໂລຊີນີ້ສາມາດຊ່ວຍສະໜັບສະໜູນການບັງຄັບໃຊ້ກົດໝາຍຕາມຊາຍແດນ, ແຕ່ໄດ້ເນັ້ນໜັກວ່າມັນເປັນພຽງເຄື່ອງມືເສີມ ແລະ ບໍ່ແມ່ນສິ່ງທີ່ຈະເຂົ້າມາແທນວິທີການກວດທີ່ໃຊ້ໃນປັດຈຸບັນ. ເນື່ອງຈາກວ່າຍັງມີຂໍ້ຈຳກັດບາງຢ່າງ ເຊັ່ນ: ການແຈ້ງເຕືອນທີ່ບໍ່ຖືກຕ້ອງ ແລະ ການເຂົ້າເຖິງເຄື່ອງສະແກນ 3D ທີ່ກ້າວໜ້າຈຳກັດ.
ທ່ານ ວາເນສຊາ ພິຣອດຕາ ຜູ້ຂຽນຫຼັກຂອງການສຶກສາ ຈາກມະຫາວິທະຍາໄລ Macquarie ກ່າວວ່າ: ທີມງານສາມາດຈຳລອງການລັກລອບຂົນສົ່ງໄດ້ສະເພາະກໍລະນີທີ່ເຄີຍກວດພົບມາກ່ອນໜ້ານີ້ເທົ່ານັ້ນ. ປັນຍາປະດິດບໍ່ແມ່ນເຄື່ອງມືວິເສດທີ່ສາມາດກວດພົບໄດ້ທຸກສະຖານະການ ແລະ ມັນບໍ່ສາມາດທົດແທນການກວດໂດຍມະນຸດ ແລະ ໝາດົມກິ່ນໄດ້.
ຄໍາເຫັນ